ރާއްޖެއަށް މުދާ އިމްޕޯޓްކުރުމާއި އެކްސްޕޯޓްކުރުމުގައި މިހާރު ހުރި ދަތިތައް ހައްލުކުރުމަށް ކަމާގުޅޭ ހުރިހާ ފަރާތްތައް ހިމެނޭގޮތަށް ފޯރަމެއް، މިއަދު ކަސްޓަމްސް ބިލްޑިންގ ގައި ބާއްވައިފިއެވެ.

އެއް ދުވަހުގެ މުއްދަތަށް ބޭއްވުނު މި ފޯރަމްގައި ކަސްޓަމްސް، ބަނދަރުތައް، މުދާ ކްލިއަރކުރުމުގައި ހަރަކާތްތެރިވާ ކްލިއަރިންގ އެޖެންޓުންނާއި ބްރޯކަރުން އަދި އިމްޕޯޓް/އެކްސްޕޯޓް މުދަލާގުޅޭ ހުއްދަތައް ދޫކުރާ ސަރުކާރުގެ އިދާރާތައް ހިމެނޭގޮތަށް 60 އަށް ވުރެ ގިނަ ފަރާތަކުން ބައިވެރިވިއެވެ.

Ad by Hajj Corporation

މުދާ އިމްޕޯޓް/އެކްސްޕޯޓްކުރުމުގައި ދިމާވާ ދަތިތައް ހައްލުކުރުމާ ގުޅޭގޮތުން ވަރަށް ފުޅާ ދާއިރާއެއްގައި، ފޯރަމްގެ ބައިވެރިން މަޝްވަރާކުރެއްވިއެވެ. މިގޮތުން ރާއްޖެއަށް އިމްޕޯޓްކުރާ ކެމިކަލްގެ ބާވަތްތަކަށް ހުއްދަ ދޫކުރުމާއި، ކާބޯތަކެއްޗާއި ބޭހުގެ ބާވަތްތައް ކްލިއަރކުރުމުގައި ހުރި ދަތިތަކަށް ހައްލު ގެންނާނެ ގޮތްތަކާ ގުޅޭގޮތުން މަޝްވަރާކުރިއެވެ. އަދި ގަސްގަހާގެއްސާއި ޖަނަވާރުގެ ބާވަތްތައް އެތެރެކުރުމުގެ ކަންކަން މިހާރަށްވުރެ ފަސޭހަކުރުމާއި، އިމާރާތްކުރުމުގެ ސާމާނު އެތެރެކުރުމަށް ހުއްދަ ދޭ އުޞޫލުތައް ލުއި ފަސޭހަ ކުރުމާގުޅޭގޮތުން ފޯރަމްގެ ބައިވެރިން މަޝްވަރާކުރެއްވިއެވެ.

މީގެއިތުރުން މިކަންކަން ހައްލުކުރުމަށް މިހާރުން މިހާރަށް އެޅެންހުރި ފިޔަވަޅުތަކާއި، މެދުރާސްތާ އާއި ދިގުރާސްތާގައި ގެނެވޭނެ ހައްލުތަކާމެދުވެސް ބައިވެރިން މަޝްވަރާކުރެއްވިއެވެ. މި ފޯރަމްއިން ކުރަން ނިންމުނު ކަންކަން ކަމާގުޅުންހުރި އިދާރާތަކާއި ޚިއްސާކޮށް އެކަންކަން ތާވާލާ އެއްގޮތަށް ކުރިއަށް ގެންދިއުމަށްވެސް ފޯރަމްގައި ނިންމާފައިވެއެވެ.

ރާއްޖެއަށް ގެންނަ މުދަލުގެ ނިސްބަތް ދުވަހުން ދުވަހަށް އިތުރުވަމުންދާއިރު، ބަނދަރުތަކުގައި ކަސްޓަމްސްއިން ފޯރުކޮށްދޭ  ޚިދުމަތްތައް އެއްދަވަހުން އަނެއް ދުވަހަށް ތަރައްޤީކޮށް، ކްލިއަރަންސް ޕްރޮސެސް ހަލުވިކޮށް، ފެންވަރު ރަނގަޅުކުރުމަށްޓަކައި، ކަސްޓަމްސްއިން އަބަދުވެސް މަސައްކަތްތައް ކުރެވުމުންދެއެވެ. އަދި މިފަދަ ކަންކަމުގައި ގުޅިގެން މަސައްކަތްކުރާ އިދާރާތަކާއި ސްޓޭކްހޯލްޑަރުންގެ ފަރާތުން ލިބޭ އެއްބާރުލުން ފާހަގަކުރަމެވެ.