އެމެރިކާގެ ނުފޫޒުގަދަ، ނަމަވެސް ޖިންސީ ކުށްތަކުގެ ތުހުމަތުގައި ހައްޔަރުކޮށްފައި ހުއްޓާ މަރުވި ޖެފްރީ އެޕްސްޓީންގެ އެކައުންޓެއް މިހާރު އޮންލައިންވެ، އިސްރާއީލުގައި ހުރެގެން އޮންލައިން ގޭމެއް ކަމަށްވާ "ފޯޓްނައިޓް" ކުޅެމުންދާ ކަމަށް ބުނެ ފެތުރެމުންދާ ވާހަކަތަކަކީ ހަގީގަތާ ހިލާފު ދޮގު ވާހަކަތަކެއްކަން ހާމަވެއްޖެއެވެ.

ފާއިތުވި 24 ގަޑިއިރުގެ ތެރޭގައި ސޯޝަލް މީޑިއާގެ އެކި މަންސަތަކުގައި ވަރަށް ބޮޑަށް ވައިގައި ހިފާފައިވާ މި "ވައިރަލް ހޯކްސް" ނުވަތަ އޮޅުވާލުމާ ގުޅޭގޮތުން ކުރެވުނު ތަހުގީގުތަކުން އެނގިފައިވާ ގޮތުގައި، މިއީ މީހުންގެ ސަމާލުކަން ހޯދުމަށް ގަސްތުގައި ބަޔަކު ރާވައިގެން ހިންގާފައިވާ އަމަލެކެވެ.

Ad by Hajj Corporation

މިކަމުގެ އަސްލު ހަގީގަތް ބަލާއިރު، މިހާރު ފެންނަން އުޅޭ "littlestjeff1" ނަމަކަށް ކިޔާ އެކައުންޓަކީ އެޕްސްޓީންގެ އެކައުންޓެއް ނޫނެވެ. ފޯޓްނައިޓް އުފައްދާ ކުންފުނި ކަމަށްވާ "އެޕިކް ގޭމްސް" އިން ހާމަކުރި ގޮތުގައި، ކުޅުންތެރިއަކު އޭނާގެ ކުރީގެ ޔޫޒަރނޭމް މި ނަމަށް ބަދަލުކޮށްފައިވަނީ މީގެ މަދު ދުވަސްކޮޅެއް ކުރިންނެވެ. އޭނާ މިކަން ކުރީ ދާދިފަހުން އާންމުކުރި އެޕްސްޓީންގެ ލިޔެކިޔުންތަކުގައި އެ ނަން އޮތުމުން، ސޯޝަލް މީޑިއާގައި ސަމާލުކަން ހޯދުމުގެ މަގްސަދުގައެވެ.

އާންމުކުރި ލިޔެކިޔުންތަކުގައި "littlestjeff1" މި ނަން އޮތް ނަމަވެސް، އެއީ އެޕްސްޓީންގެ އަމިއްލަ އެކައުންޓެއް ނޫންކަން ވަނީ ކަށަވަރުވެފައެވެ. އެ ލިޔުންތަކުން އެނގޭ ގޮތުގައި އެއީ އެޕްސްޓީންގެ ގާތް މީހެއްގެ އާއިލާ ކުއްޖަކު ބޭނުންކުރި އެކްސްބޮކްސް (Xbox) އެކައުންޓެކެވެ. އަދި އެ އެކައުންޓުން ކޮށްފައިވާ ވިޔަފާރިތަކަކީ ވެސް 2018 އާއި 2019 އާ ދެމެދު އެ ކުއްޖާއަށް ގަނެދީފައިވާ ފޯޓްނައިޓްގެ "ވީ-ބަކްސް" ތަކެކެވެ.

މީގެ އިތުރުން، އެ ނަން ބޭނުންކުރާ ކުޅުންތެރިޔާ އޭނާގެ ލޮކޭޝަން "އިސްރާއީލް" އަށް ބަދަލުކޮށް، ޕްރޮފައިލްގައި އިސްރާއީލުގެ ދިދަ ޖަހާފައިވަނީ ވެސް ގަސްތުގައެވެ. މިއީ މިހާރު ފެތުރެމުންދާ އެކި ކޮންސްޕިރަސީ ތިއަރީތަކާ ގުޅުވައިގެން، މީހުންގެ މެދުގައި ބޮޑު އޮޅުންބޮޅުމެއް އުފެއްދުމަށް އޭނާ ރާވައިގެން ކުރި ކަމެއް ކަމަށް ބެލެވެއެވެ.

އެޕިކް ގޭމްސް އިން ރަސްމީކޮށް މިކަން ދޮގުކުރަމުން ބުނެފައިވަނީ، ޖެފްރީ އެޕްސްޓީންއާ ގުޅުންހުރި އެއްވެސް އީމެއިލް އެޑްރެހަކުން ފޯޓްނައިޓް އެކައުންޓެއް ހިންގަމުން ނުދާ ކަމަށެވެ. އަދި މިއީ ހަމައެކަނި ސަމާލުކަން ހޯދުމަށް ކުޅުންތެރިއަކު ހިންގާފައިވާ އޮޅުވާލުމެއް ކަމަށް އެ ކުންފުނިން ވަނީ ބުނެފައެވެ.

ޖެފްރީ އެޕްސްޓީން މަރުވެފައިވަނީ 2019 ވަނަ އަހަރުއެވެ. އެހެންކަމުން، މިހާރު ފެންނަން އުޅެނީ ބޮޑެތި ޚަބަރުތަކުގެ ނަން ބޭނުންކޮށްގެން އިންޓަނެޓުގައި މީހުން "ޓްރޯލް" ކުރުމުގެ ގޮތުން ހިންގާފައިވާ އާދައިގެ ކަމެއްކަން ވަނީ ޔަގީންވެފައެވެ.