ހއ. ދިއްދޫގެ ބިން ހިއްކުމުގެ ބިޔަ މަޝްރޫޢު ކާމިޔާބުކަމާއެކު ނިންމާލާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ އިޢުލާން ކުރައްވައިފިއެވެ.

ރައީސް މިކަން ހާމަކުރެއްވީ މީސްމީޑިއާގައި ކުރެއްވި ޕޯސްޓެއްގައެވެ.

Ad by Hajj Corporation

ރައީސް ހާމަކުރެއްވި ގޮތުގައި މި މަޝްރޫޢުގެ ދަށުން ދިއްދޫގައި ޖުމްލަ 112 ހެކްޓަރުގެ ބިން ވަނީ ހިއްކާފައެވެ. މި ބޮޑު ސަރަޙައްދު ހިއްކުމަށްޓަކައި ޖުމްލަ 5,492,089.00 ކިއުބިކް މީޓަރުގެ ވެލި ބޭނުންކޮށްފައިވެއެވެ.

މި މަޝްރޫޢުގެ އަމަލީ މަސައްކަތްތައް ކުރިއަށްގެންގޮސްފައިވަނީ ރެކޯޑު މުއްދަތެއްގެ ތެރޭގައެވެ. އެގޮތުން، ބިން ހިއްކުމަށް ބޭނުންކުރާ ކޮނެބޯޓު 03 ޖެނުއަރީ 2026 ގައި ސައިޓަށް ގެންގޮސް، އޭގެ އަނެއް ދުވަހު ކަމަށްވާ 04 ޖެނުއަރީ 2026 ގައި ވަނީ އަމަލީ މަސައްކަތް ފަށާފައެވެ. މުޅި މަޝްރޫޢު އެއްކޮށް ނިންމާލާފައިވަނީ 23 ފެބުރުއަރީ 2026 ގައެވެ.

މުޅި މަޝްރޫޢު ނިންމުމަށް ހޭދަވެފައިވަނީ އެންމެ 50 ދުވަހެވެ. މިއީ މިފަދަ ބިޔަ މަޝްރޫޢެއް ނިންމުމަށް ހޭދަވި ވަރަށް ކުރު މުއްދަތެއްކަން ފާހަގަކުރެވެއެވެ.

ދިއްދޫ ބިން ހިއްކުމުގެ މި މަޝްރޫޢަކީ އެ ރަށަށް ދިމާވެފައިވާ ބިމުގެ ދަތިކަން ޙައްލުކޮށް، އެރަށުގައި އެއާޕޯޓެއް އަޅައިދީ ރަށުގެ އިޤްތިޞާދީ އަދި އިޖުތިމާޢީ ތަރައްޤީއަށް މަގުފަހިކުރުމުގެ މަޤްޞަދުގައި ސަރުކާރުން ކުރިއަށްގެންދިޔަ މުހިންމު މަޝްރޫޢެކެވެ.

މި ބިމާއެކު ދިއްދޫގެ ތަރައްޤީގެ އާ ބާބެއް ފެށިގެންދާނެ އެވެ.