ތ. ވޭމަންޑޫ ފަޅުން 27 ހެކްޓަރުގެ ބިން ހިއްކުމުގެ މަޝްރޫޢު، 23 ދުވަސް ތެރޭ ނިންމާލައިފިއެވެ.

މި މަސައްކަތް ހަވާލުކުރި ކުންފުނި، މޯލްޑީވްސް އެއާޕޯޓްސް ކޮމްޕެނީ ލިމިޓަޑް (އެމްއޭސީއެލް) އިން މައުލޫމާތުދިން ގޮތުގައި، މި މަޝްރޫއު ކުރިއަށް ގެންގޮސްފައި ވަނީ ޓްރެއިލިންގ ސަކްޝަން ޑްރެޖަރެއް ކަމަށްވާ "ފިލީޕޯ ބްރޫނެލޭޝީ" ބޭނުންކޮށްގެނެވެ. މިއީ އެއްފަހަރާ 11,300 ކިއުބިކް މީޓަރު ހިއްކުމުގެ ގާބިލުކަން ލިބިފައިވާ ޑްރެޖަރެކެވެ.

Ad by Hajj Corporation

އެމްއޭސީއެލް އިން މި މަސައްކަތް ފަށާފައިވަނީ، މާރިޗު މަހުގެ 12 ވަނަ ދުވަހުއެވެ. އަދި މަސައްކަތް އެއްކޮށް ނިންމާލާފައި ވަނީ، މިމަހުގެ 4 ވަނަ ދުވަހުއެވެ.

މި މަޝްރޫއު ކާމިޔާބުކަމާއެކު ނިންމާލެވުން ފާހަގަކުރައްވާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ވަނީ މީސްމީޑިއާގައި ޕޯސްޓެއް ކުރައްވާފައެވެ. އެމަނިކުފާނުގެ ޕޯސްޓުގައި ވަނީ، މި މަޝްރޫއަށް ހޭދަވި މުއްދަތާއި، މަޝްރޫއުގެ ތެރެއިން ހިއްކިފައިވާ ބިމުގެ މިންވަރު ހިއްސާކުރައްވާފައެވެ.

ތ. ވޭމަންޑޫގެ ރައްޔިތުންނަށް ދިމާވެފައިވާ ބިމުގެ ދަތިކަމަށް ދާއިމީ ހައްލެއް ހޯއްދަވައިދެއްވުމަށް އެ ރަށަށް 25 ހެކްޓަރުގެ ބިން އިތުރުކޮށްދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ.

މި މަސައްކަތަކީ، ގައުމުގެ ތަރައްގީއަށް ކުރެވެމުންދާ ގިނަ މަސައްކަތްތަކުގެ ތެރެއިން މުހިންމު މަސައްކަތަކަށް ވާނެކަމަށް އެމްއޭސީއެލް އިން ބުނެއެވެ.