ދުނިޔޭގެ ފުޓްބޯޅައިގެ މައި އިދާރާ، ފީފާއިން ބާއްވާ ކްލަބް ވޯލްޑް ކަޕްގެ 2025 ވަނަ އަހަރުގެ އެޑިޝަނުން ބާސެލޯނާ، މެންޗެސްޓަރ ޔުނައިޓެޑް އަދި ލިވަޕޫލް ފަދަ މަޝްހޫރު ކްލަބްތަކަށް ފުރުސަތު ގެއްލުމާ ގުޅިގެން، މުބާރާތުގެ ފޯމެޓަށް ބަދަލުތަކެއް ގެނައުމަށް ފީފާއިން ނިންމައިފިއެވެ. މި ބަދަލުތަކަކީ މުސްތަގުބަލުގައި މިފަދަ ބޮޑެތި ކްލަބްތަކަށް މުބާރާތުން ޖާގަ ކަށަވަރުކޮށްދިނުމަށް އެޅޭ ފިޔަވަޅެއް ކަމަށް ބެލެވެއެވެ.

ކްލަބް ވޯލްޑް ކަޕް ބޮޑުކޮށް، ގިނަ ޓީމުތަކަކާއެކު ބޭއްވުމަށް ފީފާއިން ނިންމި ނިންމުމަށް ފުރަތަމަ ކްލަބްތަކާއި ކުޅުންތެރިންގެ ފަރާތުން ފާޑުކިޔުންތަކެއް އަމާޒުވި ނަމަވެސް، މި މުބާރާތަކީ ކާމިޔާބު މުބާރާތެއްކަން މިހާރު ވަނީ ސާބިތުވެފައެވެ. މުބާރާތް ބަލަން ދިޔަ ސަޕޯޓަރުންގެ އަދަދާއި، ދުނިޔޭގެ އެކި ކަންކޮޅުތަކުން ލިބުނު ވިއުވަރޝިޕް އަދި ވިޔަފާރިވެރިންގެ އެއްބާރުލުމުގެ ސަބަބުން މި މުބާރާތުގެ މުހިންމުކަން ވަނީ ބޮޑުވެފައެވެ.

Ad by Hajj Corporation

ފީފާ އާއި ޔޫއެފާއިން މިހާރު ވަނީ 2029 ވަނަ އަހަރުން ފެށިގެން ކްލަބް ވޯލްޑް ކަޕްގައި ވާދަކުރާ ޓީމުތަކުގެ އަދަދު 48 އަށް އިތުރުކުރުމަށް އެއްބަސްވެފައެވެ. މި ނިންމުމަކީ ދެ އިދާރާގެ ދެމެދުގައި ކުރެވުނު ދިގު މަޝްވަރާތަކަކަށްފަހު، ވިޔަފާރީގެ މަސްލަހަތަށާއި ފުޓްބޯޅައިގެ ވާދަވެރިކަމަށް ރިއާޔަތްކޮށް ނިންމި ނިންމުމެކެވެ.

ޔޫރަޕްގެ ބޮޑެތި ކްލަބްތަކުގެ ނުފޫޒު

ދަ ގާޑިއަން ނޫހުން ރިޕޯޓްކޮށްފައިވާ ގޮތުގައި، 2025 ވަނަ އަހަރު 32 ޓީމާއެކު ބޭއްވި މުބާރާތުގެ ކާމިޔާބީއަށްފަހު، ޔޫރަޕްގެ ބޮޑެތި ކްލަބްތަކުން ވަނީ މުބާރާތުގައި އެ ކްލަބްތަކުގެ ބައިވެރިވުން ކަށަވަރުކުރުމަށް ބާރުއަޅާފައެވެ. އަދި ކޮންމެ ދެ އަހަރަކުން އެއްފަހަރު މުބާރާތް ބޭއްވުމަށް ހުށަހެޅުނު ހުށަހެޅުމާ އެ ކްލަބްތަކުން ވަނީ ދެކޮޅު ހަދާފައެވެ.

ޔޫއެފާއިން ކުރިން މި މުބާރާތް ފުޅާކުރުމާ ދެކޮޅު ހެދީ، އޭގެ ސަބަބުން ޗެމްޕިއަންސް ލީގުގެ ފޯރި ކުޑަވެ، ބައިނަލްއަގުވާމީ ފުޓްބޯޅަ ކަލަންޑަރު ތޮއްޖެހިދާނެތީއެވެ. ނަމަވެސް، ކޮންމެ ދެ އަހަރަކުން އެއްފަހަރު މުބާރާތް ބޭއްވުމުގެ ބަދަލުގައި، 48 ޓީމާއެކު މުބާރާތް ބޭއްވުމަކީ ސްޓްރެޓީޖިކް ގޮތުން ރަނގަޅު ނިންމުމެއް ކަމަށް ޔޫއެފާއިން މިހާރު ގަބޫލުކުރެއެވެ.

މި އާ ފޯމެޓާއެކު، ދުނިޔޭގެ އެންމެ މަގުބޫލު ކްލަބްތަކަށް މުބާރާތުން ފުރުސަތު ލިބުމުގެ ފުރުސަތު ބޮޑުވެ، މުބާރާތުގެ ވިޔަފާރީގެ އަގު އިތުރަށް އުފުލިގެންދާނެ ކަމަށް އުންމީދު ކުރެވެއެވެ.