މައުލޫމާތު ހޯދުމަށް ހުށަހެޅި މައްސަލައެއްގެ ބައްދަލުވުމަށް އިސްލާމިކް މިނިސްޓްރީން ހާޒިރު ނުވި މައްސަލާގައި އެ މިނިސްޓްރީ ޖޫރިމަނާ ކުރުމުން، މިނިސްޓަރު ޑރ. މުހައްމަދު ޝަހީމް އަލީ ސައީދު އެކަމަށް ރައްދު ދެއްވައިފިއެވެ.

އިންފޮމޭޝަން ކޮމިޝަނަރުގެ އޮފީހުން (އައިކޮމް) މިއަދު ވަނީ އެ މިނިސްޓްރީ 700 ރުފިޔާއިން ޖޫރިމަނާކޮށްފައެވެ.

Ad by Hajj Corporation

މި މައްސަލައާ ގުޅިގެން މިނިސްޓަރު ޝަހީމް ވިދާޅުވީ އިސްލާމިކް މިނިސްޓްރީއަކީ މައުލޫމާތު ހާމަކުރުމަށް ވަރަށް ބޮޑު އިސްކަމެއްދޭ، އަދި އެކަމާ ގުޅޭ ގާނޫނުތަކަށް ފުރިހަމައަށް އިހުތިރާމްކުރާ އިދާރާއެއް ކަމަށެވެ. މިނިސްޓަރު ފާހަގަކުރެއްވި ގޮތުގައި އެ މިނިސްޓްރީއަކީ އަބަދުވެސް މީޑިއާއާ ގާތް ގުޅުމެއް ބާއްވާ ތަނެކެވެ.

"މިހާތަނަށް ވެސް މިނިސްޓްރީއަށް ހުށަހެޅެމުންދާ އެންމެހައި ހުށަހެޅުންތަކަށް ގާނޫނުގައިވާ ގޮތުގެ މަތިން ޖަވާބުދެމުންދާ މިނިސްޓްރީއެއް. މީޑިއާއާ ނުހަނު ގާތްކަން ބާއްވާ މިނިސްޓްރީއެއް. މިނިސްޓްރީ ދެމިއޮންނާނީ އެގޮތުގައި،" މިނިސްޓަރު ވިދާޅުވިއެވެ.

އައިކޮމުން އިސްލާމިކް މިނިސްޓްރީ ޖޫރިމަނާކުރީ މައުލޫމާތު ހޯދުމަށް ހުށަހެޅި ދެ ހުށަހެޅުމަކަށް މައުލޫމާތު ނުދިނުމާއި، އެ ޝަކުވާތައް ބަލަން ތާވަލުކުރި ބައްދަލުވުމަށް ހާޒިރުނުވުމުންނެވެ. އައިކޮމުން ބުނި ގޮތުގައި މިއީ އިންފޮމޭޝަން ކޮމިޝަނަރުގެ ގާނޫނީ ވާޖިބު އަދާކުރުމަށް އެޅުނު ހުރަހެކެވެ. މީގެ ކުރިން ވެސް ބައްދަލުވުންތަކަށް ހާޒިރުނުވާ ބައެއް އިދާރާތައް ޖޫރިމަނާކޮށްފައިވެއެވެ.

މިނިސްޓަރު ޝަހީމް އިތުރަށް ވިދާޅުވީ، ވޭތުވެދިޔަ ދެ އަހަރު ދުވަހުގެ ތެރޭގައި މިނިސްޓްރީއަށް ހުށަހެޅުނު ކަންކަމާއި އެ ކަންކަމަށް ޖަވާބު ދީފައިވާ ތަފްސީލީ އަދަދުތައް މާދަމާ ހާމަކުރައްވާނެ ކަމަށެވެ. މީގެ ބޭނުމަކީ މިނިސްޓްރީގެ ދެފުށް ފެންނަ މިންވަރު ސާފުކޮށްދިނުން ކަމަށް ބެލެވެއެވެ.