ހޭންޑީ ވޯޓާ ބޮޓްލިން ޕްލާންޓުން ބިއްލޫރި ފުޅިތަކުގައި ބަންދުކޮށްގެން ބާޒާރަށް ނެރޭ ފެނުގައި ޖަރާސީމުގެ އަސަރު ހުރިކަން ފާހަގަކުރެވިފައިވާތީ، އެ ފެން ބޭނުންނުކުރުމަށް މޯލްޑިވްސް ފުޑް އެންޑް ޑްރަގު އޮޓޯރިޓީ (އެމްއެފްޑީއޭ) އިން އަންގައިފިއެވެ.

އެމްއެފްޑީއޭ އިން ނެރުނު ނޫސްބަޔާނެއްގައި ބުނެފައިވަނީ، ހޭންޑީ ވޯޓާ ބޮޓްލިން ޕްލާންޓުން އުފައްދާ 330 އެމްއެލް، 550 އެމްއެލް އަދި 1 ލީޓަރުގެބިއްލޫރި ފެން ފުޅީގައި ހުރެގެން ނުވާނެ ފަދަ ޖަރާސީމުގެ އަސަރު ތަހުލީލުތަކުން ފެނިފައިވާ ކަމަށެވެ. މިއީ އާންމު ސިއްހަތަށް ނުރައްކާވެދާނެ ކަމެއްގެ ގޮތުގައި އެ އޮޓޯރިޓީން ވަނީ ފާހަގަކޮށްފައެވެ.

Ad by Hajj Corporation

އެމްއެފްޑީއޭ އިން ހާމަކުރި ގޮތުގައި، މި ފެންފުޅިތަކުގެ ތަހުލީލު ނަތީޖާތަކުން ދައްކާ ގޮތުގައި އެ ފެނަކީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަނޑައަޅާފައިވާ ބޯފެނުގެ މިންގަނޑުތަކަށް ފެތޭ ފެނެއް ނޫނެވެ. އެހެންކަމުން، އެ ފެނަކީ ބޭނުންކުރުމަށް ރައްކާތެރި އެއްޗެއް ނޫންކަމަށް އެ އިދާރާއިން ވަނީ ކަނޑައަޅާފައެވެ.

މި މައްސަލައާ ގުޅިގެން، ވަކި ގޮތެއް އަންގަންދެން ހޭންޑީ ވޯޓާގެ ބިއްލޫރި ފުޅިތަކުގައި ބަންދުކޮށްފައިވާ ފެން ބޭނުންނުކުރުމަށާއި، ބާޒާރުން ވިއްކުން ހުއްޓާލުމަށް އެމްއެފްޑީއޭ އިން ވަނީ އިލްތިމާސްކޮށްފައެވެ.

މި ފިޔަވަޅަކީ އާންމުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން އެޅި ފިޔަވަޅެއް ކަމަށްވެސް އެ އިދާރާއިން ބުނެފައިވެއެވެ.