ޗެމްޕިއަންސް ލީގުގެ ޕްލޭ-އޮފްގެ ދެވަނަ ލެގުގައި މޮނާކޯއާ ވާދަކޮށް 2-2 އިން މެޗު އެއްވަރުވި ނަމަވެސް، އެގްރިގޭޓް 5-4 ގެ ނަތީޖާއަކުން މޮޅުވެ މުބާރާތުގެ އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) މުބާރާތުގެ ގަދަ 16 އަށް ދަތުރުކޮށްފިއެވެ.

ޕާކް ޑެސް ޕްރިންސަސްގައި ކުޅުނު މި މެޗުގެ ފުރަތަމަ ހާފު ނިމެން ކައިރިވެފައި ވަނިކޮށް މޮނާކޯގެ މެގްނަސް އަކްލިއޫޝް ލަނޑެއް ޖަހައި އެގްރިގޭޓް ނަތީޖާ ހަމަހަމަކުރިއެވެ. ނަމަވެސް، މޮނާކޯގެ މަމަދޫ ކުލިބާލީއަށް ދެއްކި ރަތް ކާޑާއެކު މެޗުގެ އޮއިވަރު ޕީއެސްޖީ ކޮޅަށް އެނބުރުނެވެ. ކުލިބާލީއަށް ދެ ރީނދޫ ކާޑާއެކު ރަތް ކާޑު ދެއްކީ މެޗުގެ ދެވަނަ ހާފުގެ ކުރީކޮޅުގައެވެ.

Ad by Hajj Corporation

މޮނާކޯގެ ކުޅުންތެރިއަކު މަދުވުމުގެ ފައިދާ ނަގައި، ޕީއެސްޖީގެ ކެޕްޓަން މާކީނިއޯސް ވަނީ 60 ވަނަ މިނެޓުގައި ލަނޑެއް ޖަހައި އެ ޓީމަށް ކުރިހޯދައިދީފައެވެ. އޭގެ ހަ މިނެޓު ފަހުން ހްވިޗާ ކްވަރަޓްސްކޭލިއާ ވަނީ ޕީއެސްޖީގެ ދެވަނަ ލަނޑު ޖަހައިދީފައެވެ. މޮނާކޯގެ ޖޯޑަން ޓޭޒޭ މެޗުގެ އިތުރު ވަގުތުގައި ލަނޑެއް ޖެހި ނަމަވެސް، އެ ޓީމަށް އެގްރިގޭޓް ނަތީޖާ އެއްވަރުކުރެވޭ ގޮތެއް ނުވިއެވެ.

މި މެޗުގެ ތަފާސްހިސާބުތަކަށް ބަލާއިރު، ޕީއެސްޖީން ވަނީ މޮނާކޯގެ ގޯލަށް 21 ހަމަލާ ފޮނުވާލާފައެވެ. މޮނާކޯއަށް ފޮނުވާލެވުނީ 9 ހަމަލާއެވެ. މޮނާކޯގެ ކޯޗު ސެބަސްޓިއަން ޕޮކޮގްނޯލީގެ ޓީމަށް މި ދެ ލެގުގައިވެސް ކުރިމަތިވި އެންމެ ބޮޑު ގޮންޖެހުމަކީ ދެ މެޗުގައިވެސް ރަތް ކާޑު ފެނުމެވެ. މިއީ ޗެމްޕިއަންސް ލީގުގެ ނޮކްއައުޓް ބުރުގެ ދެ ލެގުގައިވެސް މޮނާކޯގެ ކުޅުންތެރިއަކަށް ރަތް ކާޑު ދެއްކި ފުރަތަމަ ފަހަރެވެ.

މި ސީޒަނުގެ ޗެމްޕިއަންސް ލީގުގައި މިހާތަނަށް 33 ރަތް ކާޑު ދައްކާފައިވާއިރު، މިއީ މުބާރާތުގެ ތާރީޚުގައިވެސް އެންމެ ގިނަ ރަތް ކާޑު ފެނިގެންދިޔަ ސީޒަނެވެ. ޕީއެސްޖީން މި މޮޅާއެކު ގަދަ 16 އަށް ދަތުރުކުރިއިރު، އެ ޓީމުގެ އަމާޒަކީ މި އަހަރުވެސް ތަށި ދިފާއުކުރުމެވެ.