ކަނޑުމަގުން ރާއްޖެ އެތެރެކުރަން މަސައްކަތްކުރި، 30އަށް ވުރެ ގިނަ ކިލޯގެ މަސްތުވާތަކެތި މާލޭގެ ވިޔަފާރި ބަނދަރުން އަތުލައިގެންފިއެވެ.

ކަސްޓަމްސްއިން ބުނީ، މިދިޔަ ބުރާސްފަތި ދުވަހު ކަނޑުމަގުން އައި މުދާތަކެއް ބަލައި ފާސްކުރުމުގެ ތެރޭގައި މަސްތުވާތަކެތިކަމަށް ޝައްކުކުރެވޭ ތަކެތި ފެނިފައިވާ ކަމަށެވެ.

Ad by Hajj Corporation

އެ ތަކެތި ފުރަތަމަ މަރުހަލާގައި ޓެސްޓުކުރުމުން މަސްތުވާތަކެތީގެ ބާވަތެއް ކަމަށްވާ ހަޝިޝް އޮއިލްއަށް ފައްސި ކަމަށް، ކަސްޓަމްސްއިން މައުލޫމާތުދެއެވެ. ބަރުދަނުގައި 36.4 ކިލޯގުރާމު ހުރި މި ތަކެތީގެ މަގުމަތީގެ އަގު 29 މިލިއަން ރުފިޔާއަށްވުރެ ބޮޑު ކަމަށް ކަސްޓަމްސްއިން ވަނީ ބުނެފައެވެ.

މި މައްސަލައާ ގުޅިގެން އެއްވެސް މީހަކު ހައްޔަރު ކޮށްފައިވާ ވާ ކަމެއް އަދި އެނގިފައެއް ނުވެއެވެ.

އާންމުގޮތެއްގައި ރާއްޖެއަށް މަސްތުވާތަކެތި އެތެރެކުރަނީ ވައިގެ މަގުންނެވެ. އެފަދައިން އެތެރެކުރަން މަސައްކަތްކުރާ މަސްތުވާތަކެތި ކަސްޓަމްސްއިން އެތައް ފަހަރަކު ހިފަހައްޓާފައިވެއެވެ.