ހއ. ފިއްލަދޫގެ މަގުތައް ޒަމާނީ ފެންވަރަށް ތަރައްޤީކުރުމުގެ އަމަލީ މަސައްކަތް ރަސްމީކޮށް ފަށައިފިއެވެ.

އެ ރަށުގައި ބޭއްވި ޚާއްޞަ ރަސްމިއްޔާތެއްގައި މި މަޝްރޫޢުގެ އަމަލީ މަސައްކަތް ފައްޓަވައިދެއްވީ ރައްޔިތުންގެ މަޖިލީހުގެ ކެލާ ދާއިރާގެ މެންބަރު ޢަބްދުﷲ ޝަރީފެވެ.

Ad by Hajj Corporation

މި ރަސްމިއްޔާތުގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ މެނޭޖިންގ ޑިރެކްޓަރު އިބްރާހީމް ނަޡީމް އާއި ފިއްލަދޫ ކައުންސިލްގެ ރައީސް ފަތުޙުﷲ ޙަސަން ބައިވެރިވެވަޑައިގެންނެވިއެވެ.

ރަސްމިއްޔާތުގައި ވާހަކަދައްކަވަމުން މެންބަރު ޝަރީފް ވިދާޅުވީ، މަގުތައް ހެދުމަކީ ފިއްލަދޫގެ މުސްތަޤުބަލަށް ލިބޭނެ ވަރަށް ބޮޑު ކުރިއެރުމެއް ކަމަށެވެ.

އާރްޑީސީގެ މެނޭޖިންގ ޑިރެކްޓަރު އިބްރާހީމް ނަޡީމް ވިދާޅުވީ، ފިއްލަދޫގެ މަގު ހެދުމުގެ މަސައްކަތް އެ ކުންފުނިން ވަރަށް ގާތުން މޮނިޓަރު ކުރަމުންދާނެ ކަމަށެވެ. އަދި އުންމީދަކީ ވީހާވެސް އަވަހަކަށް މަސައްކަތް ނިންމާލައި، ރައްޔިތުންނަށް އޭގެ ފައިދާ ހޯދައިދިނުން ކަމަށެވެ.

މީގެ އިތުރުން މަސައްކަތް ހަލުވިކުރުމަށްޓަކައި އާރްޑީސީގެ ވޯކް ސައިޓް ބޮޑުކުރުމުގެ މަސައްކަތް ފަށާފައިވާ ކަމަށާއި މަޝްރޫޢަށް ބޭނުންވާ ސާމާނާއި ވެހިކަލްތައް ކުރިއަށް އޮތް ދެ މަސްދުވަހުގެ ތެރޭގައި ރަށަށް ގެންދެވޭނެ ކަމުގެ ޔަޤީންކަން ވަނީ ދެއްވާފައެވެ. އަދި މިހާރުވެސް އާރްޑީސީގެ ފަސް ޕްރޮޖެކްޓެއް އެ ރަށުގައި ކުރިއަށްދާ ކަމަށް ވެސް ވިދާޅުވިއެވެ.

މި މަޝްރޫޢު ނިމުމުން ފިއްލަދޫގެ އެއްގަމުގެ ދަތުރުފަތުރަށް ފަސޭހަކަން ލިބިގެންދާނެއެވެ.