ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލްކުރެވޭނީ އިޢާދަކުރުވަނިވި ސާފު ހަކަތަ ބޭނުންކުރުން އިތުރުކޮށްގެން ކަމަަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ދުނިޔޭގެ ހަކަތައިގެ ދުވަހުގެ މުނާސަބަތުގައި މީސްމީޑިއާ މެދުވެރިކޮށް ފޮނުއްވި މެސެޖެއްގައެވެ.

Ad by Hajj Corporation

އެ މެސެޖުގައި ރައީސް ވަނީ އިޢާދަކުރުވަނިވި ހަކަތައިން ކަރަންޓު އުފައްދާ މިންވަރު 33 އިންސައްތައަށް މަތިކުރުމުގެ ލަނޑުދަނޑި ޙާޞިލްކޮށް، ރާއްޖޭގެ އިޤްތިޞާދަށް ހެޔޮ ބަދަލެއް ގެނަސްދެއްވާނެ ކަމަށް ވެސް ވިދާޅުވެފައެވެ. އަދި އެ މެސެޖުގައި ރައީސް ވަނީ ތިމާވެށި ޙިމާޔަތްކުރުމާއި ހަކަތައިގެ ދާއިރާއިން ސަރުކާރުން ގެންގުޅުއްވާ ތަޞައްވުރު ހާމަކުރައްވާފައެވެ.

އެމަނިކުފާނު ވިދާޅުވީ ރާއްޖޭގެ ރީތި ތިމާވެށި ޙިމާޔަތްކޮށް، ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލްކުރެވޭނީ އިޢާދަކުރުވަނިވި ސާފު ހަކަތަ ބޭނުންކުރުން އިތުރުކޮށްގެން ކަމަށެވެ. އަދި ވޭތުވެދިޔަ ދެ އަހަރަކީ ރާއްޖޭގެ ތާރީޚުގައި މި ރޮނގުން އެންމެ ރަނގަޅު ނަތީޖާ ޙާޞިލްކުރި ދެ އަހަރުކަންވެސް އެމަނިކުފާނު ފާހަގަކުރެއްވިއެވެ.

ސަރުކާރުގެ މި އަމާޒަކީ ރާއްޖެއިން ތެލަށް ކުރާ ހޭދަ ކުޑަކޮށް، ތިމާވެއްޓާ ރައްޓެހި ގޮތްތަކަށް ހަކަތަ އުފެއްދުން އިތުރުކުރުމަށް ކުރިއަށްގެންދާ މުހިންމު މަސައްކަތެކެވެ. މިކަމުގެ ސަބަބުން ރާއްޖޭގެ އިޤްތިޞާދީ ދުވެއްޔަށް ހެޔޮ އަސަރުތަކެއް ކުރާނެ ކަމަށް ސަރުކާރުން އުންމީދު ކުރެއެވެ.

ދުނިޔޭގެ ހަކަތައިގެ ދުވަސް (ވޯލްޑް އެނާޖީ ޑޭ) ފާހަގަކުރަނީ ކޮންމެ އަހަރެއްގެވެސް އޮކްޓޯބަރު މަހުގެ 22 ވަނަ ދުވަހުއެވެ. މި ދުވަހުގެ މައިގަނޑު މަޤްޞަދަކީ ވެއްޓަށް ގެއްލުން ކުޑަ، ދެމެހެއްޓެނިވި ހަކަތައިގެ ވަސީލަތްތައް ބޭނުންކުރުމަށް ބާރުއެޅުމާއި، ހަކަތަ ރައްކާތެރިކުރުމުގެ މުހިންމުކަން އާންމުންނަށް އަންގައިދިނުމެވެ.