ކ.މާފުށީގައި އަލަށް ހިއްކި ސަރަޙައްދުގެ ފެނާއި ނަރުދަމާ ޤާއިމުކުރުމުގެ މަސައްކަތް މާލޭ ވޯޓަރ އެންޑް ސްވަރޭޖް ކޮމްޕެނީ އެމްޑަބްލިއުއެސްސީއާ ހަވާލުކޮށްފިއެވެ.

މިމަޝްރޫޢުގެ އިތުރުން މާފުށީގައި އޮތް ކުރީގެ ނަރުދަމާ، ޒަމާނީ ނިޒާމަކަށް ބަދަލުކުރުމުގެ މަސައްކަތްވެސް އެކުންފުންޏާ ވަނީ ހަވާލުކޮށްފައެވެ.

އިމާރަތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާގެ ފަރާތުން، ކ.މާފުށީގައި އަލަށް ހިއްކި ސަރަޙައްދުގައި ފެނާއި ނަރުދަމާ ޤާއިމުކޮށް، އެރަށުގައި އޮތް ކުރީގެ ނަރުދަމާ ނިޒާމު ބަދަލުކުރުމުގެ މަޝްރޫޢުގެ މަސައްކަތް ހަވާލުކޮށްފައިވަނީ މާލޭ ވޯޓަރ އެންޑް ސްވަރޭޖް ކޮމްޕެނީ އެމްޑަބްލިއުއެސްސީއާއެވެ.

މިކަމަށްޓަކައި ބޭއްވި ރަސްމިއްޔާތުގައި އިމާރަތްކުރުމާއި ގެދޮރުވެރިކަމާއި ބިނާރާބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޑރ. ޢަބްދުﷲ މުއްޠަލިބެވެ. އަދި އެމްޑަބްލިއުއެސްސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ޢަބްދުލްމަތީން މުޙައްމަދެވެ.

މި ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ މާފުއްޓަކީ ފުޅާ ދާއިރާއެއްގައި ރަށު ފަތުރުވެރިކަން ކުރިއަރާފައިވާ ރަށެއްކަމުން އެރަށުގައި އޮތް ދުވަސްވީ ނަރުދަމާ ބަދަލުކޮށް މިހާރު ދިމާވަމުންދާ މައްސަލަ ޙައްލުކުރުމަށް ސަރުކާރުން ޚާއްސަ އިސްކަމެއް ދެއްވާކަމަށެވެ. އަދި ހަމައެއާއެކު އެރަށުގެ އަލަށް މީހުން އާބާދުވަމުންދާ ސަރަޙައްދުގައިވެސް ވީހާވެސް އަވަހަށް މަސައްކަތްތައް ފެށުމަށްޓަކައި ޔޫޓިލިޓީގެ ޚިދުމަތްތައް އަވަހަށް ޤާއިމުކުރުމަކީ މުހިއްމުކަމެއްކަމަށް ވަޒީރު ވިދާޅުވިއެވެ.

Ad by Hajj Corporation

މާފުށީ ހިއްކި ސަރަޙައްދުގައި ނަރުދަމާ އެޅުމުގެ މަސައްކަތް ހަވާލުކޮށްފައިވަނީ، 128 މިލިއަނަށްވުރެ ގިނަ ރުފިޔާއަށް، 18 މަސް ދުވަހުގެ ތެރޭގައި ނިންމާގޮތަށެވެ. މިމަޝްރޫޢުގެ ދަށުން 1500 ޓަނުގެ ފެން އުފެއްދޭވަރުގެ 2 އާރްއޯ ޕްލާންޓް ބަހައްޓާ، 3500 ޓަނުގެ ފެން ރައްކާކުރެވޭވަރުގެ 2 ޓޭންކް ބަހައްޓާ ފެން ގުޅައިދިނުމުގެ މަސައްކަތް ކުރުން ހިމެނެއެވެ.

މާފުށީގައި އޮތް ނަރުދަމާ އަޕްގްރޭޑްކުރުމުގެ މަސައްކަތް ހަވާލުކޮށްފައިވަނީ 57 މިލިއަނަށްވުރެ ގިނަ ރުފިޔާއަށް 18 މަސްދުވަހުގެ ތެރޭގައި ނިންމާގޮތަށެވެ. މިމަޝްރޫޢުގެ ތެރެއިން ނަރުދަމާ ޕަމްޕިންގ ސްޓޭޝަން ބެހެއްޓުމާއި ނަރުދަމާ ޖަންކްޝަން ބެހެއްޓުމުގެ މަސައްކަތް ކުރުމަށްވަނީ ހަމަޖެހިފައެވެ.

މާފުށީގައި 25 ހެކްޓަރުގެ ސަރަޙައްދެއް ހިއްކާފައިވަނީ 2021 ވަނަ އަހަރުގައެވެ. އެސަރަޙައްދުން ގޯތި ލިބުނު ފަރާތްތަކަށް ބިން ދޫކޮށްފައިވާއިރު އަލަށް ހިއްކި ސަރަޙައްދުގައި ޔޫޓިލިޓީގެ ޚިދުމަތްތައް ޤާއިމުވެގެންދިޔުމަކީ އެރަށުގެ ރައްޔިތުންގެ އެންމެ ބޮޑު އުންމީދެވެ.