ދިރިއުޅެމުން ދިޔަ ގެއިން މަސްތުވާތަކެތީގެ ބާވަތެއް ކަމަށްވާ ކެނެބިސް ފެނުމާ ގުޅިގެން އައްޑޫ ހިތަދޫ މީހަކު އުމުރަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.

ކްރިމިނަލް ކޯޓުން އެ ހުކުމް ކޮށްފައިވަނީ އައްޑޫގެ ވެރިރަށް ސ. ހިތަދޫ، ހެޕީފިއުޗާ، މުހައްމަދު ސުއައިދު އަހުމަދުގެ މައްޗަށެވެ.

Ad by Hajj Corporation

އޭނާގެ މައްޗަށް ދެ ދައުވާއެއް އުފުލާފައިވާއިރު، ދައުލަތުން ބުނެފައިވަނީ 2023 ސެޕްޓެމްބަރު 19 ވަނަ ދުވަހުގެ 16:45 އެހާކަންހާއިރު، ކ. މާލެ، ހ. ލުމެން ގޭގެ ތިން ވަނަ ފަންގިފިލާގެ އެޕާޓްމެންޓެއްގައި މަސްތުވާތަކެތި ބޭނުންކޮށް، ވިޔަފާރި ކުރާ ކަމުގެ މައުލޫމާތު ފުލުހުންގެ ކައުންޓާ ނާކޮޓިކްސް އިންޓެލިޖެންސްއިން ފުލުހުންނަށް ހިއްސާ ކުރުމާއި ގުޅިގެން އޭނާ ހުޅުމާލެ ފިތުރޯނުމަގުގައިހުންނަ ރަށު މާރުކޭޓް ކައިރީގައި ހުއްޓާ، ކޯޓު އަމުރެއްގެ ދަށުން އޭނާ ހައްޔަރު ކުރި ކަމަށެވެ.

އޭނާ ހައްޔަރުކުރުމަށްފަހު، ބަލައި ފާސްކޮށް، އެދުވަހުގެ 20:09 އެހާކަންހާއިރު، ލުމެން ގެއަށް އޭނާ ހާޒިރުކޮށް، އެ ގެ ބަލައި ފާސްކޮށްފައިވާ ކަމަށެވެ.

އޭނާގެ ހާޒިރުގައި އެ ގޭގެ ކޮޓަރިއެއް ފާސްކުރިއިރު، ކޮޓަރިން ގިނަ އަދަދެއްގެ މަސްތުވާތަކެއްޗާއި، އޭނާ އާއި ގުޅުން ހުރި ލިޔެކިޔުންތައް ފެނިފައިވާ ކަމަށް ދައުލަތުން ވަނީ ބުނެފައެވެ.

ދައުލަތުން ބުނި ގޮތުގައި އެ ކޮޓަރިން ޖުމްލަ 84.9128 ގްރާމް ކެނެބިސް ވަނީ ފެނިފައެވެ. އެތަކެތި ހުރީ ކޮޓަރީގެ އެކި ތަންތާ ބިއްލޫރި ފުޅި، ފިލްމު ހުސްކުރި ދަޅު، ރަބަރު ޕެކެޓްގައި ކަމަށް ދައުލަތުން ވަނީ ބުނެފައެވެ. މީގެ އިތުރުން އެ ކޮޓަރިން ކެނެބިސް ހޭކިފައި ހުރި ކައްޓާއަކާއި ވަޅިއެއްގެ އިތުރުން ޑިސްޕްލޭ ތެޅިފައިވާ އައިފޯނަކާއި ކަތުރަކާއި ސެލޯފިން ރޯލެއް ވަނީ ފެނިފައެވެ.

ދައުލަތުން ބުނީ، އެތަކެތީގެ އިތުރުން އެ ކޮޓަރިން އޭނާގެ މެޑިކަލް ޑޮކިއުމެންޓްތަކާއި 2 ޕާސްޕޯޓް ފެނިފައިވާ ކަމަށެވެ.

މި މައްސަލައިގައި އޭނާގެ މައްޗަށް އުފުލާފައިވަނީ ކެނެބިސް ޓްރެފިކް ކުރުން، މަސްތުވާތަކެއްޗަށް ދެވިހިފާފައިވާ މީހަކު ކެނެބިސް ބޭނުން ކުރުމާއި ޕެޑަލްކުރުމާއި ޓްރެފިކް ކުރުމުގެ އިތުރުން ޖަދުވަލު 1 ގައިވާ މަސްތުވާއެއްޗެއް ޓްރެފިކް ކުރުމެވެ.

މި މައްސަލައިގައި ކުރިއަށް ގެންދިޔަ ޝަރީއަތުގެ މަރުހަލާގައި އޭނާގެ ފަރާތުން ވަނީ އެ ދައުވާއަށް އިންކާރުކޮށްފައެވެ. އެކަމަށް އޭނާ އިންކާރު ކުރި ނަމަވެސް، ހުލާސާ ބަޔާން ހުށަހެޅުމަށް ތާވާލު ކުރެވުނު އަޑު އެހުމުގައި އޭނާ ވަނީ ދައުލަތާއެކު އިއުތިރާފުގެ އެއްބަސްވުމެއް ހަދަން ބޭނުންވާ ކަމަށް ބުނެ، އެ އެއްބަސްވުން ހަދާފައެވެ.

އެހެންކަމުން ކެނެބިސް ޓްރެފިކް ކުރުމާއި ބޭނުން ކުރުމާއި ޕެޑަލް ކުރުމުގެ ދައުވާއާއި ގުޅިގެން ދެފަރާތުން އެއްބަސްވެފައިވާ އަދަބަކީ 50،000 ރުފިޔާއިން ޖޫރިމަނާއެކު 12 އަހަރާއި 6 މަހުގެ މުއްދަތަށް ޖަލަށްލުމަށެވެ.

މައްސަލައިގެ ހުކުމް އިއްވަމުން ގާޒީ އަލީ ނަދީމް ވަނީ އޭނާ ބަންދުގައި ހޭދަކޮށްފައިވާ 2 އަހަރާއި 4 މަހާއި 10 ދުވަސް އުނިކުރުމަށްފަހު އެ ދައުވާއާއި ގުޅިގެން އޭނާގެ މައްޗަށް 10 އަހަރާއި 1 މަހާއި 20 ދުވަހުގެ ޖަލު ހުކުމާއެކު 50،000 ރުފިޔާއިން ޖޫރިމަނާކޮށްފައެވެ. އަދި މަސްތުވާއެއްޗެއް ޓްރެފިކް ކުރުމުގެ ދައުވާއާއި ގުޅިގެން އޭނާގެ މައްޗަށް ވަނީ 12 އަހަރާއި 6 މަސް ދުވަހުގެ ޖަލު ހުކުމަކާއެކު 50،000 ރުފިޔާއިން ޖޫރިމަނާކޮށްފައެވެ.