ސަރުކާރުން މުޅި ރާއްޖޭގެ ތަރައްގީއަށް ކުރިއަށް ގެންދަވާ ގިނަގުނަ މަޝްރޫޢުތަކުގެ ތެރޭގައި ހިމެނޭ ށ. ބިލެތްފަހި ބަނދަރު އަޕްގްރޭޑް ކުރުމުގެ މަޝްރޫޢުގެ ބޮޑުބައި ނިމި، މަޝްރޫޢު ނިމުމަކާ ގާތްވެއްޖެއެވެ.

މި މަޝްެރޫޢުގެ އަދާހަމަ ހިއްސާކުރަމުން ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާ އިން ބުނީ މި މަޝްރޫޢުގެ 93 އިންސައްތަ މަސައްކަތް މިހާރު ވަނީ ނިމިފައިވާކަމަށެވެ.

Ad by Hajj Corporation

ރައްޔިތުންގެ ކުންފުނި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އާ ހަވާލުކޮށްގެން ކުރިއަށްގެންދާ މި މަޝްރޫޢާއި ގުޅޭގޮތުން އެ ކުންފުނިން މަޢުލޫމާތު ދޭ ގޮތުގައި، މިހާރު މަޝްރޫޢުގެ ދަށުން ކުރިއަށްދަނީ ބަނދަރުގެ ބޭރުތޮށީގައި ހިލަ ޖެހުމުގެ އެންމެ ފަހުގެ މަސައްކަތްތަކެވެ.

ޖުމްލަ 47.09 މިލިއަން ރުފިޔާ ޚަރަދުކޮށްގެން ހިންގާ މި މަޝްރޫޢުގެ ދަށުން ބިލެތްފަހީގެ އުމްރާނީ ތަރައްޤީއަށް މުހިންމު ގިނަ މަސައްކަތްތަކެއް ކުރެވިގެންދާނެއެވެ. އޭގެ ތެރޭގައި ހިމެނެނީ:

• އައު ބަނދަރާއި ނެރު ފުންކުރުން
• ބޭރުތޮށި ޖެހުމާއި ރިވެޓްމެންޓް ޖެހުން
• ކީވޯލް ޖެހުމާއި މޫރިންގ ބްލޮކްސް ހަރުކުރުން
• ބަނދަރުގައި ރޭމްޕެއް ހެދުން
• ޕޭވްމެންޓް ހެދުމާއި ބަނދަރު ބައްތި ހަރުކުރުން

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރަށްރަށުގެ އުމްރާނީ ތަރައްޤީއަށް ދެއްވާ ޚާއްޞަ އިސްކަމުގެ ދަށުން ކުރިއަށްދާ މި މަޝްރޫޢު ނިމުމުން، ބިލެތްފަހީގެ ރައްޔިތުންނަށް ލަފާފުރުމުގައި ދިމާވާ ދަތިތަކަށް ދާއިމީ ހައްލެއް ލިބިގެންދާނެއެވެ.

މި މަޝްރޫޢަކީ އެ ރަށުގެ އިޤްތިޞާދީ އަދި އިޖުތިމާޢީ ކުރިއެރުމަށް މަގުފަހިވެގެންދާނެ މުހިންމު މަޝްރޫޢެކެވެ.