ކުރިއަށް އޮތް ލޯކަލް ކައުންސިލް އިންތިހާބުގައި ކައުންސިލްތައް ސަރުކާރު ހިންގާ ޕީއެންސީ ނޫން ބަޔަކަށް ދީގެން، ކުރިއަށް އޮތް ތިން އަހަރު ދުވަހުގެ ތެރޭގައި ކުރެވޭނެ އެއްވެސް ކަމެއް ނޯންނާނެ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ރޭ ވިދާޅުވެއްޖެ އެވެ.

ގާސިމް މިހެން ވިދާޅުވީ ކުރިއަށް އޮތް ކައުންސިލް އިންތިހާބުގައި ޖުމްހޫރީ ޕާޓީގެ ފަރާތުން ވާދަކުރާ ކެންޑިޑޭޓުންނަށް ޓިކެޓު ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

Ad by Hajj Corporation

ގާސިމް ވިދާޅުވީ ގައުމުގެ އިގްތިސާދީ ހާލަތު އޮތީ ކުރީ ސަރުކާރުން ބަނގުރޫޓްވުމުގެ ހާލަތަށް ވައްޓާލާފައި ކަމަށާއި، އެ ހާލަތުން އަރައިގަތުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހަރުދަނާ ފިޔަވަޅުތަކެއް އަޅުއްވަމުން ގެންދަވާ ކަމަށެވެ. އެހެންކަމުން ގައުމުގެ މަސްލަހަތާއި އަމާންކަން ދެމެހެއްޓުމަށްޓަކައި ހުރިހާ ރައްޔިތުންވެސް ޕީއެންސީގެ ކެންޑިޑޭޓުންނަށް ވޯޓު ދިނުމަށް އޭނާ ގޮވާލެއްވި އެވެ.

 "ތިޔަ ބޭފުޅުން އެންމެ ރަނގަޅު ވޯޓު ނުދެއްވީ ޕީއެންސީ އަށް. އިދިކޮޅު ކެންޑިޑޭޓުންނަށް ވޯޓު ދެއްވީ. އެއްވެސް ކަމެއް ކުރެވޭނެތަ؟ ރަށުން ބޭލޭނެތަ އެ މަނިކުފާނު؟ ވެރިކަމުން ބޭލޭނެތަ އެމަނިކުފާނު؟. ނޯ. ކީއްކުރަންތޯ ބޭނުން ނެތް ކަމެއް ކުރަނީ،" އިދިކޮޅު ކެންޑިޑޭޓުންނަށް ވޯޓު ދިނުމުގެ ބޭނުމެއް ނެތްކަން ފާހަގަކުރައްވަމުން ގާސިމް ވިދާޅުވެފަވެއެވެ.

ކައުންސިލްތަކުގެ މަސައްކަތްތައް ބިނާވެފައި އޮންނަނީ ދައުލަތުގެ ބަޖެޓުގެ މައްޗަށް ކަން ފާހަގަކުރައްވަމުން ގާސިމް ވިދާޅުވީ، ސަރުކާރުން ބަޖެޓު ދީގެން ނޫނީ ކައުންސިލްތަކަށް އެއްވެސް ކަމެއް ނުކުރެވޭނެ ކަމަށެވެ. އެހެންކަމުން ރަށަށް ރަނގަޅު ގޮތްތަކެއް އެދޭނަމަ ކުރަންޖެހޭ ކަމަކީ ސަރުކާރާ ގުޅިގެން މަސައްކަތް ކުރާނެ ޕީއެންސީގެ ކެންޑިޑޭޓުން އިންތިހާބު ކުރުން ކަމަށް އޭނާ ތަކުރާރުކޮށް ވިދާޅުވި އެވެ.

މީގެ އިތުރުން، އިސްލާމްދީނުގެ މިންތައް ހިފެހެއްޓުމަށް ރައީސް މުއިއްޒު ކުރައްވާ މަސައްކަތްޕުޅަށް ގާސިމް ވަނީ ތައުރީފު ކުރައްވާފަ އެވެ. އަދި ރާއްޖެ މިއޮތް ދަރަނީގެ ނުރައްކާތެރި ހާލަތުން ސަލާމަތްކޮށް، އިތުރު ލޮޅުމެއް އަޔަނުދީ ގައުމު ކުރިއަށް ގެންދިއުމަށް ރައީސާއެކު ހުރިހާ ރައްޔިތުން ސާބިތުވެ ތިބުމަށްވެސް ގާސިމް އިލްތިމާސް ކުރެއްވި އެވެ.