ދައްކަން މި އުޅެނީ ދެންމެ ދެންމެ ލިބިދާނެހެންހީވި ވަޒީފާގެ ފުރުސަތުތަށް ވީނުވީއެއް ނޭނގި ގެއްލިގެންގޮސް ދަރިވަރުންތަކަކަށް ލިބިގެންދިޔަ ދެރައިގެ ވާހަކައެވެ. ސަރުކާރަކުން ބަލައިނުލައި ރައްޔިތުންގެ ބަޖެޓުންކުރި އިސްރާފުގެ ވާހަކައެވެ. ގައުމުގެ ޒުވާނުންތަކެއްގެ ކުރިއެރުމަށް އެޅުނު ހިޔަނީގެ ވާހަކައެވެ. ދައްކަން މި އުޅެނީ އެމްޑީޕީ ސަރުކާރުގައި ޕައިލެޓްކަން ކިޔަވަންދިޔަ ޒުވާނުންގެ ކުރިމަގަށް ވާނެ ގޮތަކާމެދު އުފެދޭ ސުވާލުގެ ވާހަކައެވެ.

ރާއްޖެ ފަދަ ކުޑަ ކުޑަ ގައުމެއްގައި އެއް ފަހަރާ 500 އެއްހާ ޕައިލެޓުން ތަމްރީނުކުރުމަކީ ފައިދާހުރިކަމެއްތޯ އޭރުވެސް ގިނަ ބަޔަކު ސުވާލު އުފެއްދިއެވެ.

2023 ވަނަ އަހަރު އޭރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ލޯނަށް ކުރިމަތިލައި ޝަރުތު ހަމަވި 1،225 ދަރިވަރުންނަށް ލޯނު ދޭން އިއުލާނުކޮށްފައެވެ. އޭގެ ތެރޭގައި ޕައިލެޓްކަން ކިޔަވަން ލޯނަށް އެދުނު 479 ދަރުވަރުން ހިމެނޭއިރު މި ނިންމުމަށް ގިނަ ބައެއްގެ ފާޑުކިޔުން އޭރުވެސް އަމާޒުވިއެވެ.

މިއީ ރަނގަޅު އިންވެސްޓްމަންޓެއްކަމަށް ގިނަ ފަރާތްތަކުން ގަބޫލުކުރެއެވެ. ނަމަވެސް ކަމުނުގޮސްގެން މި އުޅެނީ އެމްޑީޕީ ސަރުކާރުގައި ކަން ކޮށްފައިވާގޮތެވެ. ޕައިލެޓް ޓްރެއިނިން އަށް ލޯނުގެ ގޮތުގައި މީހަކަށް 1.7 މިލިއަން ރުފިޔާ އާއި 2.5 މިލިއަން ރުފިޔާއާ ދެމެދުގެ އަދަދެއް ދޫކުރެއެވެ. ކޯސް ފީ އަކީ 9 ލައްކަ ރުފިޔާއާއި 1.46 މިލިއަން ރުފިޔާއާ ދެމެދުގެ އަދަދެކެވެ. 2023 ވަނަ އަހަރު ކޯސް ނިންމި ފަސްދޮޅަހެއްހާ ދަރިވަރުން މިހާރުވެސް ތިބީ ވަޒީފާ ނުލިބިފައެވެ. ޗެކްރިޕަބްލިކް އަދި ފިލިޕީންސްގައި މިހާރުވެސް އެތަކެއް ދަރިވަރުން އަންނަނީ މި ރޮނގުން ތައުލީމު ހާސިލުކުރަމުންނެވެ.

މިކަމުގައި ބެލެނިވެރިން ފާޅުކުރި ޝުއޫރުތައް އެތަށް ފަހަރެއްގެ މަތިން އަޅުގަނޑުމެން ވާނީ ގެނެސްދީފައެވެ. ބެލެނިވެރިންގެ ނަޒަރުގައި މިގޮތަށް މިކަން ކޮށްފައިވަނީ އެމްޑީޕީ ސަރުކާރުގެ އިސް ބައެއް މީހުންގެ ކުދިން ޕައިލެޓްކަން ކިޔެވުމަށް ބޭނުންވާތީ އެކަމަށް މަގުފަހިކޮށްދިނުމުގެ ގޮތުންނެވެ. ވަގުތީ މަންފާއަކަށް ބެލުމަށްފަހު މިފަދަކަމެއް އެމްޑީޕީ ސަރުކާރުންކޮށް ނިންމާލީ 2023 ވަނަ އަހަރުގެ ރިޔާސީ އިންތިހާބު ބޯމަތިވެފައިވާތީ އިންތިހާބު ކާމިޔާބުކުރުމަށްކަމަށްކަމަށް ބެލެނިވެރިން ބުނެއެވެ. އެއާއެކު ދައުލަތުގެ ބަޖެޓަކީ އެއްވެސް ބަޔަކު އެބަޔަކު "މޮޑެންއޮތް ފުށްގަނޑެއް" ނޫންކަމަށް ބެލެނިވެރިން ބުނެއެވެ.

