ޕްރިމިއާ ލީގުގައި ރޭ ކުޅުނު މެޗުގައި ސަންޑަލޭންޑްގެ ދަނޑުގައި އެޓީމު ބަލިނުވެ ދަމަހައްޓަމުން އައި ރެކޯޑް ނިމުމަކަށް ގެނެސް، ލިވަޕޫލުން މުހިންމު މޮޅެއް ހޯދައިފިއެވެ. ވާދަވެރި ކުޅުމަކަށްފަހު ލިވަޕޫލް މި މެޗުން މޮޅުވީ 1-0 ގެ ނަތީޖާއަކުންނެވެ.

މި މޮޅާއެކު ލިވަޕޫލް ވަނީ ގަދަ ހަތަރެއްގެ ރޭހުގައި ކުރިއަށް ޖެހިލާފައެވެ. އެންމެ ފަހުން މެންޗެސްޓާ ސިޓީއާ ދެކޮޅަށް ކުޅުނު މެޗުން ބަލިވި ނަމަވެސް، މި މޮޅާއެކު ލިވަޕޫލް މިހާރު އޮތީ ޗެމްޕިއަންސް ލީގު ޖާގައަކާ އެންމެ ތިން ޕޮއިންޓް ގާތުގައެވެ. މިއީ 2026 ވަނަ އަހަރު ފެށުނު ފަހުން ލީގުގައި ލިވަޕޫލަށް ލިބުނު ދެވަނަ މޮޅެވެ.

Ad by Hajj Corporation

މެޗުގެ ހަމައެކަނި ލަނޑު 61 ވަނަ މިނެޓުގައި ކާމިޔާބުކޮށްދިނީ ކެޕްޓަން ވާޖިލް ފެން ޑައިކް އެވެ. މުހައްމަދު ސަލާހް ނަގައިދިން ކޯނަރަކުން ފެން ޑައިކް މި ލަނޑު ޖެހީ ބޮލުންނެވެ. މިއީ ލިވަޕޫލްގެ ޑިފެންޑަރަކު އެ ކްލަބަށް ޕްރިމިއާ ލީގުގައި އެންމެ ގިނަ ލަނޑު ޖެހި ރެކޯޑް އޭނާ މުގުރާލި ލަނޑެވެ. 23 ލަނޑާއެކު އޭނާ މިހާރު ވަނީ ކުރީގެ ޑިފެންޑަރު ސާމީ ހޫޕިއާގެ ރެކޯޑް ފަހަނައަޅައި ގޮސްފައެވެ.

މެޗުގެ ކުރީކޮޅު ސަންޑަލޭންޑުން ލަނޑެއް ޖެހުމާ ގާތަށް ދިޔައެވެ. ނަމަވެސް ބްރަޔަން ބްރޮބީ ފޮނުވާލި ހަމަލާ ލިވަޕޫލްގެ އިބްރާހިމާ ކޮނާޓޭ ވަނީ ހުށިޔާރުކަމާއެކު ބްލޮކްކޮށްފައެވެ. އަނެއްކޮޅުން ލިވަޕޫލްގެ ފްލޯރިއަން ވާޓްޒް ފޮނުވާލި ބޯޅައެއް ގޯލުގެ އަރިމަތީ ދަނޑީގައި ޖެހުނުއިރު، އޭނާ ފޮނުވާލި އިތުރު ދެ ހަމަލާއެއް ސަންޑަލޭންޑްގެ ކީޕަރު ރޮބިން ރޫފްސް ވަނީ ދިފާއުކޮށްފައެވެ.

މި ނަތީޖާއާއެކު ސަންޑަލޭންޑުން އެޓީމުގެ އަމިއްލަ ދަނޑުގައި ބަލިނުވެ ދަމަހައްޓަމުން އައި 14 މެޗުގެ ސިލްސިލާ ވަނީ ނިމުމަކަށް އައިސްފައެވެ. މިއީ 2025 ވަނަ އަހަރުގެ މޭ މަހަށްފަހު އަމިއްލަ ދަނޑުގައި އެޓީމު ބަލިވި ފުރަތަމަ ފަހަރެވެ. ލިވަޕޫލުން މުޅި މެޗުގައި 23 ހަމަލާ އުފެއްދިއިރު، ފެން ޑައިކް ވަނީ ދިފާއީ ގޮތުންވެސް މުހިންމު ދައުރެއް އަދާކޮށް 14 ކްލިއަރެންސް ހަދާފައެވެ.