ލ. ފޮނަދޫ ކުރިގަމު އަވަށު ދަނޑުބިން ހައްދާ ސަރަހައްދުގައި ހުރި ގުދަނެއްގައި މިއަދު އަލިފާނުގެ ހާދިސާއެއް ހިނގައިފިއެވެ.

އެމްއެންޑީއެފުން މައުލޫމާތު ދޭ ގޮތުގައި މި ހާދިސާގެ ރިޕޯޓް އެމްއެންޑީއެފް ސެންޓްރަލް އޭރިއާ ކޮމާންޑް، ކައްދޫ ފަޔަރ ސްޓޭޝަނަށް ލިބިފައިވަނީ ހޯމަ ދިވަހު މެންދުރުފަހު 15:26 ހާއިރުއެވެ.

Ad by Hajj Corporation

ރިޕޯޓް ލިބުމާއެކު ފަޔަރފައިޓަރުން އެ ސަރަހައްދަށް ގޮސް ކުރި މަސައްކަތުން، އަލިފާން ވަނީ ނިއްވާލާފައެވެ. އަލިފާން އެއްކޮށް ނިއްވާލެވުނީ ހަވީރު 16:12 ހާއިރުއެވެ.

ނަމަވެސް، މިރޭ 19:45 ހާއިރު އަނެއްކާވެސް އެ ގުދަނުގައި އަލިފާން ރޯވި ކަމުގެ މައުލޫމާތު ވަނީ ލިބިފައެވެ. މި މައުލޫމާތު ލިބުމާއެކު ކައްދޫ ފަޔަރ ސްޓޭޝަނުގެ ފަޔަރފައިޓަރުން އަލުން އެ ސަރަހައްދަށް ގޮސް މަސައްކަތްކޮށް، މިރޭ 20:29 ހާއިރު ވަނީ އަލިފާން އެއްކޮށް ނިއްވާލާފައެވެ.

މި ހާދިސާގައި އެއްވެސް މީހަކަށް އަނިޔާއެއް ލިބުނު ކަމުގެ ރިޕޯޓެއް މިހާތަނަށް ލިބިފައެއް ނުވެއެވެ.

އަލިފާން ރޯވާން ދިމާވި ސަބަބު އަދި ސާފެއް ނުވެއެވެ.