މި ދެ އަހަތުގެތެރޭގައި ޖަލަށް އިތުރު 400 ގައިދީންގެ ޖާގަ އިރުކޮށް، ކުރީ ސަރުކާރުގައި މާލެ ޖަލު އުވާލުމުން ދޫވެފައިވާ މީހުން އަނބުރާ ޖަލަށް ގެނައުމުގެ މަސައްކަތް ކުރަމުންދާކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.

ރަނގަޅަށް ހިނގަހިނގާހުރި މާލޭ ޖަލާއި، ކަސްޓޯޑިއަލް ފެސިލިޓީ، ނިމުނު ސަރުކާރުގައި މުޅިން އުވާލާފައިވާކަން ވަޒީރު ފާހަގަކުރެއްވިއެވެ. އަދި، އޭރު ހުރި މާލޭ ޖަލަކީ ރާއްޖޭގައިވެސް އެންމެ ފެންވަރު ރަނގަޅުކޮށް ވަސީލަތްތައް ޤާއިމުކޮށްފަވާ ޖަލުކަން ވަޒީރު ފާހަގަކުރެއްވިއެވެ. އެއީ 350 މީހުންގެ ޖާގައިގެ ޖަލެކެވެ. ނަމަވެސް އެއާއި އިންވެގެން ސްކޫލެއް އަޅާ، ޖަލު ބަންދުކޮށްފަވާއިރު، ޖަލުގައި ތިބި ގިނަ ޢަދަދެއްގެ މީހުން ދޫވެގެން ދިޔަކަން ވަޒީރު ފާހަގަކުރެއްވިއެވެ. އަދި 100 މީހުންގެ ޖާގައިގެ ކަސްޓޯޑިއަލް ޖަލު ތަޅާލާ، އެ ޖާގަވެސް މުޅިން ގެއްލުނުކަން ވަޒީރު ފާހަގަކުރެއްވިއެވެ.

އޭރު ހުޅުމާލެ ޖަލުގައި 100 މީހުންގެ ޖާގަ ހެދުމަށް އަޅަން ފަށާފައި އޮތް އިމާރާތަކީވެސް، އެތައް ގުނަ އަގު ބޮޑުކޮށް ހަވާލުކޮށްފައި އޮތް މަސައްކަތެއްކަންވެސް ވަޒީރު ފާހަގަކުރެއްވިއެވެ.

450 މީހުން ގައިދުކުރުމުގެ ޖާގަ މުޅިން ގެއްލި، ގިނަ ގައިދީން ދޫކޮށްލާފައިވާއިރު، މިގޮތަށް ދޫވެފައި ތިބި މީހުން އަނބުރާ ޖަލަށް ގެނައުމަށް ޖާގަ ހެދުމުގެ މަސައްކަތް ކުރަމުންދާކަމަށާއި، އެކަމުގައި މިހާތަނަށް ބޮޑު ކާމިޔާބީއެއްވެސް ހޯދިފަވާކަމަށް ވަޒީރު ވިދާޅުވިއެވެ.

ޖަލުތަކުގެ ޚިދުމަތް ހަރުދަނާކުރުމުގެ ގޮތުން ކުރިން އިދާރާއަށް ގޮސްގެން، އުނދަގުލުން ހޯދަމުން އައި ޚިދުމަތްތައް މިހާރު ކޮންމެ ތާކު ހުރެގެންވެސް އޮންލައިންކޮށް ހޯދޭގޮތަށް ޕޯޓަލްއެއްގެ ޚިދުމަތް ވަނީ ފަށާފައެވެ. އަދި ރާއްޖޭގެ އެންމެ ބޮޑު ޖަލު، މާފުށީ ޖަލުގެ ސެކިއުރިޓީ ހަރުދަނާކުރުމަށް، އެތަނުގައި ބޮޑީ ސްކޭނަރުވެސް މުޅިން އަލަށް ބަހައްޓާފައިވެއެވެ.

Ad by Hajj Corporation

އަތޮޅުތަކުގައި ފުލުހުންގެ ޚިދުމަތް ހަރުދަނާކުރުމުގެ މަސައްކަތުގެ ދަށުން، ޕޮލިސް ޕޯސްޓާއި ސްޓޭޝަން ހިމެނޭހެން 53 އިމާރާތެއްގެ މަސައްކަތްވެސް ދަނީ ކުރިއަށްގެންދަމުންނެވެ. މި ސަރުކާރުން ފެށި 2 އިމާރާތެއްގެ މަސައްކަތް ނިންމާ މިހާތަނަށް ޚިދުމަތަށް ގެނެސްވާއިރު، މިމަހުގެ ނިޔަލަށް އިތުރު 11 ތަނެއް ޚިދުމަތަށް ގެނެވޭނެކަމަށް ވަޒީރު ވިދާޅުވިއެވެ.