ފުޓްބޯޅަ ކްލަބް ބާސެލޯނާގެ މާލީ ހާލަތު ރަނގަޅުކުރުމަށްޓަކައި، ޔުނައިޓެޑް އެރަބް އެމިރޭޓްސް (ޔޫއޭއީ) ގެ އިންވެސްޓަރުންނާ ގުޅިގެން ދުބާއީގައި ބޮޑު މަޝްރޫއެއް ފެށުމަށް ތައްޔާރުވަމުންދާކަން ހާމަވެއްޖެއެވެ. މި މަޝްރޫއުގެ ދަށުން ދުބާއީގައި ބާސެލޯނާގެ ނަމާއި ބްރޭންޑް ހިމެނޭހެން މަތީ ފަންތީގެ މީހުން ދިރިއުޅޭ ރެސިޑެންޝަލް ކޮމްޕްލެކްސްތަކެއް ބިނާކުރުމަށް ވަނީ ރޭވިފައެވެ.

މި އެއްބަސްވުމުގެ ދަށުން ދުބާއީގައި އުސް އިމާރާތްތަކާއި، ލަގްޒަރީ އެޕާޓްމަންޓްތަކުގެ އިތުރުން ކޮމިއުނިޓީ ފެސިލިޓީތައް ބިނާކުރެވޭނެއެވެ. މި ހުރިހާ ތަނެއްގައިވެސް ބާސެލޯނާގެ އެމްބްލަމް ނުވަތަ ލޯގޯ ބޭނުންކުރާނެއެވެ. މިއީ ހަމައެކަނި ނަން ބޭނުންކުރުމުގެ ހުއްދަ ދިނުމުގެ ބަދަލުގައި، ކްލަބްގެ ބްރޭންޑް ދުނިޔޭގެ ބާޒާރުގައި އިތުރަށް ވަރުގަދަކުރުމަށް ކުރިއަށްގެންދާ ފުޅާ މަޝްރޫއެކެވެ.

Ad by Hajj Corporation

މި މަޝްރޫއުގެ ސަބަބުން ބާސެލޯނާއަށް އަހަރަކު 10 މިލިއަން ޔޫރޯ އަށްވުރެ ގިނަ އާމްދަނީއެއް ލިބޭނެ ކަމަށް ބެލެވެއެވެ. މިއީ އިނގިރޭސި ކްލަބް ޗެލްސީން ޑަމާކް (DAMAC) އާ ގުޅިގެން ކުރިއަށްގެންދާ 'ޗެލްސީ ރެސިޑެންސަސް' މަޝްރޫއާ އެއްގޮތް ކޮންސެޕްޓެކެވެ. މީގެ އިތުރުން، އަންނަ ޖުލައި މަހުން ފެށިގެން ކްލަބްގެ ޖާޒީގެ ފަހަތުގައި އޮންނަ ޔޫއެންއެޗްސީއާރު (UNHCR) ގެ ލޯގޯގެ ބަދަލުގައި މި އިންވެސްޓްމަންޓާ ގުޅޭ ލޯގޯއެއް ބޭނުންކުރުމަށްވެސް ވަނީ ހަމަޖެހިފައެވެ.

ބާސެލޯނާގެ ރައީސް ޔޮއާން ލަޕޯޓާ މިދިޔަ ޑިސެމްބަރު މަހު ދުބާއީއަށް ކުރެއްވި ޒިޔާރަތުގައި މި މަޝްރޫއުގެ ބިންގާ ވަނީ އަޅުއްވާފައެވެ. އަދި އިންވެސްޓްމަންޓްގެ ބައެއް ފައިސާ މިހާރުވެސް ކްލަބަށް ލިބިފައިވާ ކަމަށް ރިޕޯޓްތައް ބުނެއެވެ. ނަމަވެސް، މި އެއްބަސްވުން ރަސްމީކޮށް އިއުލާންކުރެވޭނީ ކްލަބްގެ މެންބަރުންގެ މަޖިލީހުން (socios) މިކަމަށް ފައިނަލް ހުއްދަ ދިނުމުންނެވެ.

މާލީ ދަތިތަކާ ކުރިމަތިލާން ޖެހިފައިވާ ބާސެލޯނާއަށް މި ސީޒަނުގައި ޔޫއެފާ ޗެމްޕިއަންސް ލީގުގެ ގްރޫޕް ސްޓޭޖުން ކުރިހޯދައި، ގަދަ 16 އަށް ދަތުރުކުރުމުން މިހާތަނަށް 87 މިލިއަން ޔޫރޯގެ އާމްދަނީއެއް ވަނީ ކަށަވަރުވެފައެވެ. މީގެ ތެރޭގައި ބްރޯޑްކާސްޓިން މާކެޓް ވެލިއުއާއި ތާރީޚީ ރޭންކިންއަށް ބަލައި ޔޫއެފާއިން ދޭ 35.38 މިލިއަން ޔޫރޯވެސް ހިމެނެއެވެ.

ކުރިއަށް އޮތް މުބާރާތުގެ މަރުހަލާތަކުން ކާމިޔާބީ ހޯދައިފިނަމަ ބާސެލޯނާއަށް އިތުރު ބޮޑެތި ފައިސާގެ އިނާމުތައް ލިބޭނެއެވެ. އެގޮތުން ކުއާޓާ ފައިނަލަށް ދިއުމުން 12.5 މިލިއަން ޔޫރޯ، ސެމީ ފައިނަލަށް 15 މިލިއަން ޔޫރޯ، އަދި ފައިނަލަށް ހޮވިއްޖެނަމަ 18.5 މިލިއަން ޔޫރޯ ލިބޭނެއެވެ. މުބާރާތުގެ ޗެމްޕިއަންކަން ހޯދައިފިނަމަ އިތުރު 6.5 މިލިއަން ޔޫރޯއާއެކު، ސުޕަ ކަޕާއި އެހެނިހެން ބޯނަސްތަކުން ބޮޑު އާމްދަނީއެއް ލިބުމުގެ ފުރުސަތު އެބައޮތެވެ.
މިއީ މީގެ ފަސް އަހަރުކުރިން ދަރަނީގެ ޝިކާރައަކަށްވެ، ބަނގުރޫޓުވާ ހިސާބަށް ކުލަބުގެ މާލީކަންކަންގޮސް.، ޓްރާންސްފާ މާކެޓުގައި ތަޅުއެޅުވިފައިވާ ކުލަބަށް މާލީ ދަތިކަމުން ސަލާމަތްވެ ކުރިޔަށްދިޔުމަށް ލިބިފައިވާ ރަނގަޅު ފުރުސަތެކެވ.