ސަރުކާރުން ފައިސާ ދޭންޖެހޭ އަމިއްލަ ކުދި ވިޔަފާރި ކުންފުނިތަކުގެ ތެރެއިން 1 މިލިޔަން ރުފިޔާއަށްވުރެ މަދުން ފައިސާ ދޭންހުރި ކުންފުނިތަކަށް އަންނަ ހަފުތާގައި އެކަނިވެސް 200 މިލިޔަން ރުފިޔާ ސަރުކާރުން ދައްކާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސުލްޖުމްހޫރިއްޔާ ވިދާޅުވީ، ރާއްޖޭގެ އިޤްތިޞާދީ ހާލަތު އޮތީ ރަނގަޅަށް ކަމަށާއި، ދަރަނި ދެއްކުމުގައި އެއްވެސް ދަތިކަމެއް ނެތް ކަމަށެވެ. އަދި ދަރަނި ދައްކަމުންވެސް ސަރުކާރުން އެކިއެކި ފަރާތްތަކަށް ދޭންޖެހޭ ފައިސާ ދެމުންދާކަން އެމަނިކުފާނު ފާހަގަކުރެއްވިއެވެ.

Ad by Hajj Corporation

ރައީސް ވިދާޅުވި ގޮތުގައި ކުދި ވިޔަފާރިތަކަށް ސަރުކާރުން ދޭންހުރި ފައިސާގެ ކޮންމެވެސް މިންވަރެއް ކޮންމެ ހަފުތާއެއްގައިވެސް ދަނީ ދޫކުރަމުންނެވެ. އެގޮތުން ކުރިއަށް އޮތް ހަފުތާއަކީ ކުދި ވިޔަފާރިތަކަށް ޚާއްޞަ އިސްކަމެއް ދީގެން ބޮޑު އަދަދެއް ދޫކުރާނެ ހަފުތާއެއް ކަމަށް އެމަނިކުފާނު ވިދާޅުވިއެވެ.

ކުރިއަށްއޮތް ހަފުތާއަކީވެސް މިގޮތުން ކުދި ވިޔަފާރިތަކަށް ރާއްޖޭގައި މަސައްކަތްކުރާ ކުދި ވިޔަފާރިތަކުން ނުވަތަ ކުންފުނިތަކުން ސަރުކާރުން ކޮށްފައި ހުރި މަސައްކަތްތަކަށް ދޭންހުރި ފައިސާގެ މަދުވެގެން 200 މިލިޔަން ރުފިޔާ ދޭނެ ހަފުތާއެއް ކަމަށް ރައީސް ވިދާޅުވިއެވެ. އަދި ކޮންމެ ހަފްތާއަކުވެސް ކޮންމެވެސް އަދަދެއް ދޫކުރަމުން ގެންދަވާކަމަށް ރައީސް ވިދާޅުވިއެވެ.

'' އަޅުގަނޑުމެން އިސްކަން މިދެނީ ކުދި އެމައުންޓްސްތަކުން ޕޭކުރަންހުރި ވެންޑާސްތަކަށް. މިއަންނަ ހަފުތާގައި އަޅުގަނޑުމެން ދޭނީ 1 މިލިޔަން ރުފިޔާއަށްވުރެ މަދުން ފައިސާ ދޭންހުރި ބިލްތަކަށް." ރައީސް ވިދާޅުވިއެވެ.

ކުދި އަދި މެދު ފަންތީގެ ވިޔަފާރިތައް މާލީ ގޮތުން ކުރިއެރުވުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރަމުންނެވެ. އެގޮތުން، ސަރުކާރުން ރާއްޖޭގެ ވިޔަފާރިތަކުގެ ބިލުތަކަށް މިދިޔަ އަހަރުގެ ތެރޭގައި އެކަނިވެސް 6.3 ބިލިޔަނަށްވުރެ ގިނަ ރުފިޔާ ދައްކާފައިވާކަން ފާހަގަކުރެވެއެވެ.