މެކްސިކޯގައި މިދިޔަ ފެބްރުއަރީ މަހުން ފެށިގެން އޭނާގެ ހަތް ކުދިންނާއެކު ގެއްލިގެން ހޯދަމުންދިޔަ އެމެރިކާގެ އިންޑިއާނާގެ މާބަނޑު މަންމަ، މަކާލާ ޕެންޑްލީ މަރުވެފައި އޮއްވާ ފެނިއްޖެއެވެ. އުމުރުން 30 އަހަރުގެ ޕެންޑްލީގެ ހަށިގަނޑު ފެނިފައިވަނީ މެކްސިކޯގެ ދެކުނުގެ ސަރަހައްދެއް ކަމަށްވާ ޗިއާޕަސްއިންނެވެ.

މެކްސިކޯގެ ޕްރޮސެކިއުޓަރުން ހާމަކުރި ގޮތުގައި، ޕެންޑްލީގެ ހަށިގަނޑު ފެނިފައިވަނީ ޒިނަކަންޓަން މުނިސިޕަލިޓީގެ އެލަމްބޯ ބާޖޯ ސަރަހައްދުގެ ކަނޑައެއްގެ ތެރެއިންނެވެ. އޭނާގެ އައިޑެންޓިޓީ ކަށަވަރުކުރެވުނީ ޖޫން 9، 2026 ގައެވެ. ތަހުގީގުގެ އިބްތިދާއީ ރިޕޯޓްތައް ބުނާގޮތުން ޕެންޑްލީ މަރުވެފައިވަނީ ބޮލަށް ލިބުނު ބާރުގަދަ އަނިޔާއެއްގެ ސަބަބުން ސިކުނޑިއަށް ލިބުނު ގެއްލުންތަކަކާ ގުޅިގެންނެވެ. ކަމާބެހޭ ފަރާތްތަކުން މި މައްސަލަ ބަލަމުންދަނީ ގަސްތުގައި މީހަކު މެރުމުގެ ނުވަތަ "ފެމިސައިޑަލް ވަޔަލަންސް" ގެ މައްސަލައެއްގެ ގޮތުގައެވެ.

Ad by Hajj Corporation

މި ހިތާމަވެރި ހާދިސާގެ ތެރެއިން ލިބުނު ހިތްހަމަޖެހުމަކީ ޕެންޑްލީގެ ހަތް ކުދިންވެސް ސަލާމަތުން ތިއްބާ ފެނުމެވެ. މިހާރު އެ ކުދިން ތިބީ މެކްސިކޯގެ ކަމާބެހޭ ފަރާތްތަކުގެ ބެލުމުގެ ދަށުގައެވެ. އިންޑިއާނާގައި ތިބި އާއިލާގެ މެންބަރުން ދަނީ އެ ކުދިން އަނބުރާ އެމެރިކާއަށް ގެންދިއުމުގެ މަސައްކަތް ކުރަމުންނެވެ.

މި މައްސަލައާ ގުޅިގެން ކުދިންގެ ބައްޕަ، ޖޯސެފް ބަޓްލަރ، މެކްސިކޯގެ ފުލުހުން ވަނީ ހައްޔަރުކޮށްފައެވެ. އާއިލާއިން ބުނާގޮތުގައި ޕެންޑްލީއާއި ބަޓްލަރއާ ދެމެދު އޮންނަނީ ވަރަށް އުނދަގޫ ގުޅުމެކެވެ. މީގެ ކުރިން މެއި މަހުގެ ތެރޭގައިވެސް ފުލުހުންނަށް މި އާއިލާ ފެނިގެން ކުދިން ބެލުމުގެ ދަށަށް ގެންދިޔުމަށްފަހު، އަލުން ޕެންޑްލީއާ ހަވާލުކޮށްފައިވާކަން ފާހަގަކުރެވެއެވެ.

ޕެންޑްލީގެ އާއިލާއިން ވަނީ މި ހާދިސާއާ ގުޅިގެން ނުހަނު ބޮޑު ހިތާމައެއް ލިބިފައިވާކަން ހާމަކޮށްފައެވެ. ނަމަވެސް މިވަގުތު އެންމެ ބޮޑު އިސްކަމެއް ދެނީ ހާލުގައި ޖެހިފައިވާ ހަތް ކުދިން ރައްކާތެރިކަމާއެކު އަނބުރާ ގައުމަށް ގެނައުމަށް ކަމަށް އާއިލާއިން ބުނެފައިވެއެވެ.