ސަރުކާރުން ފޯރުކޮށްދީފައިވާ ސޯޝަލް ހައުސިންގ ޔުނިޓުތަކުގައި ދިރިއުޅެމުންދާ ފަރާތްތަކުގެ ދިރިއުޅުމުގެ ހާލަތު ރަނގަޅުކުރުމަށްޓަކައި، އެތަންތަން މަރާމާތުކުރުމުގެ ފުރުސަތު ދިނުމަކީ ސަރުކާރެއްގެ ވިއްޔާ ޒިންމާއެއް ކަމަށާއި އެއްވެސް ހާލެއްގައި އެއީ ރިޝްވަތެއް ނޫންކަމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަހަރުގެ ރިޔާސީ ބަޔާނުގައި އިއުލާނުކުރައްވާފައި ވާފަދައިން، ކޮންމެ ހޯމަ ދުވަހަކު ނޫސްވެރިންނާ ބައްދަލުކުރެއްވުމުގެ ސިލްސިލާގެ ފުރަތަމަ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ވިދާޅުވީ، މާލެސިޓީގެ ގަލޮޅު އަވަށުގައި ހުންނަ ސިނަމާލެ އަދި މާލޭހިޔާގެ ފްލެޓްތަކުގައި ދިރިއުޅޭ ފަރާތްތަކަށް ކުރިމަތިވެފައިވާ ދަތިތަކަށް ހައްލެއް ހޯއްދަވައިދެއްވުމުގެ ގޮތުން، އެ ފްލެޓްތަކުގެ ޖޫރިމަނާ މާފުކޮށްދެއްވުމަށާއި ކޮންމެ ފްލެޓަކަށް އެއްލައްކަ ރުފިޔާގެ އިނާޔަތެއް ދެއްވުމަށް ނިންމެވި ނިންމެވުމަކީ ލޯކަލް ކައުންސިލް އިންތިޚާބާ ދިމާކޮށް ނިންމެވި ނިންމެވުމެއް ނޫންކަމަށާއި، އެކަމަކީ އެމަނިކުފާނުގެ ރިޔާސީ މެނިފެސްޓޯގައި ހިމަނުއްވާފައިވާ، އަދި އޭގެ އިތުރުން ރިޔާސީ އިންތިޚާބުގެ ކެމްޕެއިން ދުވަސްވަރުވެސް އެތައް ޕޯޑިއަމެއްގައި އެކަމުގެ ވާހަކަދައްކަވާފައިވާ ކަމެއް ކަމަށެވެ.

Ad by Hajj Corporation

ރައީސްގެ ޖަވާބުގައި ވަނީ، 1990 ގެ އަހަރުތަކުގައި އެންމެ ފުރަތަމަ އިމާރާތް ކުރެވެންފެށި ސިނަމާލެ ފްލެޓުތައް މިހާރު ހުރި ހާލަތު ވަރަށް ރަނގަޅަށް ބަޔާންކޮށްދެއްވާފައެވެ. އެގޮތުން، ސިނަމާލެ އަދި މާލެ ހިޔާ ފްލެޓުތައް ހުޅުވުނު ހިސާބުން ފެށިގެން އެތަންތަން ހަރުދަނާ އުސޫލެއްގެ މަތިން ބެލެހެއްޓިފައި ނުވާތީ އެތަންތަން ހުރީ ޝީޓުން ތަންތަން ފަޅަފަޅައިގެންގޮސް، ޝީޓުން ތަންތަން މީހުންގެ ބޯމައްޗަށް ވެއްޓެމުންދާ ކަމަށާއި، އެތަނުން ފެން ލީކުވުމުގެ އިތުރުން ފާޚާނާތައްވެސް ހުރީ ހަލާކުވެފައި ކަމަށް ރައީސް ވިދާޅުވިއެވެ.

ރައިސް ވިދާޅުވީ، މުޅި ރާއްޖޭގެ އެކި ހިސާބުތަކުން ސޯޝަލް ހައުސިންގ ޔުނިޓުތައް ލިބިފައިވާ ފަރާތްތަކުން ދައްކަން ޖެހިފައިވާ ޖޫރިމަނާތައް މާފުކޮށްދެއްވުމަކީވެސް އެމަނިކުފާނުގެ ރިޔާސީ ވައުދެއް ކަމަށާއި، އެކަން ކުރުމަށް 2024 ވަނަ އަހަރުގެ ކުރީކޮޅު ކެބިނެޓުން ނިންމާ، އެކަން ތަންފީޒުކުރުމަށް ކަމާބެހޭ ކައުންސިލްތަކަށް އަންގަވާފައިވާނެ ކަމަށެވެ.

މި އިމާރާތްތައް މަރާމާތު ނުކޮށް ދޫކޮށްލެވިފައި ވުމުގެ ސަބަބުން މިހާ ބޮޑަށް ހަލާކުވެފައިވަނީ ބައެއް ފަރާތްތަކުން މިތަންތަނަށް ފައިސާ ދައްކާ ނިންމާ، އެތަންތަން މިލްކުވެސް ކޮށްފައިވަނިކޮށްކަން ރައީސް ފާހަގަކުރެއްވާ، ރައީސް ވަނީ، ރިޔާސީ އިންތިޚާބުގައި އެމަނިކުފާނު ވައުދުވެވަޑައިގަތް ގޮތަށް، އެތަނުގައި ދިރިއުޅޭ މީހުނަށް އައު އިމާރާތެއް އަޅައިދީ، އެތަނަށް ބަދަލުކުރެވެންދެންވެސް މާލެ ހިޔާ އަދި ސިނަމާލެ ފްލެޓުތަކުގައި މީހުން އުޅެންޖެހޭކަން ފާހަގަކުރައްވާފައެވެ. ނަމަވެސް، އެތަނުގައި މިހާރު ދިރިއުޅެވެން އޮތީ ކޮންމެވެސް ވަރަކަށް އެތަންތަން މަރާމާތުކޮށްގެންކަން ފާހަގަކުރައްވާ، ރައީސް ވަނީ މިކަމުގައި މާލެ ސިޓީ ކައުންސިލްގެ އެއްބާރުލުން އެއްވެސް ވަރަކަށް ނުލިބޭކަން ފާހަގަކުރައްވާފައެވެ. އެހެންކަމުން އެތަންތަނުގައި ދިރިއުޅޭ ފަރާތްތަކުން އެތަންތަން މަރާމާތުކުރުމަށްޓަކައި އެހީވުމަށް ނިންމާފައިވަނީ ކެބިނެޓުގައި މަޝްވަރާކުރެއްވުމަށްފަހުގައި ކަމަށް ރައީސް ވިދާޅުވިއެވެ.

ސުވާލުކުރި ނޫސްވެރިޔާގެ މައުލޫމާތު ދޮގުކަމަށް ވިދާޅުވެ، ރައީސްގެ ޖަވާބު ފައްޓަވަމުން ވަނީ ނޫސްވެރިންގެ މައުލޫމާތު ތެދުކަން ކަށަވަރުކުރުމަށް ތަކުރާރުކޮށް ގޮވާލައްވާފައެވެ.