ކުދި ތަންތަންކޮޅުގައި، އެންމެ ދަތި ޙާލުގައި ދިރިއުޅެމުންދާ އާއިލާތަކަށް ބޯހިޔާވަހިކަން ހޯދައިދިނުމަށް އުސޫލެއް އެކުލަވާލުމުގެ މަސައްކަތް ކުރަމުންދާ ކަމަށް އިމާރާތް ކުރުމާއި، ގެދޮރުވެރިކަމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވެއްޖެއެވެ.

ވަޒީރު ވިދާޅުވީ ތަފާތު ސަބަބުތަކާ ހުރެ ގޯތި ނުހެދި ތަންތަންކޮޅު ބައިކޮށްގެން، ވަރަށް ކުދި ތަންތަން ކޮޅުގައި އުޅޭ މާލެއަށް ނިސްބަތްވާ އާއިލާތައް ފާހަގަކުރެވިފަވާ ކަމަށެވެ. މިއީ މާލޭގައި ޒަމާނުއްސުރެ އޮތް ބިމުގެ ދަތިކަމާއި އަދި ސަރުކާރުގެ ބޯހިޔާވަހިކަމުގެ އެކި ސްކީމްތަކުންވެސް ފުރުޞަތު ނުލިބިވާ އާއިލާތައްކަން ވާޒީރު ފާހަގަކުރެއްވިއެވެ. އަދި އިތުރު ޙައްލެއް ހޯދޭނެ އެއްވެސް ގޮތެއްވެސް ނެތް އާއިލާތައް ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، ރައީސުލްޖުމްހޫރިއްޔާ ޑޯރ-ޓު-ޑޯއަށް ވަޑައިގެން ރައްޔިތުންނާ ބަދަލުކުރައްވާއިރު، ރައްޔިތުންގެ ޙާލަތު ވަރަށް ގާތުން ބަޔާންވެގެންދާ ކަމަށެވެ.

އަދި މިފަދަ އާއިލާތައް ދިރުއުޅެމުންދަނީ އިންސާނުން ދިރިއުޅުމަށް އެކަށީގެން ނުވާ ތަންތަންކޮޅުގައި ކަމަށެވެ. އެހެންކަމުން އެފަދަ އާއިލާތަކުގެ ޙާލަތު ދެނެގަނެ، އެ އާއިލާތައް ފާހަގަކޮށް އެ ހާލަތުން ނެރެވޭނެ ގޮތެއް ހޯދުމަށް ނިންމައި، އެކަމަށް މަސައްކަތްތަކެއް ފަށާފައިވާ ކަމަށް ވިދާޅުވިއެވެ.

ވަޒީރު ވިދާޅުވީ އެކަކަށް ވަދެވޭ ވަރުގެ ކުދި ގޯޅިތައް، ނޫނީ އަރިއަކަށް ހުރެ ގޮސް ވަންނަންޖެހޭ ގެތައް އެބަހުރި ކަމަށެވެ. އަދި އެއްވެސް ވެންޓިލޭޝަންއެއް ނެތް ކުދި ތަންތަން އެބަހުރި ކަމަށާއި އިންސާނުންނަށް ނޫޅެވޭނެ ވަރުގެ ތަންތަނުގައި ދިރިއުޅޭ އާއިލާތައް އެބަހުރި ކަމަށެވެ.

އެހެންވެ ސަރުކާރުގެ ވިސްނުމަކީ މިފަދަ އާއިލާތަކުގެ ޙާލަތު ރަނގަޅުކޮށްދިރިއުޅެވޭނެ ގޮތެއް ހޯދައިދިނުން ކަމަށް ވަޒީރު ވިދާޅުވިއެވެ.

Ad by Hajj Corporation

ވަޒީރު ވިދާޅުވީ، ބޯހިޔާވަހިކަމުގެ ތަފާތު ޕްރޮގްރާމްތައް ހިންގާފައިވާއިރު، އެފަދަ އާއިލާތަކުން އެ ދަތިކަމުން ނިކުމެވޭނެ މަގެއް މިހާތަނަށް ފަހިވެފައި ނެތް ކަމަށެވެ.

އެހެންކަމުން ވަކިވަކިން އެފަދަ އާއިލާތައް ދެނެގަނެ، ސަރުކާރުގެ ވިސްނުމަކީ އާއިލާތައް އެ ދަތި ޙާލަތުން ނެރުން ކަމަށް ވަޒީރު މުއްޠަލިބު ވިދާޅުވިއެވެ. އެކަމަށް ކުރަންޖެހޭ ގުޅުންހުރި މަސައްކަތްތައް ފަށާފައިވާ ކަމަށްވެސް ވަޒީރު ވިދާޅުވިއެވެ.

ސަރުކާރުގެ "ބޯހިޔާވަހިކަން އެންމެންނަށް" ސްކީމްގައިވެސް ނިކަމެތި ފަޤީރު އާއިލާތަކަށް ވަކިން ހުށައެޅޭ ގޮތަށް ޚާއްޞަ ކެޓަގަރީއެއް ހިމަނާފަވެއެވެ. މި ކެޓަގަރީގައި 50 ފްލެޓް ހިމެނެއެވެ. މި ކެޓަގަރީގައި ފްލެޓް ދިނުމަށް ހަމަޖެހިފަވަނީ، މިނިސްޓްރީން ކަނޑައަޅާ ދައުލަތުގެ މުއައްސަސާއަކުން ހަދާ އެސެސްމަންޓަކުން ސަރުކާރުން ބޯހިޔާވަހިކަން ފޯރުކޮށް ދޭންޖެހޭ ކަމަށް ކަނޑައަޅާ ފަރާތްތަކަށެވެ.