ރާއްޖެއަށް މިހިނގާ 2026 ވަނަ އަހަރުގެ މިހާތަނަށް 500،000 (ފަސްލައްކަ) އަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.

މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓްގެ ތަފާސްހިސާބުތަކަށް ބަލާއިރު ބުދަ ދުވަހުގެ ނިޔަލަށް ރާއްޖެއަށް 502،252 (ފަސްލައްކަ ދެހާސް ދުއިސައްތަ ފަންސާސްދޭއް) ފަތުރުވެރިން ޒިޔާރަތްކޮށްފައިވެއެވެ.

މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 461،839 (ހަތަރުލައްކަ ފަސްދޮޅަސްއެއްހާސް އަށްސަތޭކަ ތިރީސް ނުވައެއް) ފަތުރުވެރިންނަށްވުރެ 8.8 ޕަސެންޓް އިތުރު އަދަދެކެވެ.

ރާއްޖެއަށް ޖެނުއަރީ މަހާއި ފެބްރުއަރީ މަހު ޒިޔާރަތްކުރި ފަތުރުވެރިންގެ އަދަދު އިތުރުވި ނަމަވެސް މެދުއިރުމަތީގެ ހަނގުރާމައާއެކު މިމަހުގެ މިހާތަނަށް ޒިޔާރަތްކުރި ފަތުރުވެރިންގެ އަދަދު ވަނީ ދަށަށް ގޮސްފައެވެ.

Ad by Hajj Corporation

ޓޫރިޒަމްގެ ގަދަ 10 ގައުމު

• ޗައިނާ - 79،681 ފަތުރުވެރިން
• ރަޝިއާ - 57،466 ފަތުރުވެރިން
• އިޓަލީ - 48،417 ފަތުރުވެރިން
• އިނގިރޭސިވިލާތް - 46،005 ފަތުރުވެރިން
• ޖަރުމަނު - 31،344 ފަތުރުވެރިން
• އިންޑިއާ - 18،402 ފަތުރުވެރިން
• ފްރާންސް - 18،160 ފަތުރުވެރިން
• އެމެރިކާ - 12،844 ފަތުރުވެރިން
• ޕޮލެންޑް - 12،109 ފަތުރުވެރިން
• ސްވިޓްޒަލޭންޑް - 10،838 ފަތުރުވެރިން

ފަތުރުވެރިންގެ ތެރެއިން 489،699 ފަތުރުވެރިން ރާއްޖެ ޒިޔާރަތްކުރީ ވެލާނާ އިންޓަނޭޝަނަލް އެއާޕޯޓުންނެވެ. މާފަރު އެއާޕޯޓުން 1،792 ފަތުރުވެރިން ރާއްޖެ ޒިޔާރަތްކުރިއިރު ގަން އެއާޕޯޓުން 1،769 ފަތުރުވެރިން އަދި ހަނިމާދޫ އެއާޕޯޓުން 1،332 ފަތުރުވެރިން ރާއްޖެ އައިސްފައިވެއެވެ.

ފަތުރުވެރިން ޗުއްޓީ ހޭދަކުރި ފެސިލިޓީތައް

• ރިސޯޓު - 336،579 ފަތުރުވެރިން
• ހޮޓެލްސް - 14،486 ފަތުރުވެރިން
• ގެސްޓްހައުސް - 131،261 ފަތުރުވެރިން
• ސަފާރީ އުޅަނދުތައް - 10،065 ފަތުރުވެރިން

ރާއްޖޭގައި މިވަގުތު 180 ރިސޯޓާއި 924 ގެސްޓްހައުސް އާއި 171 ސަފާރީ އުޅަނދު އަދި 16 ޓޫރިސްޓް ހޮޓާ ދަނީ ހިންގަމުންނެވެ. މި ފެސިލިޓީތަކުގައި ފަތުރުވެރިންނަށް ހުރި އެނދުގެ އަދަދަކީ 67،450 އެވެ.