ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުގެ އެންމެ ފަހު ސިކުންތުކޮޅުގެ ތެރޭގައި ލަމީން ޔަމާލް ކާމިޔާބުކުރި ޕެނަލްޓީއާއެކު، ބާސެލޯނާއިން 1-1 އިން އެއްވަރުކޮށް މުހިންމު ނަތީޖާއެއް ހޯދައިފިއެވެ.

ސެއިންޓް ޖޭމްސް ޕާކުގައި ކުޅުނު މި މެޗުގެ ބޮޑު ބައެއްގައި ނިއުކާސަލްއިން މޮޅަށް ޑޮމިނޭޓްކޮށްގެން ކުޅެފައިވާއިރު، މެޗުގެ 86 ވަނަ މިނެޓުގައި ހާވީ ބާންސް ވަނީ އެ ޓީމަށް ލީޑު ނަގައިދީފައެވެ. ނަމަވެސް މެޗުގެ އިތުރު ވަގުތުގެ ފަހު މިނެޓުގައި ބާސެލޯނާގެ ޑެނީ އޮލްމޯއަށް ނިއުކާސަލްގެ މަލިކް ތިއޯ ކުރި ފައުލަކާ ގުޅިގެން ލިބުނު ޕެނަލްޓީ ޔަމާލް ވަނީ ކާމިޔާބުކޮށްފައެވެ.

Ad by Hajj Corporation

މެޗުގެ ކުރީކޮޅު ނިއުކާސަލްއަށް ލަނޑު ޖަހާނެ ރަނގަޅު ފުރުސަތުތަކެއް ލިބުނެވެ. އެގޮތުން ސަންޑްރޯ ޓޮނާލީ ފޮނުވާލި ބޯޅައެއް ބާސެލޯނާގެ ކީޕަރު ޖޯން ގާސިއާ އަތުން ދޫވި ނަމަވެސް، ޕައު ކުބާސީ ވަނީ ގޯލުގެ ރޮނގުމަތިން އެ ބޯޅަ ސަލާމަތްކޮށްފައެވެ. މީގެ އިތުރުން އެންތަނީ އެލަންގާ ފޮނުވާލި ހަމަލާއެއްވެސް ކީޕަރު ގާސިއާ ވަނީ ދިފާއުކޮށްފައެވެ.

ދެވަނަ ހާފުގައި ބާސެލޯނާއިން ކުޅުން ރަނގަޅުކުރިއިރު، ރޮބަޓް ލެވަންޑޯސްކީއަށް ވަނީ ލަނޑު ޖަހާނެ ރަނގަޅު ފުރުސަތެއް ލިބި ބޭކާރުވެފައެވެ. މެޗުގެ 74 ވަނަ މިނެޓުގައި ނިއުކާސަލްގެ ޖޮއެލިންޓަން ލަނޑެއް ޖެހި ނަމަވެސް، އޭނާ އޮފްސައިޑްގައި ހުރުމުން ރެފްރީ އެ ލަނޑު ބަލައެއް ނުގަނެއެވެ.

ތަފާސްހިސާބުތަކަށް ބަލާއިރު، 95 މިނެޓާއި 50 ސިކުންތުގައި ޔަމާލް ކާމިޔާބުކުރި މި ޕެނަލްޓީއަކީ ޗެމްޕިއަންސް ލީގުގެ ތާރީޚުގައި ބާސެލޯނާއިން އެންމެ ލަހުން ކާމިޔާބުކުރި ޕެނަލްޓީ ލަނޑެވެ. އަދި މިއީ ނިއުކާސަލް ޗެމްޕިއަންސް ލީގުގައި ބަލިނުވެ ފުރިހަމަކުރި 6 ވަނަ މެޗެވެ.

މި ދެ ޓީމު ބައްދަލުކުރާ ދެވަނަ ލެގުގެ މެޗު އޮންނާނީ އަންނަ ހަފުތާގެ ބުދަ ދުވަހު ބާސެލޯނާގެ ކޭމްޕް ނޯގައެވެ. ފުރަތަމަ ލެގު އެއްވަރުވުމުން، ދެވަނަ ބުރުގެ ޖާގައެއް ކަށަވަރުކުރުމުގެ ފުރުސަތު ދެ ޓީމަށްވެސް މިހާރު ވަނީ ހަމަހަމަކޮށް ހުޅުވިފައެވެ.