އިޓަލީގެ އެޓަލާންޓާއަށް ކުޅެމުން އަންނަ ނައިޖީރިއާގެ ފޯވާޑް އަޑެމޯލާ ލުކްމަން، ތުރުކީގެ ފެނަބާޗޭއަށް ބަދަލުވުމަށް ދެ ކްލަބުގެ މެދުގައި އެއްބަސްވުމަކަށް އަތުވެއްޖެ ކަމަށް ރިޕޯޓްތައް ބުނެފިއެވެ. ލެކިއުޕްގެ ލޮއިކް ޓަންޒީ ރިޕޯޓްކޮށްފައިވާ ގޮތުގައި، މި ޓްރާންސްފާގެ ކަންކަން މިހާރު ވަނީ ނިމުމަކާ ގާތްވެފައެވެ.

މި ޓްރާންސްފާގެ އަގަކީ ޖުމްލަ 40 މިލިއަން ޔޫރޯ ކަމަށް މަޢުލޫމާތު ލިބެއެވެ. މީގެ ތެރޭގައި ހިމެނެނީ ފިކްސްޑް ޕޭމަންޓްގެ ގޮތުގައި ދައްކާ 35 މިލިއަން ޔޫރޯ އާއި، އިތުރު ބޯނަސްގެ ގޮތުގައި ހިމެނޭ 5 މިލިއަން ޔޫރޯއެވެ. ދެ ކްލަބުގެ މެދުގައި މި އެއްބަސްވުމަށް އާދެވުނީ މިދިޔަ ހުކުރު ދުވަހުއެވެ.

Ad by Hajj Corporation

މި ޓްރާންސްފާ މުޅިން ފައިނަލް ކުރުމަށްޓަކައި މިހާރު ބާކީ އޮތް ހަމައެކަނި ކަމަކީ، އިސްތަންބޫލްގެ ކްލަބުން އެޓަލާންޓާއަށް ބޭނުންވާ ޕޭމަންޓް ގެރެންޓީތައް ފޯރުކޮށްދިނުމެވެ. އެކަން ނިމުމާއެކު، ލުކްމަން ފެނަބާޗޭއާއެކު ހަތަރު އަހަރާއި ބައިގެ އެއްބަސްވުމެއްގައި ސޮއިކުރާނެ ކަމަށް ބެލެވެއެވެ.

މިއީ މި ފިނި މޫސުމުގެ ޓްރާންސްފާ ބާޒާރުގައި ފެނަބާޗޭއިން ކުރިއަށްގެންދާ ވަރުގަދަ ހަރަކާތްތަކުގެ ތެރެއިން މުހިންމު ފިޔަވަޅެކެވެ. އެ ކްލަބުން ދާދި ފަހުން ވަނީ 30 މިލިއަން ޔޫރޯއަށް މަޓެއޯ ގުއެންޑޫޒީ ވެސް ސޮއިކުރުވާފައެވެ. މީގެ އިތުރުން، ފްރާންސްގެ ތަޖުރިބާކާރު މިޑްފީލްޑަރު އެންގޯލޯ ކާންޓޭ ހޯދުމުގެ މަސައްކަތްވެސް އެ ކްލަބުން ދަނީ ކުރަމުންނެވެ.

މި ބޮޑެތި ޚަރަދުތަކާއެކު، ފެނަބާޗޭ ފާހަގަވެގެން ގޮސްފައިވަނީ ޖެނުއަރީ މަހުގެ ޓްރާންސްފާ ބާޒާރުގައި އެންމެ ބޮޑު ހޭދައެއް ކުރާ އަދި އެންމެ ހަރަކާތްތެރި އެއް ކްލަބުގެ ގޮތުގައެވެ. ލޫކްމަން ވަނީ 2024 ވަނަ އަހަރުގައި ސަލާޙް އާއި ވާދަކޮށް އެފްކޮން އިން ހޮވި އެފްރިކާގެ އެންމެ ކުޅުންތެރިޔާގެ މަޤާމް ހޯދާފައެވެ.