މާލޭ ސިޓީގެ ވަށަމަގު ކަމަށްވާ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ ދެވަނަ ފިޔަވަހީގެ މަސައްކަތުގެ ތެރެއިން ބާޒާރުމަތި ހިމެނޭ ސަރަޙައްދުގެ މަގުގައި ތާރުއެޅުމުގެ މަސައްކަތް ނިންމާލައިފިއެވެ.

އެ ސަރަޙައްދުގައި ތާރު އަޅާ ނިންމާލީ ރޭގައެވެ. އެ ސަރަޙައްދު އާއްމު ދަތުރުފަތުރަށް އަންނަ ހަފުތާގެތެރޭގައި ހުޅުވާލުމަށް ދަނީ ތައްޔާރުވަމުންނެވެ.

އެ ސަރަޙައްދުގެ މަގެހެދުމުގެ މަސައްކަތްތައް ފެށީ 2025 ވަނަ އަހަރުގެ ޑިސެންބަރު މަހުގެ މެދުތެރޭގައެވެ.

ކުރިއަށް އޮތް ރަމަޟާން މަހުގެ ކުރިން ބާޒާރު މަތީ ސަރަޙައްދުގެ މަގު، ތާރު އަޅާ ޒަމާނީ ފެންވަރަށް ތަރައްޤީކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަރަށް މުހިންމު ވަޢުދެކެވެ.

މި މަސައްކަތް މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮމްޕެނީ - އެމްޓީސީސީން ކުރިއަށްގެންދަނީ ބޮޑުތަކުރުފާނުމަގު ތަރައްޤީކުރުމުގެ ދެވަނަ ފިޔަވަހީގެ ދަށުންނެވެ. މިބައިގައި ހިމެނެނީ ލޯކަލް މާރުކޭޓުން ފެށިގެން ނޯތު ހާބަރު ފެށޭ ހިސާބަށެވެ.

އެގޮތުން 260 މީޓަރުގެ ސަރަޙައްދުގައި ވަނީ ތާރު އަޅާފައެވެ. އެމްޓީސީސީން ބުނީ މުޅި މަޝްރޫޢުގެވެސް ބޮޑު އިންސައްތައެއްގެ މަސައްކަތް މިހާރު ނިންމާފަވާކަމަށެވެ. ތާރުގެ މަސައްކަތަށްފަހު ދެން ކުރިއަށްދާނީ މަގުގައި ޓްރެފިކް ނިޝާންތައް ކުރެހުމާއި ބޯޑުތައް ހަރުކުރުމުގެ މަސައްކަތެވެ. އަދި ޔުޓިލިޓީ ނެޓްވޯކްގެ ބައެއް މަސައްކަތްތައް ކުރިއަށްދާނެއެވެ.

Ad by Hajj Corporation

ތާރު އަޅާ ޒަމާނީ ފެންވަރަށް މަގު ތަރައްގީކުރަމުންދާއިރު، ޒަމާނީ ބޮޑެތި ބަދަލުތަކެއް އެ ސަރަޙައްދަށް އަންނާނެއެވެ. އަދި ބަނދަރުގެ އެއްގަމު ތޮށި ގާތްގަނޑަކަށް 6 މީޓަރަށް ބޭރަށް ޖައްސާ، މަގުގެ ފުޅާމިން 14 މީޓަރަށް ވަނީ އިތުވެފައެވެ. މަގު ތަރައްގީކޮށްފަވަނީ 4 ލޭނަށެވެ.

މި މަސައްކަތުގައި ހިމަނައިގެން ބާޒާރުމަތީ ސަރަޙައްދު ބަނދަރު އެއްގަމު ތޮށިވެސް ވަނީ ތަރައްގީކޮށްފައެވެ. އެގޮތުން ބަނދަރުގެ 260 މީޓަރުގެ އެއްގަމު ތޮށި ވަނީ ބަދަލުތަކާއެކު މުޅިން އަލުން ތަރައްޤީކޮށްފައެވެ.

ބޮޑުތަކުރުފާނު މަގު ތަރައްގީކުރުމުގެ މަސައްކަތުގެދަށުން ފުރަތަމަ ފިޔަވަހީގެ ފުރަތަމަ ސެގްމަންޓްގައި ހިމެނޭ 140 މީޓަރުގެ މަސައްކަތް ނިންމާލާ، އެ ސަރަޙައްދު ބޭނުންކުރަން ހުޅުވާލީ ޑިސެމްބަރު މަހުގެ ތެރޭގައެވެ.