ގިނަ ބައެއްގެ މެދުގައި އޮތް ކަންބޮޑުވުމަކަށް ހައްލެއް ހޯދައިދީ، ފިރިމީހާ ނުވަތަ އަނބިމީހާގެ ބޯހިޔާވަހިކަމެއް އޮތް ނަމަވެސް، ގޯއްޗަކަށް ކުރިމަތިލުމުގެ ފުރުސަތު ދޭން ބޯހިޔާވަހިކަމުގެ އައު ޕްރޮގްރާމެއް އިޢުލާންކޮށްފިއެވެ.

ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ފްލެޓާއި ގޯއްޗަށް އެދި ހުށަހެޅުމުގެ ފުރުޞަތު ހުޅުވާލީ ޖަނަވަރީ މަހުގެ 18 ވަނަ ދުވަހުއެވެ. މި ފުރުސަތު ހުޅުވާލިއިރު، އުސޫލުގައި ހިމެނޭ ކަންކަމުގެ ތެރޭގައި އެންމެ ބޮޑު ކަންބޮޑުވުމަކަށްވީ މީގެ ކުރީގެ އުސޫލުތަކުގައިވެސް އޮންނަ ގޮތަށް ފިރިމީހާ ނުވަތަ އަނބިމީހާގެ ބޯހިޔާވަހިކަމެއް އޮތްނަމަ ޝަރުތުހަމަ ނުވާ ގޮތަށް އޮތުމެވެ.

މި ސްކީމަށް، މިހާތަނަށް ގިނަ އަދަދެއްގެ ފަރާތްތަކުން ކުރިމަތިލާފައިވާއިރު ފްލެޓަށް އޮންނަ ޑިމާންޑަށް ވުރެ ގޯއްޗަށް އޮތް ޑިމާންޑު ދަށް ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއެވެ. ރައީސުލްޖުމްހޫރިއްޔާ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ވަޒީރު ވަނީ މިކަން ތަފްސީލްކޮށްދެއްވާ ސަރުކާރުގެ ބޯހިޔާވަހިކަމުގެ ސްކީމަށް މިހާތަނަށް ކުރިމަތިލާފައިވާ ފަރާތްތަކުގެ ބައެއް ތަފާސްހިސާބުތައް ހިއްސާކުރައްވާފައެވެ.

މިހާތަނަށް މި ސްކީމަށް ކުރިމަތިލާން ހުށަހަޅާފައިވާ އަދަދުތަކަށް ބަލާއިރު އެކި ހުށަހެޅުމުގެ އެކި މަރުހަލާތަކުގައިއާއި މިހާތަނަށް ހުށަހަޅާފައިވާ ފޯމުތައް ހިމެނޭޙެން ޖުމްލަ 18،399 އެޕްލިކޭޝަނެއް އޮތް ކަމަށް ވަޒީރު ޑރ. މުއްޠަލިބު ވިދާޅުވިއެވެ.

Ad by Hajj Corporation

އެގޮތުން ވަކިވަކި ތަފާސްހިސާބުތަކަށް ބަލާއިރު، ފްލެޓަށް ހުށަހެޅުމުގެ މަރުހަލާގައި 8466 އެޕްލިކޭޝަން އޮތް އިރު، ފްލެޓަށް އެދި މިހާތަނަށް 3396 އެޕްލިކޭޝަން ހުށަހަޅާފައި ވެއެވެ. ގޯއްޗަށް އެދި ހުށަހެޅުމުގެ މަރުހަލާގައި 2851 އެޕްލިކޭޝަން އޮތް އިރު، މިހާތަނަށް 2513 އެޕްލިކޭޝަން ހުށަހަޅާފައިވެއެވެ. އަދި ހިޔާ ކެޓަގަރީއަށް ހުށަހެޅުމުގެ މަރުހަލާގައި 220 އެޕްލިކޭޝަން އޮތް އިރު، 953 އެޕްލިކޭޝަން ހުށަހަޅާފައި ވެއެވެ.

ގިނަ ބަޔަކު މި ސްކީމަށް ކުރިމަތިލަމުންދާއިރު، ސްކީމަށް ހުޅުވާލިއިރުވެސް މިކަމަށް 20،000 އަށް ވުރެ ގިނަ ފަރާތްތައް ކުރިމަތިލާނެ ކަމަށް ބެލެވުނު ކަމަށް ޑރ. މުއްޠަލިބު ވިދާޅުވިއެވެ. ނަމަވެސް ގޯއްޗަށް އޮތް ޑިމާންޑު ދަށްވުމާއެކު ގޯތި ހޯދުމަށް އިތުރު ފުރުސަތެއް ދިނުމަށް "ގޯތި-ގެދޮރު" ގެ ނަމުގައި އައު ޕްރޮގްރާމެއް ކުރިއަށް ގެންދަން ނިންމާފައިވާ ކަމަށްވެސް ވަޒީރު ވިދާޅުވިއެވެ.

މިހާރު ފުރުސަތު ހުޅުވާލާފައިވާ ބޯހިޔާވަހިކަމުގެ ސްކީމުގައި މާލޭ ރަށްވެހިންނަށް އަދި ޚާއްޞަ އިސްކަންދެވޭ ކެޓަގަރީތަކަށް ގޯތި ދޫކުރާނީ ގްރޭޓަރ މާލޭ ސަރަހައްދުންނާއި ރަސްމާލެ އިންނެވެ. އަދި މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރުމަށް ހަމަޖެހިފަވަނީ ރަސްމާލެއިންނެވެ.

މި އުސޫލުގެ ދަށުން މާލެ އަދި ވިލިމާލެ ހިމެނޭހެން 7،900 ފްލެޓް ދޫކުރާނެއެވެ. ފްލެޓް ދޫކުރުމުގައި މާލޭގެ ރަށްވެހިންނަށް 4,000 ފްލެޓް، މާލޭގައި ދިރިއުޅޭ އެހެން ރަށްރަށުގެ މީހުންނަށް 1,500 ފްލެޓް އަދި ޚާއްޞަ އިސްކަންދޭ ކެޓަގަރީތަކަށް 2,400 ފްލެޓް ވަނީ ކަނޑައަޅާފައެވެ.