މިކަން ބޮޑުވުމާއެކު މި ސަރުކާރަށް ޖެހުނީ ޕައިލެޓް ކޯސް ކިޔަވަން ދޫކުރާ ލޯނުތަކުގެ ފުރުސަތުތަށް މަދުކޮށްލާށެވެ. މިއަހަރު ކޯހަށް ދޫކުރީ އެންމެ 10 ޖާގައެވެ. ކުދިން ފޮނުވީ ކުރީ ސަރުކާރުގައި ކަންކުރި އުސޫލަށް ބަލައި ދަރިވަރުންނަށް ކަމުގެ "ދެފުށް" ކިޔައިދީފައެވެ.

ކޮންމެ ސަރުކާރަކުންވެސް މަތީ ތައުލީމީ ފުރުސަތުތަަކަށް ބަޖެޓުން ބޮޑު ބައެއް ހޭދަކުރެއެވެ. ނަމަވެސް ވިސްނަންވީ ގައުމަށް ބޭނުންތެރި ދާއިރާތަކުން މީހުން ބިނާކުރުމަށް އިސްކަންދިނުމަށެވެ.

މި ސަރުކާރުގެ މަތީ ތައުލީމީ ވައުދުތަކަށް ބަލާލާއިރު ވަޒީފާގެ ފުރުސަތު ފަހިކުރުމަށްޓަކައި އެންމެންނަށް ވަޒީފާގެ ސިޔާސަތެއް ކަނޑައެޅުން ހިމެނެއެވެ. މަގުސަދަކީ ރާއްޖޭގެ ވަޒީފާގެ ބާޒާރުގައި ދިވެހިންގެ ހިއްސާ އިތުރުކޮށް ކުރިމަގުގައި ބިދޭސީންނަށް ބަރޯސާވުން ކުޑަކުރުމެވެ.

އެއާއެކު ދިވެހި ޒުވާނުންގެ ޝައުގުވެރިކާމާއި ހުނަރުވެރިކަން ހުރި ދާއިރާތައް ދިވެހިންނަށްވަނީ ހާއްސަކޮށްފައެވެ. އެގޮތުން 22 މަސައްކަތެއް ދިވެހިންނަށް ހާއްސަކޮށްފައިވާއިރު މި މަސައްކަތްތަކަށް ދިވެހިން ތަމްރީނުވުމަށްފަހު ބިދޭސީން ގެނައުން ހުއްޓާލާނެއެވެ.

މީގެ އިތުރުންވެސް މުހިންމު ވައުދުތަކެއް އެކަަށައެޅި އެ އަމާޒުތަކަށް ވާސިލުވުމަށް ދަނީ މަސައްކަތެއް ކުރެވެމުންންވެ. ކިޔަވައިގެން އަންނަ ކުދިން ބާކީ ނުކުރުމުގެ ސިޔާސަތުގެ ދަށުން މި ސަރުކާރުގައި ޕައިލެޓްކަން ކިޔަވައިގެން ރާއްޖެ އައި ކުދިން އޭވިއޭޝަން ދާއިރާގެ އެހެން ވަޒީފާއެއް އާދާކުރުމުގެ މަގު ވަނީ ފަހިކޮށްދީފައެވެ.

ކޮންމެއަކަށް މިފަހަރުވެސް މިއޮތީ އެމްޑީޕީން ޖެހި ހިސާބު ދިމާނުވެފައެވެ. ވެރިކަން ބަދަލުވިޔަސް އަދިވެސް މިކަމުން އަރައިގަނެވޭކަށްނެތެވެ. އަދިވެސް ދަރިވަރުންނަށް އޮތް ހަމައެކަނި ގޮތަކީ ރާއްޖެއިން ބޭރަށް ވަޒީފާ އަދާކުރަން ދިއުމެވެ. ނުވަތަ "ގޭނިގެން" ހޯދި ސެޓްފިކެޓް އަލަމާރިއަށްލައިގެން ލޯނު ދައްކާލަ ދައްކާލައި ހުރުމެވެ. ނުވަތަ އުއްމީދު ހާސިލުވާނެކަމަށް ހިތައް ކިޔެވި ދާއިރާ އިން ބޭރުން އެހެން ވަޒީފާއެއް އަދާކުރުމުގައި ހުންނަންޖެހުމެވެ. ދައުލަތުގެ ބަޖެޓުން ކުރި ބޮޑު އިސްރާފަށް ޒިންމާވާނެ ބަޔަކުވެސް މިއަދަކު ނެތެވެ.