ރާއްޖޭގެ ފުޓްސަލްގެ ތާރީޚުގައި ނުހަނު ކާމިޔާބު އަދި ގިނަ ބައެއްގެ މަޤްބޫލުކަން ހޯދާފައިވާ ތިމަރަފުށީ ފުޓްސަލް ޓީމަށް، މިފަހަރުގެ މުބާރާތުގައި ފުރިހަމަ ކާމިޔާބީއަކަށް އެދި ނިއުރޭޑިއަންޓްގެ ޗެއާމަން އަޙުމަދު މުބީން ހިތްވަރު ދެއްވައިފިއެވެ. މުބީން ވަނީ ތިމަރަފުށީގެ ޓީމަކީ އޭނާގެ އެންމެ ފޭވަރިޓް ޓީމުކަން ފާހަގަކުރައްވައި، މުބާރާތުގެ ތަށި އެ ރަށަށް ގެންދިއުމަށް ކުރާ މަސައްކަތުގައި ބަރަކާތް ލެއްވުމަށް އެދި ދުޢާކުރައްވާފައެވެ.

ސޯސަލް މީޑިއާއަށް ދޫކޮށްލެއްވި މެސެޖުގައި މުބީން ބުނެފައިވަނީ ތިމަރަފުށީ ޓީމަކީ ދިވެހި ފުޓްސަލްގެ "ސްޓާރުން" ކަމުގައި ބެލެވޭ ހުނަރުވެރި ކުޅުންތެރިންތަކެއް ހިމެނޭ ޓީމެއްކަމުގައި ފާހަގަކޮށްފައެވެ. އެގޮތުން ރާއްޖޭގައި އުފެދުނު އެންމެ މޮޅު ފުޓްސަލް ކުޅުންތެރިންގެ ތެރޭގައި ހިމެނޭ ގަބޭ އަކީ އެ ޓީމުގެ އެންމެ މުހިންމު އެއް ތަނބުކަމަށް ފާހަގަކޮށް،  ރޮނާ، އަފްލާޒް، މުނީޒް، އާދަންނާ އަދި ސިނާ ފަދަ ކުޅުންތެރިންނަކީ ދަނޑުމަތީގައި ދައްކާ ހަލުވި ކުޅުމާއި ޓީމުވޯކްގެ ސަބަބުން އިދިކޮޅު ޓީމުތަކަށް ހުއްޓުވަން އުނދަގޫ ކުޅުންތެރިންގެ ގޮތުގައި ފާހަގަކޮށްފައިވެއެވެ.

Ad by Hajj Corporation

އަދި ޓީމުގެ ކޯޗު އިބްރާހީމް ޝަރީފް (އިއްސެ) އަކީ ޓީމު ރޭވުމުގައާއި ކުޅުންތެރިންގެ ކިބައިން އެންމެ ރަނގަޅު ކުޅުން ނެރުވުމުގައި ފާހަގަކޮށްލެވޭ ހުނަރުވެރި ކޯޗެއްގެގޮތުގައި ފާހަގަކުރެއްވިއެވެ.

ތިމަރަފުށީ ޓީމުން މީގެ ކުރިންވެސް ވަނީ ގޯލްޑަން ފުޓްސަލް ޗެލެންޖް ފަދަ ބޮޑެތި މުބާރާތްތަކުގައި ރަށަށް ރީތި ނަން ހޯދައިދީފައެވެ. ތިމަރަފުށީގެ ފޯރިއާއި، ކުޅުންތެރިންގެ ހުނަރާއެކު މިފަހަރުގެ މުބާރާތުގައި ވެސް ކާމިޔާބީއެއް ހޯދުމަކީ ހުރިހާ ސަޕޯޓަރުންގެ ބޮޑު އުންމީދެކެވެ.

"ތިމަރަފުށީ ފުޓްސެލް ޓީމަށް މިފަހަރުގެ މުބާރާތުގައި ފުރިހަމަ ކާމިޔާބީއަކަށް އެދެން. ތަށި ތިމަރަފުއްޓަށް ގެންދިއުމަށް ކުރާ މަސައްކަތުގައި ކާމިޔާބު މިންވަރު ކުރައްވާށި. އާމީން!" މުބީން ވިދާޅުވިއެވެ.