ޅިވަޕޫލުން މިސީޒަނަށް ކަނޑައަޅާފައިވާ ލަނޑުދަނޑިތައް ކޯޗު ހާމަކޮށްފިއެވެ.

ލިވަޕޫލްގެ ހެޑް ކޯޗު އާނޭ ސްލޮޓް، ކުރިއަށް އޮތް އެފްއޭ ކަޕްގެ ހަތަރުވަނަ ބުރުގައި ބްރައިޓަންއާ ދެކޮޅަށް ކުޅޭ މެޗުގެ ކުރިން، ޓީމުގެ ކުޅުންތެރިންގެ ފިޓްނަސް ބެލެހެއްޓުމާއި މުބާރާތްތަކަށް އިސްކަންދިނުމުގައި ހުރި ގޮންޖެހުންތަކާ ބެހޭގޮތުން ވާހަކަދައްކަވައިފިއެވެ.

Ad by Hajj Corporation

މި ސީޒަނުގައި ލިވަޕޫލުން ގިނަ ލަނޑުދަނޑިތަކެއް ހާސިލްކުރުމަށް މަސައްކަތް ކުރަމުންދާކަން ފާހަގަކުރައްވަމުން ސލޮޓް ވިދާޅުވީ، "އަޅުގަނޑުމެންގެ ތިން އިސްކަމެއް އެބައޮތް - އެއީ އެފްއޭ ކަޕް، ޗެމްޕިއަންސް ލީގު ކޮލިފިކޭޝަން އަދި ޗެމްޕިއަންސް ލީގު. ނަމަވެސް ސްކޮޑުގައި އަޅުގަނޑުމެންނަށް އޮތް މަދު ފުރުސަތުތަކަށްވެސް ސަމާލުވާންޖެހޭ،" ކަމަށެވެ.

ކުޅުންތެރިންނަށް މާބޮޑަށް ބާރުބޮޑުވިޔަނުދީ މެނޭޖްކުރުމަކީ މިވަގުތު ވަރަށް މުހިންމު ކަމެއްގެ ގޮތުގައި ސލޮޓް ފާހަގަކުރެއްވިއެވެ. އޭނާ ވިދާޅުވި ގޮތުގައި މިވަގުތު އިތުރު ކުޅުންތެރިއަކަށް އަނިޔާވުމަކީ ޓީމަށް ކެތްކުރެވޭނެ ކަމެއް ނޫނެވެ. މިއީ މެނޭޖަރަކަށާއި، ޕާފޯމަންސް ސްޓާފުންނާއި މެޑިކަލް ޓީމަށް އޮތް ބޮޑު ގޮންޖެހުމެއް ކަމަށްވެސް އޭނާ ވިދާޅުވިއެވެ.

ކުޅުންތެރިންގެ މަސައްކަތުގެ ބުރަދަނާ ގުޅޭގޮތުން ވާހަކަދައްކަވަމުން ސލޮޓް ވިދާޅުވީ، ހަތް ދުވަސް ތެރޭގައި ތިން މެޗު ކުޅެން ޖެހުމަކީ ކުޅުންތެރިންނަށް އަނިޔާވުމުގެ ފުރުސަތު ބޮޑުވާ ކަމެއް ކަމަށެވެ. ނަމަވެސް މީގެ ކުރިން ގިނަ ފަހަރު ކުޅުންތެރިން އެގޮތަށް ކުޅެފައިވާކަންވެސް އޭނާ ފާހަގަކުރެއްވިއެވެ.

މެޗަށް ތައްޔާރުވުމުގެ ގޮތުން ސލޮޓް ވިދާޅުވީ، އެންމެ މުހިންމު ކަމަކީ މިއަދުގެ ފަރިތަކުރުންތަކުގައި ކުޅުންތެރިންގެ ހާލަތު ބެލުމެވެ. "އެންމެ މުހިންމު ކަމަކީ މިއަދު ފަރިތަކޮށް، ކުޅުންތެރިންގެ ހާލަތު ބަލައި، އެމީހުންގެ އިހުސާސްތައް އަޑުއެހުން. އޭގެ ފަހުން އެންމެ ރަނގަޅު ގޮތަކަށް ނިންމުންތައް ނިންމާނީ،" ސލޮޓް ވިދާޅުވިއެވެ.