އެމެރިކާގެ ސުޕްރީމް ކޯޓުން ޑޮނަލްޑް ޓްރަމްޕްގެ ވިޔަފާރި ސިޔާސަތުތަކަށް ބޮޑު ހުރަހެއް ކުރިމަތިކުރުވައި، ގައުމީ ކުއްލި ހާލަތުގެ ގާނޫނެއްގެ ދަށުން އޭނާ ތައާރަފްކުރެއްވި ވަރުގަދަ ޓެރިފްތައް ބާތިލްކޮށްފިއެވެ.

ހުކުރު ދުވަހު އިއްވި މި ތާރީޚީ ނިންމުމަކީ ރިޕަބްލިކަން ޕާޓީގެ ރައީސަށް ލިބުނު ބޮޑު ނާކާމިޔާބީއެއްގެ ގޮތުގައި ބެލެވޭއިރު، މީގެ ސަބަބުން ބައިނަލްއަގުވާމީ އިގްތިސާދަށް ބޮޑެތި ބަދަލުތަކެއް އައުން އެކަށީގެންވެއެވެ.

Ad by Hajj Corporation

އުއްތަމަ ފަނޑިޔާރު ޖޯން ރޮބަޓްސް ހިމެނިވަޑައިގަންނަވާހެން 6 ފަނޑިޔާރުންގެ އަޣުލަބިއްޔަތުން ނިންމި މި ހުކުމުގައި ބަޔާންކޮށްފައިވަނީ، ބޭރު ގައުމުތަކުން އެތެރެކުރާ މުދަލުން ޓެރިފް ނެގުމުގެ ގާނޫނީ ބާރު ރައީސަށް ލިބިވަޑައިގެންފައި ނުވާ ކަމަށެވެ. ޓްރަމްޕް މި ފިޔަވަޅުތައް އަޅުއްވާފައިވަނީ 1977 ވަނަ އަހަރުގެ 'އިންޓަނޭޝަނަލް އެމަޖެންސީ އެކޮނޮމިކް ޕަވަރސް އެކްޓް' (އައިއީއީޕީއޭ) އަށް ރިއާޔަތްކުރައްވައި ނަމަވެސް، ކޯޓުން ކަނޑައެޅީ ޓެކްސްއާއި ޓެރިފްގެ ކަންކަން ނިންމުމުގެ އިޚްތިސާސް އޮތީ ހަމައެކަނި ގާނޫނު ހަދާ މަޖިލީހަށް ކަމަށެވެ.

މި ނިންމުމާ މެދު ނުރުހުން ފާޅުކުރައްވަމުން ޓްރަމްޕް ވަނީ ފަނޑިޔާރުންނަށް ވަރަށް ބޮޑަށް ފާޑުވިދާޅުވެފައެވެ. އަދި ޓެރިފްތައް ދެމެހެއްޓުމަށްޓަކައި އެހެން ގާނޫނީ މަގުތަކެއް ހޯއްދަވާނެ ކަމަށް ވިދާޅުވެ، ތަފާތު ގާނޫނީ އޮނިގަނޑެއްގެ ދަށުން މުޅި ދުނިޔެއަށް އަމާޒުވާ ގޮތަށް 10 އިންސައްތައިގެ ޓެރިފެއް އިއުލާން ކުރައްވާފައިވާ ކަމަށްވެސް އޭނާ ވިދާޅުވިއެވެ.

ކޯޓުގެ މި ހުކުމުގެ ސަބަބުން ޓްރަމްޕްގެ އިގްތިސާދީ އެޖެންޑާއަށް ބޮޑެތި ގޮންޖެހުންތަކެއް ކުރިމަތިވާނެއެވެ. ޓްރަމްޕްގެ ވެރިކަމުގައި މިހާތަނަށް 175 ބިލިއަން ޑޮލަރު ޓެރިފްގެ ގޮތުގައި ދައުލަތަށް ލިބިފައިވީ ނަމަވެސް، އެ ފައިސާ އަނބުރާ ދެއްކުމާ މެދު ކޯޓުން ވަކި ގޮތެއް ނިންމާފައެއް ނުވެއެވެ.

މި މައްސަލަ ކޯޓާ ހަމައަށް ދިޔައީ ޓްރަމްޕްގެ ޓެރިފްތަކުގެ ސަބަބުން ގެއްލުންވި ބައެއް ސްޓޭޓްތަކާއި އަމިއްލަ ވިޔަފާރިތަކުން އެކަމުގެ ގާނޫނީ ސައްހަކަމާ މެދު ދައުވާ ކުރުމުންނެވެ. މި ނިންމުމާ ގުޅިގެން ޓްރަމްޕް ގެންދަވަނީ ފަނޑިޔާރުންނަކީ އިންސާފުން ބޭރުވެފައިވާ ބައެއްގެ ގޮތުގައި ސިފަކުރައްވައި، އޭނާގެ ހިތްހަމަނުޖެހުން މީޑިއާތަކުގައި ފާޅުކުރައްވަމުންނެވެ.