ޗެލްސީއިން މިދިޔަ މަހުގައި ސޮއި ހޯދި ބްރެޒިލްގެ ފޯވާޑް ޖޯއާއޯ ޕެޑްރޯގެ ދެގޯލާއެކު ޗެލްސީ ކުލަބް ވޯލްޑްކަޕްގެ ފައިނަލަށް ދަތުރުކޮށްފިއެވެ. ކުލަބް ވޯލްޑްކަޕްގެ ސެމީފައިނަލުގައި ރޭގައި ބްރެޒިލްގެ ފުލުމިނެންސޭ އާ ދެކޮޅަށް މެޓްލައިފް ސްޓޭޑިއަމްގައި ކުޅުނު މި މެޗު ނިމުނީ 2-0 ން ޗެލްސީ ގެ ކާމިޔާބީއާ އެކުގައެވެ.

މިދިޔަ ހަފްތާގައި ބްރައިޓަން އިން ސޮއިހޯދި ކުރި ޖޯއާއޯ ޕެޑްރޯ ވަނީ ޕަލްމެއިރާސް އާ ދެކޮޅަށް ކުޅުނު ކުއާޓަރ ފައިނަލް މެޗުގައި ސަބްސްޓިޓިއުޓެއްގެ ގޮތުގައި ބައިވެރިވެ، 2-1 ން މެޗު ކާމިޔާބު ކުރުމުގައި މުހިންމު ދައުރެއް އަދާކޮށްފައެވެ.

އޭނާގެ ކުރީގެ ކުލަބާ ދެކޮޅަށް ފުލް ޑެބިއުޓް މެޗުގައި ޖޯއާއޯ ޕެޑްރޯ ވަނީ އެންމެ ފުރަތަމަ ލަނޑު 18 ވަނަ މިނެޓްގައި ޖަހާފައެވެ. އަދި 60 ވަނަ މިނެޓާ ކައިރިވަމުން ދަނިކޮށް އޭނާގެ ދެވަނަ ލަނޑުވެސް ވަނީ ޖަހާފައެވެ.

މެޗުގެ ތެރޭގައި ފުލުމިނެންސޭ އަށް ލިބުނު ރަނގަޅު ފުރުސަތެއް މާރކް ކުކުރެއްލާ ވަނީ ގޯލް ލައިން ކްލިއަރެންސް އަކުން ހުއްޓުވާލާފައެވެ. އަދި ޓްރެވޯ ޗަލޮބާގެ އަތުގައިޖެހިގެން ދިން ޕެނަލްޓީ ކިކް ވީއޭއާރް ރިވިއު އަކަށް ފަހު ވަނީ ބާތިލްކޮށްފައެވެ.

މި މޮޅާއެކު ޗެލްސީ އާއި ދެކޮޅަށް ފައިނަލްގައި ވާދަކުރާނެ ޓީމެއް ޔަޤީންވާނީ މިރޭ ރެއަލް މެޑްރިޑް އާއި ޕީއެސްޖީ އާ ކުޅޭ މެޗުން މޮޅުވާ ޓީމަކާއި ދެކޮޅަށެވެ.