ނ. އަތޮޅުގައި ހިންގަމުން އަންނަ ސޮނެވާ ޖާނީ ރިސޯޓުގެ ރެސްޓޯރަންޓެއްގައި މިއަދު މެންދުރުފަހު ނުރައްކާތެރި އަލިފާނުގެ ހާދިސާއެއް ހިނގައިފިއެވެ.

ފުލުހުން މައުލޫމާތު ދީފައިވާ ގޮތުގައި މި ހާދިސާގެ ރިޕޯޓު އެ އިދާރާއަށް ލިބިފައިވަނީ 2026 އޭޕްރީލް 12 ވީ އާދީއްތަ ދުވަހުގެ މެންދުރުފަހު 14:04 އެހައިކަންހާއިރުއެވެ. މި ހާދިސާ ހިނގުމާ ގުޅިގެން ފުލުހުންނާއި ސިފައިން ދަނީ އެ ސަރަހައްދުގައި ހަރަކާތްތެރިވަމުންނެވެ.

Ad by Hajj Corporation

އެމްއެންޑީއެފުން ބުނިގޮތުގައި ސޮނެވާ ޖާނީގައި ރޯވި އަލިފާން ނިއްވުމުގެ މަސައްކަތުގައި އެމްއެންޑީއެފް ނޮދަން އޭރިއާ ކޮމާންޑް، ޅ. ނައިފަރު ފަޔަރ ސްޓޭޝަނުގެ ސިފައިން ދަނީ ހަރަކާތްތެރިވަމުންނެވެ.

އަލިފާން ނިއްވުމުގެ މި މަސައްކަތުގައި ސިފައިންނާއި ފުލުހުންގެ އިތުރުން ރިސޯޓުގެ މުވައްޒަފުންވެސް ބައިވެރިވަމުންދާކަން ފާހަގަކުރެވެއެވެ.

މި ހާދިސާއާ ގުޅިގެން ފުލުހުން އެންމެ ފަހުން ދިން މައުލޫމާތުގައި ބުނެފައިވަނީ، އަލިފާންގަނޑު އަދި އެއްކޮށް ނިއްވާނުލެވުނު ނަމަވެސް، މިހާރު އަލިފާންގަނޑު ކޮންޓްރޯލް ކުރެވިފައިވާ ކަމަށެވެ.

މި ހާދިސާގައި މިހާތަނަށް އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައެއްނުވެއެވެ. ނަމަވެސް ރެސްޓޯރަންޓަށް ލިބުނު ގެއްލުންތަކުގެ ތަފްސީލެއް އަދި ސާފެއް ނުވެއެވެ. ހާދިސާގެ ފޮޓޯތަކުން ފެންނަގޮތުގައި އެތަނުގައި ވަނީ ވަރަށް ބޮޑަށް އަލިފާން ހިފާފައެވެ.