މެލޭޝިއާގައި އިޤްރައުލް ޤުރްއާން މުބާރާތް ބާއްވައިފިއެވެ.

މިއީ މެލޭޝިޔާގައި ހުންނަ ދިވެހިރާއްޖޭގެ ހައިކޮމިޝަނުން އިންތިޒާމްކޮށްގެން މިދިޔަ ފެބްރުއަރީ 28 ވީ ހޮނިހިރު ދުވަހު ހެދުނު ބޭއްވި މުބާރާތެކެވެ. މިއީ އެ ހައިކޮމިޝަނުން އިންތިޒާމްކޮށްގެން ކޮންމެ ރަމަޟާން މަހަކު މެލޭޝިޔާގައި ދިރިއުޅޭ ދިވެހި ދަރިވަރުންނަށް އަމާޒުކޮށްގެން ބާއްވަމުން އަންނަ މުބާރާތެކެވެ.

Ad by Hajj Corporation

 މި އަހަރުގެ މުބާރާތުގައި އެކި އުމުރު ފުރާއިން 5 ކެޓަގަރީއަކުން ޖުމްލަ 42 ކުދީން ބައިވެރިވެފައިވެއެވެ. މި މުބާރާތުގެ މަގުސަދަކީ އެގައުމުގައި ދިރިއުޅޭ ދަރިވަރުންގެ ހިތްތަކުގައި ކީރިތި ޤުރުއާނާ މެދު ލޯބި އުފައްދާ، ތަޖުވީދުމަގުން ޤުރުއާން ކިޔެވުމަށް ބާރުއެޅުމެވެ. އަދި ދިރިއުޅުމުގައި ޤުރުއާނުގެ މުހިންމުކަން އަންގައިދީ ހަނދާން ކޮށްދިނުމެވެ.

 މުބާރާތުގެ ބައިވެރިންނާއި ބެލެނިވެރިންނާ މުހާތަބްކުރައްވާ ވާހަކަދައްކަވަމުން މެލޭޝިޔާއަށް ކަނޑައަޅާފައި ހުންނަވާ ދިވެހިރާއްޖޭގެ ސަފީރު ޑރ. މަރިޔަމް ޝަބީނާ އަހުމަދު ވަނީ މުބާރާތުން ވަނަވަނައަށް ދިޔަ ދަރިވަރުންނަށް މަރްހަބާ ދަންނަވާ، މުބާރާތުގައި ބައިވެރިވި ހުރިހާ ދަރިވަރުންނަށް އައްސަރިބަހާއި ސާބަސްދެއްވާފައެވެ. އަދި ކާމިޔާބީއަކީ ހަމައެކަނި ލިބޭ މެޑެއްޔެއް ނޫންކަމާއި އަސްލު ކާމިޔާބީއަކީ ކީރިތި ޤުރުއާނާ ގާތްވުމަށް ދަރިވަރުން ކުރެއްވި މުހިންމު މަސައްކަތް ކަމުގައި ފާހަގަކުރެއްވިއެވެ.

 މީގެއިތުރުން ދިވެހިރާއްޖެއާ ދުރުގައި ބޭރު ގައުމެއްގައި ދިރިއުޅޭއިރު، ދިވެހީންގެ ދީނީ ސަގާފަތް ހިފެހެއްޓުމަކީ ވަރަށް މުހިއްމު ކަމެއްކަމާއި، ހާއްސަކޮށް ކީރިތި ޤުރުއާނަކީ އަޅުގަނޑުމެންގެ ދިރިއުޅުމުގެ ކޮންމެ ފިޔަވަޅެއްގައިވެސް މަގުދައްކައިދޭ ނޫރު ކަމުގައި ވިދާޅުވިއެވެ. އަދި އަޅުގަނޑުމެންގެ އީމާންތެރިކަން ވަރުގަދަކޮށްދީ، ރަނގަޅު މަގުގައި ސާބިތުކަމާއެކު ތިބުމަށްޓަކައި ކީރިތި ޤުރުއާނުގައި ހިފެހެއްޓުމަކީ ކޮންމެހެން ކުރަންޖެހޭނެ ކަމެއް ކަމާއި ހާއްސަކޮށް ބަރަކާތްތެރި ރަމަޟާން މަހަކީ ޤުރުއާނުގެ މައްސަރުކަން ހަނދާންކުރަންޖެހޭކަމުގައި ވިދާޅުވިއެވެ.

