އިސްރާއީލުގެ ވައިގެ ސިފައިން އީރާނުގެ ގޭސް އުފައްދާ މަރުކަޒުތަކަށް އަމާޒުކޮށް 18 މާރިޗު 2026 ގައި ވަރުގަދަ ހަމަލާތަކެއް ދީފިއެވެ. މި ހަމަލާތައް ހާއްސަގޮތެއްގައި އަމާޒުކޮށްފައިވަނީ ދުނިޔޭގެ އެންމެ ބޮޑު ގޭސް ފީލްޑް ކަމަށްވާ 'ސައުތު ފާސް' އަށާއި، އަސަލޫޔޭ އަދި ބުޝެހްރުގައި ހުންނަ ގޭސް ސާފުކުރާ މަރުކަޒުތަކަށެވެ.

Ad by Hajj Corporation

އެކްސިއޯސް އާއި އީރާނުގެ ދައުލަތުގެ މީޑިއާތަކުން ރިޕޯޓުކޮށްފައިވާ ގޮތުގައި، މި އޮޕަރޭޝަން ކުރިއަށް ގެންގޮސްފައިވަނީ އެމެރިކާގެ ސީދާ ހުއްދަޔާއެކު، އެ ގައުމާ ގުޅިގެންނެވެ. އަމަލީ ގޮތުން ހަމަލާ ދިނީ އިސްރާއީލުގެ ވައިގެ ސިފައިން ކަމުގައި ވިޔަސް، މިއީ ދެ ގައުމު ގުޅިގެން ރޭވި ކަމެއްކަން އިސް އޮފިޝަލުން ވަނީ ކަށަވަރުކޮށްދީފައެވެ. 2026 ފެބުރުވަރީގެ ފަހުކޮޅުން ފެށިގެން އީރާނާ ދެކޮޅަށް ކުރިއަށްދާ ފުޅާ އަސްކަރީ ކެމްޕޭނުގައި އެމެރިކާއިން ދަނީ ޖާސޫސީ އަދި ސްޓްރެޓީޖިކް އެހީތެރިކަން ފޯރުކޮށްދެމުންނެވެ.

މި ހަމަލާތަކުގައި ސައުތު ފާސް ގޭސް ފީލްޑުގެ އެކި ސަރަހައްދުތަކަށް ބޮޑެތި ގެއްލުންތަކެއް ދީފައިވެއެވެ. އަސަލޫޔޭގެ ސިނާއީ ބަނދަރުގައި ހުރި ވަސީލަތްތަކަށް ދިން ހަމަލާތަކުގެ ސަބަބުން ބޮޑެތި އަލިފާނުގެ ހާދިސާތައް ހިނގައި، ބައެއް ސަރަހައްދުތަކުގައި ގޭސް އުފެއްދުން ވަނީ މެދުކަނޑާލަން ޖެހިފައެވެ. މިއީ އީރާނުގެ ހަކަތަ އުފައްދާ ނިޒާމަށް ދިން ވަރުގަދަ ހަމަލާއެކެވެ.

މި އޮޕަރޭޝަނުގެ މައިގަނޑު މަގުސަދަކީ އީރާނުގެ އިގްތިސާދީ މައިނާރަށާއި ހަކަތަ ބޭރުކުރުމުގެ ގާބިލުކަމަށް ހުރަސް އެޅުމެވެ. މިއީ ހޮރްމުޒް ކަނޑުއޮޅި ހިމެނޭހެން، ބައިނަލްއަގުވާމީ މުދާ އުފުލާ އުޅަނދުތަކާއި ހަކަތައިގެ ވަސީލަތްތަކަށް އީރާނުން ދެމުންދިޔަ ހަމަލާތަކަށް ދިން ރައްދެއް ކަމަށް ބެލެވެއެވެ. މި ހަމަލާއާއެކު ސަރަހައްދީ މަސްރަހު އިތުރަށް ނުތަނަވަސްވެގެންދާނެ ކަމަށް މުހައްލިލުން ލަފާކުރެއެވެ.