މި ސަރުކާރަކީ ރައްޔިތުންގެ އަޑުއަހައި، އެކަމަށް މަސައްކަތްކޮށް، ނަތީޖާ ދައްކާ ސަރުކާރެއް ކަމަށް އިމާރާތްކުރުމާއި ގެދޮރުވެރިކަމާ ބެހޭ ވަޒީރު ޑރ. އަބްދުﷲ މުއްޠަލިބް ވިދާޅުވެއްޖެއެވެ.

ވަޒީރު މިހެން ވިދާޅުވީ ބޭންކް އޮފް މޯލްޑިވްސް (ބީއެމްއެލް) އިން ހުޅުމާލޭގައި އަޅާ 1,224 އެފޯޑަބަލް ހައުސިން ޔުނިޓްގެ އަމަލީ މަސައްކަތް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

Ad by Hajj Corporation

ވަޒީރު ވިދާޅުވީ ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުތަކަކީ ދަތި ހާލަތުގައި ދިރިއުޅޭ ފަރާތްތަކަށް ރައްކާތެރިކަން ފޯރުކޮށްދިނުމަށް ބައްޓަންކޮށްފައިވާ މަސައްކަތްތަކެއް ކަމަށެވެ. ރާއްޖޭގެ މާލީ ހާލަތު ހުރިގޮތުން ބޭރުގެ ބޭންކުތަކުން އެހީ ހޯދުމުގައި ގޮންޖެހުންތަކެއް ހުރި ނަމަވެސް، ރާއްޖޭގެ މާލީ އިދާރާތައް މެދުވެރިކޮށް މިކަމަށް ހައްލު ހޯދުމަށް ސަރުކާރުން އިސްކަންދީފައިވާކަން އޭނާ ފާހަގަކުރެއްވިއެވެ.

މިގޮތުން އެމްއެމްއޭގެ ގަވާއިދުތަކަށް ބަދަލު ގެނެސް، ރާއްޖޭގެ ބޭންކުތަކުން ދޫކުރާ ލޯނުގެ ވަކި އިންސައްތައެއް ބޯހިޔާވަހިކަމުގެ މަޝްރޫޢުތަކަށް ހާއްސަކުރުމަށް ވަނީ ނިންމާފައެވެ. "މިއީ ރައީސުލްޖުމްހޫރިއްޔާގެ ދުރުވިސްނުންފުޅާއެކު، ދައުލަތުގެ މުއައްސަސާތަކާއި ބީއެމްއެލް ފަދަ އިދާރާތަކުގެ އެއްބާރުލުމާއެކު ހޯދިފައިވާ އިޖާދީ ހައްލެއް،" ވަޒީރު ވިދާޅުވިއެވެ.

މި މަޝްރޫޢުގެ ދަށުން ހައުސިން ޔުނިޓްތައް ދޫކުރުމަށް ހަމަޖެހިފައިވަނީ 'ލީސް ޓު އޯން' މޮޑެލްއަށެވެ. މިއީ އެއްފަހަރާ ބޮޑު ފައިސާގެ އަދަދެއް ދެއްކުމުގެ ބަދަލުގައި، ވަކި މުއްދަތަކަށް ކުލި ދައްކަމުން ގޮސް އަމިއްލަ ކުރެވޭނެ ގޮތަށް ފަރުމާކޮށްފައިވާ ނިޒާމެކެވެ. މިކަމުގެ ސަބަބުން އާންމު ރައްޔިތުންނަށް އަތްފޯރާ އަގުގައި ބޯހިޔާވަހިކަން ހޯދުމަށް މަގުފަހިވެގެންދާނެއެވެ.

މުއްތަލިބު އިތުރަށް ވިދާޅުވީ، ބީއެމްއެލްގެ އެފޯޑަބަލް ހައުސިން މަޝްރޫއުއަކީ ވެސް ސޯޝަލް ހައުސިން ސްކީމުގެ ތެރޭގައި ހިމެނޭ މަޝްރޫއުއެއް ކަމަށެވެ. ތިން ކޮޓަރީގެ 3,260 ހައުސިން ޔުނިޓަކީ "ބޯހިޔާވަހިކަން އެންމެނަށް" ޕްރޮގްރާމުގެ ދަށުން 60,000ރ. އަށް ވުރެ ދަށުން އާމްދަނީ ލިބޭ މީހުންނަށް ދޫކުރާނެ ތަންތަން ކަމަށް އޭނާ ވިދާޅުވިއެވެ. އާއިލީ ބޯހިޔާވަހިކަން ޕްރޮގްރާމުގެ ދަށުން ފްލެޓާއި ގޯއްޗަށް ކުރިމަތިލުމުގެ އަސާސީ ޝަރުތަކީ މާލޭގައި އުޅޭތާ 15 އަހަރު ވުމާއި މާލޭ މީހުންނަށް ވުމެވެ.

ގައުމީ ތަރައްގީގެ މިފަދަ މަސައްކަތްތަކުގައި މާލީ އިދާރާތަކާއި، ކޮންޓްރެކްޓަރުން އަދި ޑިވެލޮޕަރުން ބައިވެރިވުމަށް ވަޒީރު ވަނީ ގޮވާލައްވާފައެވެ. ސަރުކާރުން މިހާތަނަށް 7,900 ހައުސިން ޔުނިޓަށް ކުރިމަތިލުމަށް ހުޅުވާލާފައިވާއިރު، ބީއެމްއެލް މެދުވެރިކޮށް 3,260 ޔުނިޓް ތަރައްގީކުރުމަށް ވަނީ ހަމަޖެހިފައެވެ.