ޕްރިމިއާ ލީގުގެ އެންމެ ފަހުގެ ޗެމްޕިއަން ލިވަޕޫލްގެ ޗެމްޕިއަންސް ލީގު އުންމީދުތަކަށް ބްރައިޓަން އިން ހުރަސް އަޅައިފިއެވެ. ހޮނިހިރު ދުވަހު ކުޅުނު މި މެޗުން ބްރައިޓަން މޮޅުވީ ޑެނީ ވެލްބެކް ކާމިޔާބުކުރި ދެ ލަނޑާއެކު 2-1 ގެ ނަތީޖާއަކުންނެވެ.

މި މެޗުގެ 14 ވަނަ މިނެޓުގައި ބްރައިޓަން އިން ވަނީ ލީޑު ނަގާފައެވެ. ލިވަޕޫލްގެ ކީޕަރު ގިއޯގީ މަމަރްދަޝްވިލީ ފޮނުވާލި ބޯޅައެއް އިބްރާހިމާ ކޮނާޓޭއަށް ރަނގަޅަށް ކޮންޓްރޯލް ނުކުރެވުމުގެ ފައިދާ ނަގައި، ވެލްބެކް ވަނީ ބޮލުން ބޯޅަ ގޯލުގެ ތެރެއަށް ފޮނުވާލާފައެވެ. ނަމަވެސް މެޗުގެ 30 ވަނަ މިނެޓުގައި މިލޯސް ކާކޭޒް ވަނީ ލަނޑެއް ޖަހައި ލިވަޕޫލަށް ނަތީޖާ ހަމަހަމަކޮށްދީފައެވެ.

Ad by Hajj Corporation

ބްރައިޓަން މޮޅުވި ލަނޑު ވެލްބެކް ކާމިޔާބުކުރީ ދެވަނަ ހާފުގެ 56 ވަނަ މިނެޓުގައެވެ. ޔަންކޫބާ މިންޓޭ ނެގި ހުރަހެއް ޖެކް ހިންޝެލްވުޑް ގޯލު ކުރިމައްޗަށް ހުރަސްކޮށްލުމުން، ވެލްބެކް ވަނީ ފަސޭހަކަމާއެކު ބޯޅަ ގޯލަށް ފޮނުވާލާފައެވެ. މިއީ މި ސީޒަނުގައި ލިވަޕޫލް ލީގުގައި ބަލިވި 10 ވަނަ މެޗެވެ.

މި ނަތީޖާއާއެކު ލިވަޕޫލް ވަނީ ތާރީޚީ ގޮތުން ދަށް ރެކޯޑުތަކަކާ ކުރިމަތިލާން ޖެހިފައެވެ. މިއީ 2015-16 ވަނަ ސީޒަނަށް ފަހު ލީގުގެ 10 މެޗުން ލިވަޕޫލް ބަލިވި ފުރަތަމަ ފަހަރެވެ. އަދި މިއީ ޕްރިމިއާ ލީގުގެ ޗެމްޕިއަންކަން ދިފާއުކުރާ ޓީމެއް އެއް ސީޒަނެއްގައި 10 މެޗުން ބަލިވި 7 ވަނަ ފަހަރެވެ.

އާނޭ ސްލޮޓްގެ އިރުޝާދުގެ ދަށުން ކުޅޭ ލިވަޕޫލުން މި ސީޒަނުގައި މިހާތަނަށް 42 ގޯލު ބައިކޮޅަށް ވަދެފައިވާއިރު، މިއީ ވޭތުވެދިޔަ ދެ ސީޒަނަށް ވުރެ ގިނަ އަދަދެކެވެ. އަނިޔާގެ ސަބަބުން ކީޕަރު އެލިސަން ބެކާ އަދި މުހައްމަދު ސަލާހު ނުލައި ކުޅުނު މި މެޗުގައި ލިވަޕޫލްގެ އެޓޭކް ފެނުނީ ވަރަށް ބަލިކޮށެވެ.