ޖަރުމަނުވިލާތުގެ ރައީސް ފްރޭންކް-ވޯލްޓަރ ޝްޓައިންމަޔަރގެ ރަސްމީ ދަޢުވަތަކަށް އެ ޤައުމަށް ކުރައްވަމުންގެންދަވާ ދަތުރުފުޅުގެ ތެރެއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޖަރމަން ކައުންސިލް އޮން ފޮރިން ރިލޭޝަންސް (ޑީ.ޖީ.އޭ.ޕީ) އަށް ޒިޔާރަތްކުރައްވައި، ކަނޑުތައް ބެލެހެއްޓުމާ ގުޅޭގޮތުން ރާއްޖެއިން ގެންގުޅޭ މުހިންމު ސިޔާސަތުތައް ހާމަކުރައްވައިފިއެވެ.

ޑީ.ޖީ.އޭ.ޕީ އަށް ރައީސުލްޖުމްހޫރިއްޔާ ކުރެއްވި މި ޒިޔާރަތުގައި އެމަނިކުފާނަށް މަރުޙަބާ ދެންނެވީ އެ ކައުންސިލްގެ ނައިބު ރައީސް ރޮލްފް ނިކެލް އާއި، ޑިރެކްޓަރ ތޯމަސް ކްލައިން-ބްރޮކްހޯފްގެ އިތުރުން ސެންޓަރ ފޯ ކްލައިމެޓް އެންޑް ފޮރިން ޕޮލިސީގެ ހެޑް ޑޮކްޓަރ ކިރާ ފިންކަރ އެވެ.

Ad by Hajj Corporation

މި ބައްދަލުވުމުގައި ދެއްވި ތަޤުރީރުގައި ރައީސް މުޢިއްޒު ވިދާޅުވީ، މޫސުމީ ތަންޒީމާއި، ހަޔަވީ ސިންދަފާތާއި، އަދި ދުނިޔޭގެ ކާބޯތަކެތީގެ ރައްކާތެރިކަން ކަށަވަރުކުރުމުގައި ކަނޑުތަކަކީ ނުހަނު މުހިންމު ދައުރެއް އަދާކުރާ ތަނެއް ކަމަށެވެ. ނަމަވެސް، ބައިނަލްއަޤުވާމީ އިސްތިރާޖީ އަދި ޚާރިޖީ ފިކުރުތަކުގައި އެކަށީގެންވާ މިންވަރަކަށް ކަނޑުތަކުގެ މުހިންމުކަން ތަމްސީލުވެފައި ނުވާކަން އެމަނިކުފާނު ފާހަގަކުރެއްވިއެވެ.

ރާއްޖެއަކީ ތާރީޚީ، އިޤްތިޞާދީ އަދި ޘަޤާފީ ގޮތުން ކަނޑާ ލާމެހިފައިވާ ޤައުމެއްކަން ފާހަގަކުރައްވައި، މޫސުމަށް އަންނަ ބަދަލުތަކުގެ ސަބަބުން ދިވެހިންގެ ދިރިއުޅުމަށާއި އިޤްތިޞާދަށް ކުރިމަތިވެދާނެ ނުރައްކާތަކުގެ މައްޗަށް ރައީސް އަލިއަޅުއްވާލެއްވިއެވެ. އެމަނިކުފާނު ވިދާޅުވީ، ދުނިޔޭގެ ވިޔަފާރީގެ މައި މަގުތައް ބައްދަލުވާ ހިސާބެއްގައި ރާއްޖެ އޮތުމުން، ހިންދު ކަނޑަކީ 21 ވަނަ ޤަރުނުގެ އެންމެ މުހިންމު އެއް ސަރަހައްދު ކަމަށެވެ. އަދި ކަނޑުގެ އަޑީގެ ޑިޖިޓަލް ބިނާރުތައް ބެލެހެއްޓުމަށް ބައިނަލްއަޤުވާމީ އެއްބާރުލުން ބޭނުންވާކަންވެސް ފާހަގަކުރެއްވިއެވެ.

މީގެ އިތުރުން، ކުދި ޖަޒީރާ ޤައުމުތަކަކީ މިހާރު ބައިނަލްއަޤުވާމީ މިންގަނޑުތައް ބައްޓަންކުރުމުގައި މުހިންމު ދައުރެއް އަދާކުރާ ބައެއްކަމަށާއި، ކަނޑުތަކުގެ ރައްކާތެރިކަމަށްޓަކައި ޖަރުމަނުވިލާތާއި އެހެނިހެން ބައިވެރިންނާއެކު މަސައްކަތްކުރަން ރާއްޖެ ތައްޔާރަށް އޮތްކަމަށް ރައީސް ވިދާޅުވިއެވެ.

ތަޤުރީރަށްފަހު ކުރިމަތިވި ސުވާލުތަކަށް ޖަވާބުދެއްވަމުން ރައީސް މުޢިއްޒު ވިދާޅުވީ، ރާއްޖޭގެ ކަނޑުގެ ސަރަޙައްދު ބެލެހެއްޓުމުގެ ޤާބިލިއްޔަތު އިތުރުކުރުމަކީ ސަރުކާރުގެ ބޮޑު އިސްކަމެއް ކަމަށެވެ. އަދި މި މަސައްކަތް ކުރިއަށްދާނީ އަވައްޓެރި ޤައުމުތަކަށް ކުރާ އިޙުތިރާމާއި، ސަރަޙައްދީ ނަޒާހަތްތެރިކަމުގެ މައްޗަށް ބިނާވެގެން ކަމުގައިވެސް އެމަނިކުފާނު ވިދާޅުވިއެވެ.

ރާއްޖެއާއި ޖަރުމަނާ ދެމެދު އޮތް 60 އަހަރުވީ ގާތް ގުޅުމުގެ މައްޗަށް އަލިއަޅުއްވާލައްވަމުން، ގޮނޑުދޮށް ހިމާޔަތްކުރުން ފަދަ ދާއިރާތަކުން ދެ ޤައުމުގެ އެއްބާރުލުން އިތުރުކުރުމުގެ ފުރުޞަތު އޮތްކަން ރައީސުލްޖުމްހޫރިއްޔާ ވަނީ ބަޔާންކޮށްދެއްވާފައެވެ.