 ހަމަމިއާއެކު މި ބަރަކާތްތެރި މައްސަރުގައި ޤުރުއާން ކިޔެވުމާއި، އޭގެ މާނަ ދެނެގަތުމަށް އިތުރު ވަގުތު ހުސްކުރުމަކީ އަޅުގަނޑުމެންގެ ރޫޙާނީ ދިރުން އިތުރުކޮށްދޭނެ ކަމެއް ކަމުގައި ސަފީރު ވިދާޅުވިއެވެ. އަދި މުހިންމު އެއްކަމަކީ، ހައިކޮމިޝަނުން އިންތިޒާމްކޮށްގެ ބާއްވަން ފެށި މި ޤުރުއާން މުބާރާތް ފެށިފަހުން އަހަރަކަށްފަހު އަހަރެއް މި މުބާރާތުގައި ބައިވެރިވާ ކުދީންގެ އަދަދު ގިނަވަމުންދާކަން ކަމުގައި ފާހަގަކުރެއްވިއެވެ. އަދި އެކަމަށްޓަކައި ބެލެނިވެރީންނަށް ސަފީރު ޝުކުރު ދަންނަވާ، ދަރިންނަށް ދީނީ ތަރުބިއްޔަތު ދިނުމަކީ މުޅި މުޖުތަމައަށް އޭގެ ފައިދާ ކުރާނެ ކަމެއް ކަމުގައި ވިދާޅުވިއެވެ.

 ސަފީރު ވިދާޅުވިގޮތުގައި، މެލޭޝިޔާގައި ދިރިއުޅޭ ދަރިވަރުންނަށް ޤުރުއާން ކިޔަވައިދިނުމަކީ ހައިކޮމިޝަނުގެ ފަރާތުން ވަރަށް މުހިންމުކަމެއް ދޭކަމެއް ކަމާއި، މިގޮތުން، ކީރިތި ޤުރުއާނާ ބެހޭ ޤައުމީ މަރުކަޒުން އޮންލައިކޮށް ކިޔަވައިދެމުން އައި ޤުރުއާން ކްލާހަށް މިދިޔަ އަހަރުގެ އޮކްޓޯބަރު މަހުން ފެށިގެން ބަދަލުގެނެވި، މިހާރު އެކްލާސްތައް ހައިކޮމިޝަނުގެ ދަށުން ގާއިމް ކުރެވިފައިވާ މޯލްޑިވްސް ސެންޓަރުން ސީދާ ބަލަހައްޓާގޮތަށް ހަމަޖެހިފައިވާކަމުގައި ފާހަގަކުރެއްވިއެވެ.

 މިފަހަރުގެ މުބާރާތުގެ އިންތިޒާމްތައް ހަމަޖެހިފައިވަނީ އެހެން އަހަރުތަކުގައި ބާއްވަމުން އަންނަ ޤުރުއާން މުބާރާތާ ތަފާތުކޮށް، ޒަމާނަށް އައިސްފައިވާ ހެޔޮ ބަދަލާއެކު ޓެކްނޮލޮޖީގެ އެހީ ބޭނުންކޮށްގެންނެވެ. މީގެއިތުރުން، ހާއްސަ ކެޓަގަރީގެ" ނަމުގައި ޚާއްސަ އެހީއަށް ބޭނުންވާ ދަރިވަރުންނަށް މުބާރާތުގައި ބައިވެރިވުމަށް ފުރުސަތު ހުޅުވާލިއެެވެ. އަދި ކުރިއަށް އޮންނަ މުބާރާތްތަކުގައިވެސް މި ކެޓަގަރީ ހިމެނުމަށް ވަނީ ނިންމާފައެވެ.

މި މުބާރާތް އިންސާފްކޮށްދެއްވީ މެލޭޝިޔާގައި ދިރިއުޅޭ ކޮމިއުނިޓީގެ ފަރާތުން ދެ ބޭފުޅެކެވެ. މީގެއިތުރުން، މެލެޝިޔާގެ އިންޓަރނޭޝަމަލް އިސްލާމިކް ޔުނިވަރސިޓީ (އައި.އައި.ޔޫ.އެމް) ގެ ފަރާތުން ހާއްސަ އޮބްޒަރވަރެއް ވެސް ވަނީ ބައިވެރިވެފައެވެ.

 މި މުބާރާތުގެ ވަނަތައް ހާސިލްކުރި ދަރިވަރުންނަށް ޓްރޮފީ، މެޑަލް އަދި ސެޓްފިކެޓް ދެވުނެވެ. ހުރިހާ ކެޓަގަރީއަކުން އެއް ވަނަ ހާސިލް ކުރައްވާފައިވާ ދަރިވަރުންނަށް އިނާމު ދެއްވީ ހައިކޮމިޝަނަރ، ޑރ. މަރިޔަމް ޝަބީނާ އަހުމަދުއެވެ.