ތާރީޚްގެ ތެރެއިން މުސްލިމުން ދީނާއި ވަތަނުގެ ދިފާޢުގައި ހަނގުރާމަކޮށް ޖިހާދުކުޅަ އެތައް ހާދިސާއެއް ފެނިގެންދެއެވެ. މި ހާދިސާތަކުގެ އެކިކަންކަމުގައި އެތައް އިބުރަތެއްވެސް އަދުގެ ދިރިތިބީންނަށް ލިބިދެއެވެ. މި ދުވަސްވަރަކީ ވެސް އިސްލާމުންގެ ސަފުތައް ނިކަމެތިކޮށް އަނދިރި ނުފޫޒުގެ އަތްދޮށުލުމުގެ ހީލަތްތެރި ހަނގުރާމައެއް ހިނގަމުންދާ ދުވަސްވަރެކެވެ. މި ރޯދަމަހު އިސްރާއީލާއި އެމެރިކާ ގުޅިގެން ފަށާފައިވާ ހަނގުރާމައިގެ ބޭނުމަކީ މުޅި އިސްލާމީ އުންމަތް އެއްބަޔަކު އަނެއްބަޔަކާއި ޖައްސައި، ފިތުނައިގެ ތެރެއަށް ޣަރަގުކޮށްލުންކަން ކަށަވަރެވެ.

މިހިތްދަތި ވަގުތުގައި މިހާލަތާއި ގުޅޭ ވަރަށް އިހުގެ ފަތެއް އިންޓަނެޓްގެ އޮޅިން ފެނިއްޖެއެވެ. އެއީ މިފަދަ ރޯދަމަހެއްގައި ހަނގުރާމައިގެ ކުރީ ސަފުގައި ހުރި އުސްމާނީ ސިފައިންގެ މީހަކު އޭނާގެ އަންހެން ދަރިފުޅަށް ފޮނުވި ސިޓީއެއްްގެ ނަކަލެކެވެ. އެ ސިޓީން ވެސް ލިބިގެން ދަނީ އިބުރަތެވެ. އެ ސިޓީ ކިޔާލަމާތޯއެވެ؟

Ad by Hajj Corporation

ލޯބިވާ ދަރިފުޅާއެވެ. މިއަދަކީ ޖުލައި މަހުގެ 14 ވަނަ ދުވަހެވެ. މިއީ މިއަހަރުގެ ބަރަކާތްތެރި ރަމަޟާން މަހުގެ ދެވަނަ ދުވަހެވެ. ހަނގުރާމައިގެ މައިދާނުގައި ތިބި ސިފައިންނަށް ރޯދަ ނުހިފިދާނެ ކަމަށް ޝައިޚުލް އިސްލާމް ފަތުވާ ދެއްވާފައިވީ ނަމަވެސް، ރޯދަ ދޫކޮށްލުމަކަށް އަހަރެންގެ ހިތެއް އެއްބަހެއް ނުވިއެވެ. އެހެންކަމުން، މިއަދު ރޯދަ ހިފުމަށް އަހަރެން ނިޔަތްގަތީމެވެ. ހާރުކެއުމުގެ ވަގުތުގައި އަހަރެންނަށް ފެނުނީ ގަސްތަކުގެ ތެރޭގައި ހުރި ކުދި ދެ މުލެވެ. އަހަރެން ހާރުކެއީ އެ ދެ މުލުންނެވެ.

މުޅި ދުވާލު އަހަރެމެން ހޭދަކުރީ އާ ކަންދަކުތައް ކޮނުމުގައެވެ. ދުޝްމަނުންގެ ހަމަލާތައް ވަރުގަދަވެފައިވާލެއް ބޮޑުކަމުން، ކަންދަކުން ބޯދިއްކޮށްލެވޭ ވަރެއްވެސް ނުވެއެވެ. އިރުއޮއްސި ރޯދަވީއްލާ ވަގުތު ޖެހުމުން، ސިފައިންގެ މީހަކު ބަންގި ގޮވިއެވެ. ކަންދަކުގެ ތެރޭގައި ފެންފުޅި އެކަކު އަތުން އަނެކަކު އަތަށް ދައުރުވަމުން ދިޔައެވެ. އެންމެންވެސް ރޯދަވީއްލީ ހަމައެކަނި ފެންފޮދަކުންނެވެ.

އަހަރެން ހީކުރީ އެތަނުގައި ރޯދައަށް ހުރީ ހަމައެކަނި އަހަރެން ކަމަށެވެ. ނަމަވެސް އެންމެންވެސް ތިބީ ރޯދައަށެވެ. ފެންފުޅި އެންމެ ފަހުން އަހަރެންގެ އަތަށް އައި ވަގުތު، އަހަރެން އަމިއްލަ ނަފްސާ މެދު އިންތިހާއަށް ލަދުގަތެވެ. އަހަރެންގެ އެކުވެރި ހުރިހާ ސިފައިން ރޯދަ ހިފީ ހާރުނުކައެވެ. ނަމަވެސް އަހަރެން ހާރުކެއުމަށް ދެ މޫ ކެވުނުކަމަށްޓަކައި އެ އެކުވެރިންގެ ކުރިމަތީގައި އިސްޖަހާލަން ޖެހުނެވެ.

އެ ދުވަހު އަހަރެންގެ ލޮލުން ކަރުނަ ފޭދުނެވެ. ރޯދައަށް ތިބެ ޝަހީދުވެދިޔަ އެރުޒުރޫމް، ދަރެންޑޭ އަދި ޔެނިސޭގެ މަތިވެރި އަބްޠާލުންގެ ގުރުބާނީގެ ބަދަލު އަހަރެން ދޭނީ ކިހިނެއް ހެއްޔެވެ؟