މާލޭ ނޯތު ހާބަރުން ނަގާ ފީތައް ބޮޑުކުރުމަށް ސަރުކާރާ އެކު އެއްވެސް މަޝްވަރާއެއް ކޮށްފައިނުވާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވިދާޅުވެއްޖެއެވެ.

އެ ކުންފުނިން މިހެން ވިދާޅުވީ ނޯތު ހާބަރުގެ ފީތައް ބޮޑުކުރަން އުޅޭ ކަމަށް ބުނެ ސޯޝަލް މީޑިއާގައާއި ބައެއް ފަރާތްތަކުން ފަތުރަމުންދާ ވާހަކަތަކާ ގުޅިގެންނެވެ.

Ad by Hajj Corporation

އެމްޕީއެލުން ނެރުނު ބަޔާނެއްގައި ހާމަކުރެއްވި ގޮތުގައި ފީ ބޮޑުކުރާ ކަމަށް ބުނެ ފަތުރަމުންދާ ވާހަކަތަކަކީ އެއްވެސް އަސާސެއް ނެތް، ޙަޤީޤަތާ ޚިލާފު ވާހަކަތަކެކެވެ.

އެ ކުންފުނިން އިތުރަށް ވިދާޅުވީ ހާބަރުގެ ޚިދުމަތްތައް ހަރުދަނާކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ.

މިގޮތުން، ނޯތު ހާބަރުގެ 'އޭ ޒޯން' ބޭނުންކުރާ އުޅަނދުފަހަރަށް ފެނާއި ކަރަންޓުގެ ޚިދުމަތް ދިނުމަށް ކުރަންޖެހޭ މަސައްކަތްތައް މިހާރު ދަނީ ކުރަމުންނެވެ. މިއީ އެ ސަރަޙައްދު ބޭނުންކުރާ އުޅަނދުފަހަރަށް ލުއިފަސޭހަކޮށްދިނުމުގެ ގޮތުން ކުރިއަށްގެންދާ މަޝްރޫޢެކެވެ.

މީގެ އިތުރުން، މުދާ އުފުލާ ބޯޓުފަހަރު ކިއުގައި މަޑުކުރަންޖެހޭ ވަގުތު ކުޑަކުރުމަށްޓަކައި، އުޅަނދުތަކަށް ޖާގަ ދިނުމުގެ އުސޫލަށް މި މަހުގެ 14 އިން ފެށިގެން ބަދަލުތަކެއް ގެނެސްފައިވާ ކަމަށްވެސް އެމްޕީއެލުން ވިދާޅުވިއެވެ. މި ބަދަލާއެކު ބޯޓުފަހަރަށް މުދާ ބޭލުމާއި ބަރުކުރުމުގެ ކަންކަން އަވަސްވެގެންދާނެ ކަމަށް ބެލެވެއެވެ.

މަސްވެރި އުޅަނދުތަކާ ގުޅޭގޮތުން އެމްޕީއެލުން ވިދާޅުވީ، "މަސްވެރި އުޅަނދުތަކަށް ޚާއްސަ ޒޯންތަކުން މިހާރުވެސް އެއްވެސް ފީއެއް ނުނަގާނެ" ކަމަށެވެ. ނަމަވެސް އެ ސަރަޙައްދު ބޭނުންކުރެވޭނީ ރަޖިސްޓްރީކޮށްފައިވާ އުޅަނދުތަކަށް އެކަނި ކަމަށް އެ ކުންފުނިން ވަނީ ހަނދާންކޮށްދީފައެވެ.