ރާއްޖެއަށް ބޭނުންވާ ތެލާއި ކާބޯތަކެތި ގެނައުމުގައި އެއްވެސް ދަތިކަމެއް ނެތް ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދެއްވައިފިއެވެ.

ރައީސް މިހެން ވިދާޅުވީ މެދުއިރުމަތީގެ މަސްރަހަށް އަންނަމުންދާ ބަދަލުތަކާ ގުޅިގެން ރާއްޖެއިން އަޅަމުންދާ ފިޔަވަޅުތަކާ ބެހޭގޮތުން ނޫސްވެރިންނަށް މައުލޫމާތު ދެއްވަމުންނެވެ.

Ad by Hajj Corporation

މެދުއިރުމަތީގެ ހަމަނުޖެހުންތަކުގެ ސަބަބުން ރާއްޖެއަށް ކޮށްފާނެ އަސަރުތައް ދެނެގަތުމަށާއި، އެކަންކަމަށް ދުރާލާ ތައްޔާރުވުމުގެ ގޮތުން ރައީސުލްޖުމްހޫރިއްޔާ ވަނީ ވަޒީރުންގެ ޚާއްޞަ ކޮމެޓީއެއް އެކުލަވާލައްވާފައެވެ. މި ކޮމެޓީގެ މަސައްކަތަކީ މަސްރަހަށް އަންނަ ބަދަލުތައް މޮނިޓަރކޮށް، ރާއްޖޭގެ އިގްތިސާދަށާއި ރައްޔިތުންނަށް ލިބިދާނެ ގެއްލުންތަކުން ސަލާމަތްވުމަށް އަޅަންޖެހޭ ފިޔަވަޅުތައް އެޅުމެވެ.

ރައީސް ވިދާޅުވިގޮތުގައި މިވަގުތު ތެލާއި ކާބޯތަކެތި ލިބުމުގައި އެއްވެސް ދައްޗެއް ރާއްޖެ އަކަށް ނެތެވެ.

''އަޅުގަނޑުމެންނަށް ހަމަ ރަނގަޅަށް އެކަން އޮތީ ހަމަޖެހިފައި. އެއްވެސް ވަރަކަށް ތެޔޮ ކުރިއަށް އޮތް ދުވަސްތަކުގައި އަޅުގަނޑުމެންނަށް ނުލިބޭނެ ކަހަލަ ގޮތަކަށެއް އަދި ނެތް އެއްވެސް ވަރަކަށް ކަންބޮޑުވާންޖެހޭ ކަހަލަ އެއްވެސް ކަމެއް އިރާދަކުރެއްވިއްޔާ. ތެލުގެ އިޝޫއެއް ނެތް. ކާބޯތަކެތީގެ އިޝޫ އެއްވެސް ނެތް." ރައީސް ވިދާޅުވިއެވެ.

ރައީސް ވިދާޅުވީ، ރާއްޖެއިން ބޭރުގައި، ހާއްސަކޮށް މެދުއިރުމަތީގެ ގައުމުތަކުގައި ދިރިއުޅޭ ދިވެހިންނާއި ކިޔަވާ ކުދިންގެ ހާލަތު ސަރުކާރުން ވަރަށް ގާތުން ބަލަމުންދާ ކަމަށެވެ. އަދި އެ ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރުމަށް ކުރަންޖެހޭ މަސައްކަތްތައް ފޮރިން މިނިސްޓްރީ މެދުވެރިކޮށް ކުރިއަށްދާ ކަމަށްވެސް އެމަނިކުފާނު ފާހަގަކުރެއްވިއެވެ.

ފަތުރުވެރިކަމުގެ ދާއިރާއަށް ކުރާނެ އަސަރުތައް ކުޑަކުރުމަށްޓަކައި ސަރުކާރުން ދަނީ ހާއްސަ ފިޔަވަޅުތަކެއް އަޅަމުންކަމަށް ރައީސް ވިދާޅުވިއެވެ. އެގޮތުން، މެދުއިރުމަތީގެ ގައުމުތައް މެދުވެރިކޮށް (ޓްރާންސިޓްކޮށް) ރާއްޖެއަށް އަންނަ ފްލައިޓްތަކަށް ދަތިތަކެއް ކުރިމަތިވެފައިވާތީ، އެހެން މަގުތަކުން ރާއްޖެއަށް އާދެވޭނެ އިންތިޒާމްތައް ހަމަޖެއްސުމުގެ މަސައްކަތް ދަނީ ކުރަމުންނެވެ.

މީގެ އިތުރުން، ދަތުރުފަތުރުގެ ދަތިތަކާ ހުރެ ރާއްޖެއިން ނުފުރި ތިބި ފަތުރުވެރިންނަށް އެހީތެރިކަން ފޯރުކޮށްދިނުމުގެ މަސައްކަތްވެސް ސަރުކާރުން ދަނީ ކުރަމުންކަމަށް ރައީސް ވަނީ ވިދާޅުވެފައެވެ. މިގޮތުން، އެއަރލައިންތަކާ ގުޅިގެން އެ ފަރާތްތަކަށް ބަދަލު ފްލައިޓްތައް ހޯދައިދިނުމާއި، އެނބުރި ގައުމަށް ދެވޭނެ މަގުތައް ފަހިކޮށްދިނުމަށް އިސްކަންދޭނެ ކަމަށް ރައީސް ވިދާޅުވިއެވެ.