އައްޑޫ ސިޓީ ހިތަދޫގައި ހުންނަ އައްޑޫ އިކުއަޓޯރިއަލް ހޮސްޕިޓަލުގައި އައިނު ފިހާރައެއް ހުޅުވަން ސަރުކާރުން ތައްޔާރުވެއްޖެއެވެ.

އަލަށް ހުޅުވަން ތައްޔާރުވެފައިވާ ފިހާރައާއެކު، ލޮލުގެ ނަމްބަރު ނެގާ ފަރާތްތަކަށް އައިނު ލިބުމުގައި ދިމާވާ ދަތިތައް ހައްލުވާނެއެވެ.. އެހެންވެ، އަންނަ ހަފުތާ ބަންދުގައި ހޮސްޕިޓަލުގައި ހުޅުވަން ނިންމާފައިވާ އައިނު ފިހާރައާއެކު ބޮޑު ފަސޭހައެއް އެ ސިޓީގެ ރައްޔިތުންނަށް ލިބިގެންދާނެއެވެ.

Ad by Hajj Corporation

ސަރުކާރުގެ އައިނު ފިހާރަ އެންމެ ފުރަތަމަ ހުޅުވީ މައި ހޮސްޕިޓަލް - އައިޖީއެމްއެޗުގައެވެ. އެ އަށް ފަހު، ހުޅުމާލެ ހޮސްޕިޓަލުގައި ވެސް ވަނީ އައިނު ފިހާރައެއް ހުޅުވައިފައެވެ.

އައްޑޫ ހޮސްޕިޓަލުން ބުނީ އެ ހޮސްޕިޓަލްގެ އައިނު ފިހާރަވެސް ހިންގާނީ އައިޖީއެމްއެޗާ ގުޅިގެން ކަމަށެވެ.

ސަރުކާރުގެ ގިނަ ހޮސްޕިޓަލްތަކުގައި ލޮލުގެ އެކި ބަލިތަކަށް ފަރުވާ ދިނަސް، އައިނާ ގުޅޭ އެއްވެސް ހިދުމަތެއް ނުދެއެވެ. އެ ސަބަބުތަކާ ހެދި އެ ވިޔަފާރީގައި އިސްކޮށް އުޅެނީ އަމިއްލަ ފަރާތްތަކެވެ.

އެކަމަކު، ޕްރައިވެޓް ތަންތަނުން ވިއްކާ އައިނުގެ އަގުބޮޑުވުމުން އަމިއްލަ ޖީބުން ވެސް ކޮންމެ ފަހަރަކު ވެސް ބޮޑު ހޭދައެއް ކުރަންޖެހެއެވެ.

ސަރުކާރުން ވަނީ އައިނު ހެއްދުމަށް އާސަންދައިން ކަވަރުކުރާ ބައިވެސް 2،000 ރުފިޔާއަށް ބޮޑުކޮށްފައެވެ.