ދިޔަވަރު ބޮޑުވާ ވަގުތުތަކުގައި އުދަ އަރާފާނެތީ ސަމާލުވުމަށް މޫސުމާ ބެހޭ ގައުމީ އިދާރާއިން އެދެފިއެވެ.

ހުޅަނގު މޫސުމުގެ ބާރު ގަދަވެ، ރާއްޖޭގެ އެކި ހިސާބުތަކަށް ދަނީ ބޯކޮށް ވާރޭވެހެމުންނެވެ. އެކަމާ ގުޅިގެން މޫސުމުގެ ސަމާލު، މޫސުމާ ބެހޭ އިދާރާއިން ދަނީ ނެރެމުންނެވެ.

އެގޮތުން މިއަދު އެ އިދާރާއިން ނެރުނު ސަމާލުގައި ވަނީ ދިޔަވަރު ބޮޑުވާ ވަގުތުތަކުގައި އުދަ އަރާފާނެތީ ސަމާލުވުމަށް އިލްތިމާސްކޮށްފައެވެ. އެގޮތުން އުދަ އަރާފާނެ ކަމަށް ބަލައި، ގެދޮރު އަދި މުދާ ރައްކާތެރިކުރުމަށް ސަމާލުކަން ދިނުމާއި، ވެލި ބަސްތާ ޖެހުން ފަދަ ކަންކަން ކުރުމަށް އިދާރާތަކުން އިލްތިމާސްކުރެއެވެ.

އެ ސަމާލުގައި އެ އިދާރާއިން ވަނީ، ކަނޑުތައް ވެސް ގަދަވާނެތީ ދަތުރުފަތުރު ކުރުމުގައި ސަމާލުވުމަށް އިލްތިމާސްކޮށްފައެވެ. އެގޮތުން އުތުރާއި މެދު ރާއްޖޭގެ ކަނޑުތައް ގަދަވާނެ ކަމަށާއި، ދެކުނުގެ އަތޮޅުގެ ކަނޑުތައް އާދައިގެ ވަރަކަށް ގަދަވެފައި، ވިލާގަނޑުގައި އިތުރަށް ގަދަވާނެ ކަމަށް އެ އިދާރައިން ލަފާކުރެއެވެ.

ވަޔަށް ބަލާއިރު، އުތުރާއި މެދު ރާއްޖޭގެ ބައެއް އަތޮޅުތަކަށް 13 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެ އިރު، ދެކުނުގެ އަތޮޅުތަކަށް ވައި ޖެހޭނެ ކަމަށް ލަފާކުރެވެނީ 10 މޭލާއި 20 މޭލާ ދެމެދުގެ ބާރުމިނުގައެވެ. އެހެން ނަމަވެސް ވިލާގަނޑުގައި 45 މޭލަށް ވައިގަދަވާނެ ކަމަށް ލަފާކުރެވެއެވެ.