ބާސެލޯނާގެ ރިޔާސީ އިންތިޚާބު ގެ ވޯޓުލުން ފަށާފައިވާއިރު ކްލަބުގެ ކުރިމަގާއި މިހާރު ކުރިއަށްދާ މަޝްރޫޢުތަކާ މެދު ވަނީ ނުތަނަވަސްކަން އުފެދިފައެވެ. އައު ރައީސަކު އިންތިޚާބުވެއްޖެނަމަ ކްލަބުގެ ކަންކަން ބަދަލުވެގެންދާނެ ގޮތަކާ މެދު މިހާރު ވަނީ ސުވާލު އުފެދިފައެވެ.

މިހާރުގެ ރައީސް ޖޮއާން ލަޕޯޓާގެ ދައުރުގައި ގޮންޖެހުންތަކެއް ހުރި ނަމަވެސް، ކްލަބަށް ކުރިމަތިވެފައިވާ މާލީ ދަތިތަކުން އަރައިގަތުމަށް އޭނާ ވަނީ މުހިންމު މަސައްކަތްތަކެއް ކޮށްފައެވެ. ޒުވާން ކުޅުންތެރިންގެ މައްޗަށް ބިނާކޮށް ވަރުގަދަ ޓީމެއް އެކުލަވާލައި، ބާސެލޯނާ އަލުން ބޮޑެތި މުބާރާތްތަކުގެ ވާދަވެރިކަމަށް އޭނާ ވަނީ ގެނެސްދީފައެވެ.

Ad by Hajj Corporation

ކޯޗު ހަންސީ ފްލިކް އަކީ ލަޕޯޓާގެ މި މަޝްރޫޢުގެ އެންމެ މުހިންމު އެއް ތަނބެވެ. ފްލިކް އަކީ ލަޕޯޓާގެ ފުރިހަމަ އިތުބާރު އޮތް ކޯޗަކަށް ވާއިރު، އިންތިޚާބުގެ ނަތީޖާއަކީ ފްލިކްގެ މުސްތަޤުބަލާ ސީދާ ގުޅިފައިވާ ކަމެކެވެ. ފްލިކް އަމިއްލައަށްވެސް ދެކެނީ އޭނާއަކީ ލަޕޯޓާގެ ޕްރޮޖެކްޓުގެ ބައެއްގެ ގޮތުގައެވެ.

މާކާ (MARCA) އިން ރިޕޯޓްކޮށްފައިވާ ގޮތުގައި، ހަންސީ ފްލިކް ހުރީ ޑެކޯ އަދި ލަޕޯޓާގެ އިރުޝާދުގެ ދަށުން މަސައްކަތް ކުރުމަށް ވަރަށް ހިތްހަމަޖެހިފައެވެ. އަދި ލަޕޯޓާ އަލުން އިންތިޚާބުވެއްޖެނަމަ، ކެޓަލޯނިއާގައި މަޑުކުރުމުގެ މުއްދަތު އިތުރުކުރުމަށްވެސް އޭނާ ހުރީ ތައްޔާރަށެވެ. މީގެ އިތުރުން ޖޮއާން ލަޕޯޓާއަށް ނާކާމިޔާބުވެއްޖެނަމަ ފްލިކް ބާސާދޫކޮށްލާނެކަމަށް މަޝްހޫރު ޖާނަލިސްޓް ފަބްރީޒިއޯވެސް ވަނީ ރިޕޯޓްކޮށްފައެވެ.

މިކަމާ ގުޅޭގޮތުން ކޯޗާއި ރައީސާ ދެމެދު މިހާރުވެސް މަޝްވަރާ ކުރެވިފައިވާ ކަމަށް މަޢުލޫމާތު ލިބެއެވެ. ނަމަވެސް، ލަޕޯޓާ އިންތިޚާބު ކާމިޔާބުކޮށް ރަސްމީކޮށް މަޤާމާ ހަވާލުވާ ޖުލައި 1 ގެ ކުރިން މިކަމާ ގުޅޭ އެއްވެސް ރަސްމީ އިޢުލާނެއް ނުކުރާނެއެވެ.