ސަރުކާރުން ދައްކަންޖެހޭ ސުކޫކު ދެއްކުމަށްޓަކައި 650 މިލިޔަން ޑޮލަރަށްވުރެ ގިނަ ފައިސާ ރައްކާކޮށްފައި އެބަހުރިކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.

Ad by Hajj Corporation

ނޫސްވެރިންގެ ބައްދަލުވުމުގައި ރައީސް ވިދާޅުވީ ރާއްޖޭގެ ގްރޮސް ރިޒާވްގައި މިހާރު 1.27 ބިލިޔަން އެމެރިކާ ޑޮލަރު އެބަހުރި ކަމަށެވެ. މިއީ ރާއްޖޭގެ ތާރީޚުގައި ދުވަހަކުވެސް ގްރޮސް ރިޒާވް މައްޗަށް ނުދާ މިންވަރެއްކަން ރައީސް ފާހަގަކުރެއްވިއެވެ.

ރިޒާވްގެ ތަފްސީލް ހިއްސާކުރައްވަމުން ރައީސް ވިދާޅުވީ، އެސްޑީއެފްގައި 320 މިލިޔަން ޑޮލަރަށްވުރެ ގިނައިން  ރޭގެ ނިޔަލަށް ރައްކާކުރެވިފައި ހުރިކަމަށެވެ.

''ޔޫސަބަލް ރިޒާވުގަ 330 މިލިޔަން ޑޮލަރަށްވުރެ ގިނަ ފައިސާ އެބަހުރި، އެހެންވީމަ ޖުމްލަ 650 މިލިޔަން ޑޮލަރަށްވުރެ ގިނަ ފައިސާ އެބަހުރި ރައްކާކޮށްފައި،" ރައީސް ވިދާޅުވިއެވެ.

މީގެ އިތުރުން، މިއަހަރަށް ބޭނުންވާ އިތުރު ފައިސާ ހޯދުމަށްވެސް ގިނަ މަސައްކަތްތަކެއް ކުރެވެމުންދާ ކަމަށާއި، ދަރަނި ދެއްކުމުގައި އެއްވެސް ކަންބޮޑުވުމެއް ނެތް ކަމަށް ރައީސް ވިދާޅުވިއެވެ. އިޤްޞާދު މެނޭޖްކުރަމުންދަނީ ބޭރަށް ދައްކަންޖެހޭ ދަރަންޏާއި އެތެރޭގެ ދަރަނިވެސް ދެއްކޭނެ އިންތިޒާމުތަކާއެކު ކަމަށް އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ، ދަރަނި ދެއްކުމާ ގުޅޭގޮތުން ވަރަށް ކާމިޔާބު މުޢާމަލާތްތަކެއް ކުރިއަށްދާ ކަމަށާއި، ބައެއް ނެގޯސިއޭޝަންތައް މިހާރު ވަނީ ނިންމުމަކާ ހަމައަށް ގޮސްފައި ކަމަށެވެ. މިއާއެކު ދައުލަތުގެ މާލީ ހާލަތު ރަނގަޅު ކުރުމަށް ކުރަމުންދާ މަސައްކަތްތަކަށް ބޮޑު ކުރިއެރުމެއް ލިބިގެންދާނެ ކަމަށް ބެލެވެއެވެ.