މި ސަރުކާރު ހަވާލުވި ފަހުން ރާއްޖެއަށް ލިބެމުންދާ ފާހަގަކޮށްލެވޭ ކުރިއެރުންތަކާއި ތަރައްޤީއަށް ޔުނައިޓެޑް އެރަބް އެމިރޭޓްސް (ޔޫ.އޭ.އީ) އިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ހިޒް އެކްސެލެންސީ ޝައިޚް ރަޙްމާ ބިން ޢަބްދުއްރަޙްމާން އަލްޝާމްސީ ތައުރީފް ކުރަށްވައިފިއެވެ.

ޔޫއޭއީ ސަފީރު މިފަދައިން ތައުރީފް ކުރެއްވީ އެމަނިކުފާނުގެ ސަފީރުކަމުގެ ދައުރު ހަމަވުމާ ގުޅިގެން، މިއަދު ހެނދުނު ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ އަރިހަށް ކުރެއްވި ވަދާއީ ޒިޔާރަތުގައެވެ.

Ad by Hajj Corporation

ރައީސް އޮފީހުން ހާމަކުރެއްވި ގޮތުގައި، ރައީސް އޮފީހުގައި ކުރިއަށް ދިޔަ މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ސަފީރުގެ ދައުރުގައި ދެ ޤައުމުގެ ދެމެދުގައި އޮތް ގުޅުން ބަދަހިކުރުމަށް ކުރެއްވި މުހިންމު މަސައްކަތްޕުޅުތަކާއި ދެއްވި އެއްބާރުލުމަށްޓަކައި އިޚްލާޞްތެރިކަމާއެކު ޝުކުރު އަދާކުރެއްވިއެވެ. އަދި ދެ ޤައުމުގެ ދޭދޭ ގުޅުން ހަރުދަނާކުރުމުގައި ހޯދިފައިވާ ކުރިއެރުންތައް އެމަނިކުފާނު ފާހަގަކުރެއްވިއެވެ.

މި ބައްދަލުކުރެއްވުމުގައި ޔޫ.އޭ.އީ ސަފީރު ދެއްކެވި ވާހަކަފުޅުގައި، މި ސަރުކާރު ވެރިކަމާ ހަވާލުވި ފަހުން ރާއްޖެއަށް ލިބެމުންދާ ފާހަގަކޮށްލެވޭ ކުރިއެރުންތަކާއި ތަރައްޤީއަށް ވަނީ ބޮޑަށް ތަޢުރީފު ކުރައްވާފައެވެ.

ރައީސުލްޖުމްހޫރިއްޔާ ވަނީ ޔޫ.އޭ.އީ ސަރުކާރާއެކު އޮތް ގާތް ގުޅުން ދެމެހެއްޓުމަށް މަސައްކަތްކުރައްވާނެ ކަމުގެ ޔަޤީންކަން ދެއްވައި، ކުރިއަށް އޮތް މަސްތަކުގައި ދެ ޤައުމުގެ ގުޅުން އިތުރަށް ވަރުގަދަވެގެންދާނެ ކަމަށް އުންމީދުކުރައްވާ ކަމަށް ވިދާޅުވެފައެވެ.

މި ބައްދަލުކުރެއްވުން ނިންމަވާލެއްވީ، ދިވެހިރާއްޖެއާއި ޔޫ.އޭ.އީ އާ ދެމެދު އޮތް ޒަމާންވީ ގުޅުން އިތުރަށް ބަދަހިކުރުމަށް ދެ ފަރާތުންމެ މަސައްކަތްކުރައްވާނެ ކަމުގެ ޔަޤީންކަން އަލުން ދެއްވަމުންނެވެ.