ގިރާވަރު ފަޅު ހިއްކާ ނިންމުމަށްފަހު ދެން ހިއްކުމުގެ މަސައްކަތް ފަށާނީ އުތުރު ތިލަފަޅުކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ގިރާވަރުފަޅު ހިއްކުމުގެ މަސައްކަތް ނިންމުމަށްފަހު ދެން އެންމެ އަވަހަށް ހިއްކުމުގެ މަސައްކަތް ފަށާނީ އުތުރު ތިލަފަޅުކަމަށެވެ. ރައީސް ވިދާޅުވީ އުތުރު ތިލަފަޅުގައި މީހުން ދިރިއުޅުމަށް ޚާއްސަ ސަރަޙައްދެއްގެ އިތުުރުން ސިނާޢީ މަސައްކަތްތަކާއި "ހޯޕް އައިލެންޑް" އެރަށުގައި ތަރައްޤީ ކުރާނެކަމަށެވެ.

އުތުރު ތިލަފަޅުގައި ކުރިއަށްގެންދިޔުމަށް ނިންމާފައިވާ ބައެއް މަޝްރޫޢުތަކަށް ބަލާއިރު، ބޭރު ގައުމުތަކަށް ރާއްޖެ ބަރޯސާވާ ބާރޯސާވުން ކުޑަކޮށް، އަމިއްލައަށް ފުދިގެން އުޅެވޭނެފަދަ ގިނަ މަޝްރޫތަކެއް ފެނިގެންދެއެވެ. އެގޮތުން، ދެ ފިޔަވައްސެއްގެ މައްޗަށް އެކުލެވޭ 200 ހެކްޓަރުގެ އެގްރިކަލްޗަރ އިކޮނޮމިކް ޒޯނެއް ތަރައްޤީކުރުމަށްނިންމާފައިވެއެވެ. އެގްރިކަލްޗަރ ޒޯނުގެ ފުރަތަމަ ފިޔަވަހީގައި ތަރައްގީކުރެވިގެންދާ ގްރީން ހައުސްތަކުގައި މައިގަނޑު ގޮތެއްގައި ހެއްދުމަށް ހަމަޖެހިފައިވަނީ ރާއްޖެއަށް އެތެރެކުރާ ބާވަތްތަކުގެ ތެރެއިން ގްރީން ހައުސްގައި ހެއްދޭ، ޓޮމާޓޯ، ކިއުކަމްބާ އަދި ކެރެޓުފަދަ ބާވަތްތަކެވެ. އަދި ދެވަނަ ފިޔަވަހީގައި ތަރައްޤީކުރުމަށް ހަމަޖެހިފައިވަނީ ބިމު އަޑިއަށް ފައިބާ ބާވަތްތަކުގެ ތެރެއިން ފިޔާ، އަލުވި ފަދަ ކޮންމެ ދުވަހެއްގެ ކެއުމުގައި ހިމެނޭ ބާވަތްތަކެވެ. ހަމައެއާއެކު ދެވަނަ ފިޔަވަހީގައި ކުކުޅު އާލާކޮށް ރާއްޖެއަށް ކުކުޅު ބިސް އެތެރެކުރުން އެއްކޮށް ހުއްޓާލެވޭނެ ފެންވަރުގެ ޕޯލްޓްރީ ފާމެއް ތަރައްޤީކުރުމަށްވަނީ ހަމަޖެހިފައެވެ.

އެރަށުގައި ދެން ކުރިއަށްގެންދާ އަނެއް މަޝްރޫޢަކީ ކުށުގެ މާޙައުލަށް ހުށައެޅޭ ކުދިން ރީހެބިލިޓޭޓްކުރުމަށް ހަދާ "ހޯޕް އައިލެންޑް"އެވެ. ކުށަށް އަރައިގަތުމުގެ ނުރައްކަލުގައިވާ ކުދިންނަށް ބޭނުންވާ ފަރުވާ ފޯރުކޮށްދިނުމަށާއި އިޞްލާޙީ އަދި ރީހެބިލިޓޭޝަން ޕްރޮގްރާމްތައް ހިންގުމަށްޓަކައި ޤާއިމުކުރުމަށް ހަމަޖެހިފައިވާ މި މަޝްރޫޢަށް އުތުރު ތިލަފަޅުން 15 ހެކްޓަރުގެ ބިން ހިއްކުމަށް ހަމަޖެހިފައިވެއެވެ. އެތަން ތަރައްޤީކުރަނީ 700 މީހުންގެ ޖާގައިގެ ތަނެއްގެ ގޮތުގައެވެ.

ސަރުކާރުން އަންނަނީ މާލެ ސަރަޙައްދާއި އަތޮޅުތެރޭގެ ބިން ހިއްކުމުގެ މަސައްކަތް އަވަސް ކުރުމަށްޓަކައި ބޮޑެތި ޑްރެޖަރުތައް ގެނެސްގެން އެ މަސައްކަތް ކުރަމުންނެވެ. އެގޮތުން މިހާރު ހުޅުމާލެ 3 ވަނަ ފިޔަވަހި ހިއްކާ ނިންމާފައިވާއިރު ރަސްމާލެ ހިއްކުމުގެ މަސައްކަތްވެސް ބާރު ދުވެލީގައި އަންނަނީ ކުރަމުންނެވެ. މީގެ އިތުރުން ގިރާވަރު ފަޅު ހިއްކުމުގެ މަސައްކަތްވެސް ބާރު ދުވެލީގައި އަންނަނީ ކުރަމުންނެވެ. އެ މަސައްކަތުގެ ދަށުން ގިރާވަރުފަޅުން 15 ހެކްޓަރަށްވުރެ ބޮޑު ސަރަޙައްދެއް މިހާރު ވަނީ ހިއްކާ ނިންމާލާފައެވެ.