އެމްޑީޕީގެ ދެ ވެރިކަމުގައިވެސް ރާއްޖޭގެ އިގްތިސޯދަށް ފައިދާވާނެ ކަމެއް ކޮށްފައިނުވާ ކަމަށް ޕީއެންސީގެ ޕާލިމެންޓްރީ ލީޑަރު އިބްރާހިމް ފަލާހު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރުކަން ވެސް ކުރައްވާ ފަލާހު މިހެން ވިދާޅުވީ ލޯކަލް ކައުންސިލް އިންތިހާބު އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބަށް ކުޅުދުއްފުށިން ވާދަކުރާ ޕީއެންސީ ކެންޑިޑޭޓުންގެ ކެމްޕޭން އިފްތިތާހުކުރުމުގެ ޖަލްސާގައި ވާހަކަދައްކަވަމުްނެވެ.

Ad by Hajj Corporation

ފަލާހު ވިދާޅުވީ އެމްޑީޕީގެ ސަރުކާރުގައި ތަރައްގީގެ އެއްވެސް ބޮޑު މަޝްރޫއެއް ކުރިއަށް ގެންގޮސްފައިނުވާ ކަމަށާއި، ނިމުނު މަޝްރޫއެއްވެސް ނެތްކަމަށެވެ. އަދި ތިލަމާލޭގެ ބުރިޖުގެ މަސައްކަތް ފެށި ނަމަވެސް އެ މަޝްރޫއުގެ މަސައްކަތް ކުރިއަށްދިޔައީ ރޭވުންތެރިކަމެއްނެތް ގޮތަކަށް ކަމުގައި ވިދާޅުވިއެވެ.

މީގެ އިތުރުން ސަރުކާރުން ރަށްރަށުގައި ފަށައިފައިވާ ތަރައްގީގެ މަޝްރޫއުތައް ކުރިއަށް ގެންދަން ކައުންސިލްތަކުގެ އެހީތެރިކަން ވަރަށް ބޮޑަށް މުހިންމުވާނެކަން ފާހަގަކުރައްވާ ފަލާހު ވިދާޅުވީ ފާއިތުވި 17 އަހަރު ކުޅުދުއްފުށި ރައްޔިތުން ވަނީ އެމްޑީޕީ ޓެސްޓު ކޮށްފައި ކަމަށާއި، އެހެންކަމުން މިފަހަރު ޕީއެންސީގެ ކައުންސިލެއް އިންތިހާބުކޮށްދިނުމަށްކަމަށް ފަލާހު އެދިވަޑައިގެންނެވިއެވެ.

ފަލާހު ވަނީ ޕީއެންސީގެ ކެންޑިޑޭޓުން، ރަށުގެ ރައްޔިތުންގެ މާޔޫސް ނުކުރާނެކަމުގެ ޔަގީންކަން ވެސް ދެއްވާފައެވެ.