140 ޓަނަށްވުރެ ގިނަ މުދާ 'ސީ-ޓޫ-އެއަރ' މެދުވެރިކޮށް ރާއްޖޭން ބޭރުކޮށްފިއެވެ.

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވަނީ މިއަހަރުގެ ޖެނުއަރީ މަހުގެ "ސީ-ޓޫ-އެއަރ" ކާގޯގެ ތަފާސްހިސާބުތައް އާންމުކޮށްފައެވެ.

Ad by Hajj Corporation

މި ތަފާސްހިސާބުތަކުން ދައްކާގޮތުގައި، ކަނޑުމަގުން ގެންނަ މުދާ ވައިގެ މަގަށް ބަދަލުކޮށްގެން ރާއްޖޭން ބޭރަށް ފޮނުވުމުގެ ހިދުމަތަށް ވަނީ ވަރަށް ކާމިޔާބު ފެށުމެއް ލިބިފަ އެވެ. އެގޮތުން، ވޭތުވެދިޔަ ޖެނުއަރީ މަހުގެ ތެރޭގައި 140 ޓަނަށްވުރެ ގިނަ މުދާ ކަނޑު ބޯޓުފަހަރުން ބާލައި، ބައިނަލްއަގުވާމީ ފްލައިޓްތަކުގައި ވަނީ ފޮނުވާލާފަ އެވެ.

މި އޮޕަރޭޝަނަލް މައުލޫމާތުތަކަށް ބަލާއިރު، މި މުދާތައް ބޭރުކޮށްފައިވަނީ 26 ޓީއީޔޫ (20 ފޫޓުގެ ކޮންޓޭނަރު) މެދުވެރިކޮށެވެ. މިއީ ކަނޑުދަތުރުފަތުރާއި ވައިގެ ދަތުރުފަތުރުގެ ނިޒާމު ހަރުދަނާކަމާއެކު ގުޅުވާލެވިފައިވާކަން ހާމަކޮށްދޭ ކަމެކެވެ. މި ހިދުމަތަކީ ރާއްޖޭގެ ޖިއޮގްރަފީގެ ގޮތުން އޮތް މުހިންމު ސަރަހައްދުގެ ބޭނުން ހިފައި، ބައިނަލްއަގުވާމީ ވިޔަފާރިތަކަށް މުދާ އުފުލުމުގައި އަވަސް މަގެއް ދެއްކުމަށް ފަރުމާކޮށްފައިވާ ހިދުމަތެކެވެ.

މި މުދާތައް ދުނިޔޭގެ އެކި ކަންކޮޅުތަކަށް ފޯރުކޮށްދިނުމުގައި އެމްޕީއެލްއިން ވަނީ ދުނިޔޭގެ ނަން މަޝްހޫރު އެއަރލައިންތަކާ ގުޅިގެން މަސައްކަތްކޮށްފަ އެވެ. މީގެ ތެރޭގައި ވަރޖިން އެޓްލާންޓިކް، އިއްތިހާދު، ލުފްތަންސާ، ސުވިސް އެއަރ އަދި ޓާކިޝް އެއަރލައިން ފާހަގަކޮށްލެވެ އެވެ. މި އެއަރލައިންތަކުގެ އެހީގައި ރާއްޖެއަށް ކަނޑުމަގުން އަންނަ މުދާ، އެކި ގައުމުތަކަށް ވަނީ ފޮނުވާލާފައެވެ. 

ޖެނުއަރީ މަހު ފޮނުވުނު މުދާ އަމާޒުކޮށްފައިވަނީ ދުނިޔޭގެ ބޮޑެތި މާކެޓްތަކަށެވެ. މީގެ ތެރޭގައި އިޓަލީ، އެމެރިކާ، ޔުނައިޓެޑް އެރަބް އެމިރޭޓްސް، ނެދަލޭންޑްސް، ތުރުކީ އަދި އިނގިރޭސިވިލާތް ހިމެނެ އެވެ. މިފަދަ ގިނަ ގައުމުތަކަކަށް ރާއްޖެ މެދުވެރިކޮށް މުދާ ފޮނުވުމަކީ، ދުނިޔޭގެ ސަޕްލައި ޗެއިންގައި ރާއްޖޭގެ ދައުރު ފުޅާވަމުންދާކަމުގެ ހެއްކެކެވެ. އެމްޕީއެލްގެ އަމާޒަކީ މި ނިޒާމު އިތުރަށް ހަރުދަނާކޮށް، ބައިނަލްއަޤުވާމީ އެކްސްޕޯޓަރުންނަށް އިތުބާރު ހުރި ޚިދުމަތްތަކެއް ފޯރުކޮށްދޭ މައި މަރުކަޒަކަށް ރާއްޖެ ހެދުމެވެ.

ސީ-ޓޫ-އެއަރގެ ހިދުމަތަށް ބޮޑު ކުރިއެރުމެއް ލިބިފައިވާއިރު، ބަނދަރުގެ އާންމު އޮޕަރޭޝަންތައްވެސް ދަނީ ވަރަށް ބާރުމިނުގައި ކުރިއަށެވެ. މިސާލަކަށް ބަލާއިރު، 19 ފެބްރުއަރީ 2026 ގައި 3,260 ފްރައިޓް ޓަނުގެ ކޮންޓޭނަރާއި އާންމު މުދާ ވަނީ ބަނދަރުން ކްލިއަރކޮށްފަ އެވެ. އަދި އިއްޔެ އެކަނިވެސް 4،132 ފްރައިޓް ޓަނުގެ ކޮންޓޭނަރާއި އާންމު މުދާ ވަނީ ބަނދަރުން ކްލިއަރކޮށްފަ އެވެ. 

ސީ-ޓު-އެއަރ ކާގޯގެ ޚިދުމަތަކީ، ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ. މިމަސައްކަތަކީ، ދުނިޔޭގެ ވަރަށް ގިނަ ގައުމުތަކުން ކުރަމުން އަންނަ، އަދި މިމަސައްކަތުން އެގައުމުތަކުގެ އިޤްތިޞާދަށް ބޮޑެތި މަންފާތަކެއް ލިބެމުން އަންނަ މަސައްކަތެކެވެ.

މުދާ ރާއްޖޭން ބޭރަށް ގެންދިއުމުގައި 11 އެއަރލައިނަކުން މިހާތަނަށް ވަނީ ބައިވެރިވެފައެވެ.

މުދާ ފޮނުވޭ ގައުމުތަކުގެތެރޭގައި އެމެރިކާ، ކެނެޑާ، އިނގިރޭސިވިލާތް އަދި ޔޫރަޕުގެ ގައުމުތައް ހިމެނެއެވެ. ސީ-ޓު-އެއަރ ކާގޯގެ ޚިދުމަތް މެދުވެރިކޮށް އާއްމުކޮށް ރާއްޖޭން ބޭރުކުރަނީ، ބަންގްލަދޭޝްގައި އުފައްދާ އަންނައުނުގެ ބާވަތްތަކެވެ. 

ރާއްޖޭގައި މިޚިދުމަތްދެމުންދަނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން މޯލްޑިވްސް ޕޯޓްސް ލިމިޓެޑް، އެމްޕީއެލް އާއި މޯލްޑިވްސް ކަސްޓަމްސް ސަރވިސް ގުޅިގެންނެވެ.